Un Buriku A Papia

BO A yega di tende di un buriku ku a papia? Lo bo bisa: ‘Nò, bestia no por papia.’ Pero Beibel ta konta di un buriku ku a papia. Laga nos mira kon esei a sosodé.

E israelitanan tabata kasi kla pa drenta e tera di Kánaan. Balak, rei di Moab, tabatin miedu di e israelitanan. P’esei el a manda buska un hòmber sabí ku yama Balaam pa e bin maldishoná e israelitanan. Balak a primintí ku lo e duna Balaam hopi plaka, i p’esei Balaam a subi riba su buriku i a bai serka Balak.

Yehova no tabata ke pa Balaam maldishoná Su pueblo. P’esei el a manda un angel ku un spada largu pa para den kaminda pa stroba Balaam. Balaam no por a mira e angel, pero su buriku sí a mir’é. P’esei e buriku a keda purba hala pa e angel, i finalmente el a djis kai drumi riba kaminda. Balaam a bira masha rabiá i a suta su buriku ku un palu.

Anto Yehova a hasi Balaam tende su buriku papia kuné. E buriku a puntra: ‘Kiko mi a hasi bo, pa bo ta suta mi?’

‘Bo a laga mi keda manera hende kèns,’ Balaam a kontestá. ‘Si mi tabatin un spada, lo mi a mata bo!’

‘Mi a yega di trata bo asina ántes?’ e buriku a puntra.

Balaam a kontestá: ‘Nò.’

Anto Yehova a laga Balaam mira e angel ku e spada pará den kaminda. E angel a puntra: ‘Pakiko bo ta suta bo buriku? Mi a bini pa sera e kaminda, pasobra bo no mag bai pa maldishoná Israel. Si bo buriku no a hala for di mi, lo mi a dal abo mata, pero lo mi no a hasi bo buriku nada.’

Balaam a bisa: ‘Mi a peka. Mi no tabata sa ku bo ta pará den kaminda.’ E angel a laga Balaam pasa, i Balaam a bai serka Balak. Tòg el a purba maldishoná Israel, pero en bes di esei Yehova a hasié bendishoná Israel tres bes.