Parti 8

Dios su Proposito Ta Alcansa Su Cumplimentu

1, 2. Con Dios tabata haciendo provision pa eliminá sufrimentu?

E GOBERNACION di hende i demoñonan rebelde a bin ta degradá e famia humano pa hopi siglo. Sin embargo, Dios no a ignorá nos sufrimentu. Mas bien, durante tur e siglonan e tabata haciendo provision pa libra hende for dje gara di maldad i sufrimentu.

² N’e tempu dje rebelion den Eden, Dios a cuminsá revelá su propósito pa forma un gobiernu cu lo a haci e tera aki un cas paradísico pa hende. (Génesis 3:15) Despues, como Dios su bosero principal, Jesus a haci e binidero gobiernu di Dios aki e tema di su siñansa. El a bisa cu esei lo ta e único speransa pa humanidad.​—Daniel 2:44; Mateo 6:​9, 10; 12:21.

3. Kico Jesus a yama e binidero gobiernu pa tera i pakico?

³ Jesus a yama e binidero gobiernu ei di Dios “e reino di cielu,” ya cu lo e mester a goberná for di cielu. (Mateo 4:17) Tambe el a yam’é “e reino di Dios,” ya cu Dios lo tabata su Autor. (Lucas 17:20) Durante e siglonan Dios a inspirá su escritornan pa skirbi profecianan tocante esnan cu lo a forma e gobiernu ei i loke lo el a bin logra.

Rey Nobo dje Tera

4, 5. Con Dios a mustra cu Jesus tabata su Rey ­aprobá?

⁴ Tabata Jesus kende, casi dos mil aña pasá, a cumpli cu e hopi profecianan tocante esun cu lo a ser Rey dje Reino di Dios. El a resultá di ser esun cu Dios a scoge como Gobernante dje gobiernu celestial ei riba humanidad. I despues di su morto, Dios a resucitá Jesus na bida den cielu como un criatura spiritual, poderoso i inmortal. Tabatin hopi testigo di su resureccion.​—Echo 4:10; 9:​1-9; Romano 1:​1-4; 1 Corintio 15:​3-8.

⁵ Anto Jesus “a sinta na e man drechi di Dios.” (Hebreo 10:12) Ei el e spera e tempu ora Dios lo a autoris’é pa tuma accion como Rey dje Reino celestial di Dios. Esaki a cumpli cu e profecia na Salmo 110:​1, caminda Dios ta bis’é: “Sinta na mi man drechi te ora cu mi pone bo enemigunan como un banki pa bo pia.”

6. Con Jesus a mustra cu el a cualificá pa ser Rey dje Reino di Dios?

⁶ Tempu cu e tabata riba tera, Jesus a mustra cu el a cualificá pa tal posicion. Apesar di persiguicion, el a scoge pa mantené su integridad na Dios. Dor di haci esei, el a mustra cu Satanas a gaña ora el a pretendé cu ningun hende lo a ser fiel na Dios bou di prueba. Jesus, un homber perfecto, e ‘segundo Adam,’ a mustra cu Dios no tabata robes creando hende perfecto.​—1 Corintio 15:​22, 45; Mateo 4:​1-11.

7, 8. Cua bon cosnan Jesus a haci ora e tabata riba tera i kico el a demostrá?

⁷ Cua gobernante hamas a logra asina tantu cos bon manera Jesus a logra den e par di añanan di su ministerio? Cu poder di Dios su spiritu santu, Jesus a cura esnan enfermo, esnan mancaron, esnan ciegu, esnan surdu, esnan muda. Asta el a lanta esnan morto! El a demostrá na un escala chikitu loke lo e haci pa humanidad na un escala mundial ora e bini den poder di Reino.​—Mateo 15:​30, 31; Lucas 7:​11-16.

⁸ Jesus a haci asina tantu bon ora e tabata riba tera cu su disipel Juan a bisa: “Realmente, tin masha hopi otro cos tambe cu Jesus a haci, cuanan, si nan a yega di ser skirbí cu tur detaye, mi ta suponé, e mundu mes lo no por a contené e rolnan skirbí.”​—Juan 21:25.a

9. Pakico hende di curason onrado a basha bin cerca Jesus?

⁹ Jesus tabata amabel i compasivo, teniendo masha tantu amor pa hende. El a yuda esnan pober i esnan oprimí, pero e no a discriminá esnan cu rikesa of posicion. Hende di curason onrado a respondé na e invitacion amoroso di Jesus ora el a bisa: “Bini cerca mi, boso tur cu ta afaná i cargá i lo mi refrescá boso. Tuma mi yugo riba boso i siña for di mi, pasobra mi ta di genio suave i humilde di curason i boso lo haña refrescamentu pa boso alma. Pasobra mi yugo ta suave i mi carga ta leve.” (Mateo 11:​28-30) Personanan temeroso di Dios a basha bin cerca dje i a mira padilanti na su gobernacion.​—Juan 12:19.

Gobernantenan Socio

10, 11. Ken lo participá cu Jesus den gobernacion riba e tera?

¹⁰ Mescos cu gobiernunan humano tin administradornan socio, asina Dios su Reino celestial tambe tin. Otronan ademas di Jesus lo bai participá den gobernacion riba e tera, pasobra Jesus a primintí su socionan íntimo cu nan lo goberná cuné como rey riba humanidad.​—Juan 14:​2, 3; Revelacion 5:10; 20:6.

¹¹ Pues, huntu cu Jesus, un cantidad limitá di hende tambe ta ser resucitá na bida celestial. Nan ta forma e Reino di Dios cu lo trece bendicionnan eterno pa humanidad. (2 Corintio 4:14; Revelacion 14:​1-3) Asina atraves di épocanan, Jehova a pone e fundeshi pa un gobernacion cu lo trece bendicionnan eterno pa e famia humano.

Gobernacion Independiente Lo Terminá

12, 13. Kico Dios su Reino ta cla pa haci awor?

¹² Den e siglo aki Dios a hinca man directamente den asuntunan di tera. Manera Parti 9 dje foyeto aki lo considerá, profecia bíblico ta mustra cu Dios su Reino bou di Cristo tabata establecí na aña 1914 i awor ta cla pa eliminá henter Satanas su sistema. E Reino ei ta cla pa “bai dominá meimei di [Cristo su] enemigunan.”​—Salmo 110:2.

¹³ Encuanto esaki e profecia na Daniel 2:44 ta bisa: “Den e dianan dje reynan ei [existiendo awor] e Dios di cielu lo establecé un reino [den cielu] cu nunca lo ser destruí, tampoco su soberania lo ser lagá pa un otro pueblo [gobernacion humano lo no ser permití nunca mas]. Lo e [Dios su Reino] kibra tur e reinonan aki na pida pida i lo trece nan na un fin i lo e para pa semper.”​—Revised Standard Version.

14. Cua ta algun beneficio cu lo bin como resultado dje fin di gobernacion humano?

¹⁴ Cu tur gobernacion independiente di Dios kitá for di caminda, Dios su gobernacion di Reino riba e tera lo ser completo. I pa motibu cu e Reino ta goberná for di cielu, nunca lo e por ser corumpí dor di hende. Poder di goberná lo ta caminda e tabata na promé instante, den cielu, cerca Dios. I siendo cu Dios su gobernacion lo controlá tur e tera, ningun persona mas lo ser gañá dor di religion falsu of filosofianan humano insatisfactorio i teorianan político. Ningun dje cosnan ei lo ser permití pa existí.​—Mateo 7:​15-23; Revelacion, capítulo 17 te cu 19.

[Nota]

[Plachi na página 18]

Mientras e tabata riba tera Jesus a cura esnan enfermo i a lanta esnan morto pa mustra loke lo e haci den e mundu nobo

[Plachi na página 19]

Dios su Reino celestial lo eliminá for di existencia tur forma di gobiernu independiente di Dios