Un Prospecto Unico!

“Tur cu ta bibu i ta ehercé fe den mi lo no muri hamas.”—JUAN 11:26.

1. Miyones di hende cu awor ta morto lo ser resucitá den ki clase di ambiente?

ORA miyones di hende lanta den e resureccion, nan lo no ser trecé bek na bida riba un tera bashí. (Echonan 24:15) Nan lo spierta den un ambiente bunita drechá i lo nota cu a prepará lugá di biba, paña i cuminda na abundancia pa nan. Ken lo haci tur e preparacionnan aki? Obviamente, lo mester tin hende ta biba den e mundu nobo promé cu e resureccion terenal cuminsá. Pero ken?

2-4. Ki prospecto único ta spera esnan cu ta bibando den “e último dianan”?

² Cumplimentu di profecia bíblico ta mustra cu nos ta bibando den “e último dianan” dje sistema di cosnan aki.a (2 Timoteo 3:1) Masha pronto awor, Jehova Dios lo bai intervení den asuntunan humano i eliminá maldad for di riba tera. (Salmo 37:10, 11; Proverbionan 2:21, 22) N’e tempu ei, kico lo sosodé cu esnan cu ta sirbiendo Dios fielmente?

³ Jehova lo no destruí e hustunan huntu cu e malbadonan. (Salmo 145:20) Nunca el a haci un cos asina, i lo e no hacié ora e ta bai limpia e tera di tur maldad. (Compará cu Génesis 18:22, 23, 26.) De echo, e último buki di Bijbel ta papia di un “multitud grandi, cu ningun hende por a conta, for di tur nacion i tribu i pueblo i lenga,” saliendo for dje “tribulacion grandi.” (Revelacion 7:9-14) Sí, un multitud grandi lo sobrebibí e tribulacion grandi den cua e mundu malbado actual lo caba, i nan lo drenta Dios su mundu nobo. Ei, hende obediente por beneficiá plenamente di Dios su percuracion maraviyoso pa libra humanidad di picá i morto. (Revelacion 22:1, 2) Pues, nunca e “multitud grandi” lo tin cu experenciá morto. Ki un prospecto único!

⁴ Nos por tin confiansa den e speransa sorprendente aki? Absolutamente cu sí! Jesucristo mes a indicá cu lo bini un tempu ora cu hende lo biba sin muri nunca. Djis promé cu el a resucitá su amigu Lázaro, Jesus a bisa Marta: “Tur cu ta bibu i ta ehercé fe den mi lo no muri hamas.”—Juan 11:26.

Abo Tambe Por Biba pa Semper

5, 6. Si bo kier biba pa semper den Paradijs riba tera, kico bo mester haci?

⁵ Bo kier biba pa semper den Paradijs riba tera? Bo ta anhelá pa mira bo sernan kerí atrobe? Anto bo tin cu gana conocimentu exacto di Dios su boluntad i propósitonan. Den un oracion na Dios, Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

⁶ Ta Dios su boluntad pa “tur clase di hende ser salbá i yega na un conocimentu exacto dje berdad.” (1 Timoteo 2:3, 4) Awor ta e tempu pa siña con abo, huntu cu miyones di otro hende cu ya caba ta haciendo e boluntad di Dios, por biba pa semper den Paradijs riba tera. Gustosamente Testigonan di Jehova lo yudá bo siña mas tocante Dios i su rekisitonan. Pakico no tuma contacto cu nan na un Salon di Reino cerca di bo of skirbi n’e adres mas cumbiniente mencioná riba e siguiente página?

[Notanan]

[Plachi na página 31]

“Un multitud grandi” nunca lo tin cu experenciá morto