Nan Obra i Organisacion Mundial

E OBRA di predicá cu Testigonan di Jehova ta haci den mas cu 230 pais, tin henter un structura di organisacion su tras. E direccion general ta bini for di e Cuerpo Gobernante na e sede mundial na Brooklyn, New York. Tur aña e Cuerpo Gobernante ta manda representante na diferente region di mundu pa consultá cu e representantenan di sucursal den e regionnan ei. Na e oficinanan di sucursal tin Comiténan di Sucursal cu ta consistí di tres te shete miembro pa supervisá e trabou den e paisnan bou di nan direccion. Algun di e sucursalnan tin facilidad di imprenta, di cua algun ta traha cu imprentanan di velocidad haltu. E pais of área cu cada sucursal ta sirbi ta dividí den distrito, i e distritonan na nan turno ta dividí den circuito. Cada circuito tin mas o ménos 20 congregacion. Un superintendente di distrito ta bishitá cada circuito den su distrito. Cada circuito tin dos asamblea pa aña. Tambe tin un superintendente di circuito, i e ta bishitá cada congregacion den su circuito, generalmente dos bes pa aña, yudando e Testigonan den organisá i haci e obra di predicá den e teritorio asigná dje congregacion ei.

E congregacion local cu su Salon di Reino ta e centro pa predicacion dje bon nobo den bo comunidad. E área cu ta cai bou di cada congregacion ta partí den teritorionan mas chikitu. Esakinan ta asigná na Testigonan individual cu ta trata na bishitá i papia cu e hendenan cu tin den cada cas dje teritorio ei. Cada congregacion, cu ta consistí di algun te cu un 200 Testigo, tin ancianonan asigná pa percurá pa diferente tarea. Den e organisacion di Testigonan di Jehova, e proclamadó individual di e bon nobo ta di vital importancia. Cada Testigo, sea e ta sirbi na e sede mundial, na sucursal of den congregacion, ta haci e obra di predicá aki personalmente dor di conta otro hende tocante e Reino di Dios.

Informe di e actividad aki finalmente ta yega na e sede mundial, i nan ta compilá i publicá un Anuario tur aña. Tambe nan ta publicá un raport dje actividad aki tur aña den e edicion di 1 di januari di E Toren di Vigilancia. E dos publicacionnan aki ta duna un informe detayá di e logronan anual den duna testimonio di Jehova i su Reino bou di Cristo Jesus. Den añanan recien mas o ménos 14.000.000 Testigo i hende interesá a asistí na e Conmemoracion anual di e morto di Jesus. Testigonan di Jehova ta dedicá mas cu 1.000.000.000 ora pa aña na proclamá e bon nobo, i mas cu 300.000 candidato nobo ta bautisá. E cantidad di literatura cu nan ta laga ta suma cientos di miyones di ehemplar.