Lès 14

Con Testigonan di Jehova Ta Organisá

Na ki tempu Testigonan di Jehova tabatin nan comienso di tempu actual? (1)

Con e reunionnan di Testigonan di Jehova ta ser conducí? (2)

Con gastunan ta ser cubrí? (3)

Ken ta hiba e delantera den cada congregacion? (4)

Cua reunionnan mas grandi ta ser tené tur aña? (5)

Ki trabou ta ser hací na nan sede i sucursalnan? (6)

1. Testigonan di Jehova tabatin nan comienso di tempu actual den e añanan ’70 di siglo pasá. Na cuminsamentu, nan tabata yama Studiantenan di Bijbel. Pero na 1931 nan a adoptá e nomber bíblico Testigonan di Jehova. (Isaías 43:10) For di un cuminsamentu chikitu e organisacion a crece bira unu cu miyones di Testigo, kendenan ta ocupá predicando den mas cu 230 pais.

2. Mayoria dje congregacionnan di Testigonan di Jehova tin reunion tres biaha pa siman. Bo ta ser invitá pa asistí na cualkier di esakinan. (Hebreonan 10:24, 25) E Bijbel ta e base pa loke ta ser siñá. Reunionnan ta habri i cera cu oracion. Tambe “canticanan spiritual” sincero ta ser cantá na mayoria dje reunionnan. (Efesionan 5:18, 19) Entrada ta grátis i no ta tene colect.—Mateo 10:8.

3. Mayoria congregacion ta tene reunion den un Salon di Reino. Generalmente esakinan ta edificionan simpel construí dor di Testigonan boluntario. Lo bo no mira ningun imágen, crucifiho of cosnan asina na e Salon di Reino. Gastunan ta ser pagá mediante donacionnan boluntario. Pa esnan cu ta deseá di haci un donacion, tin un caha di contribucion.—2 Corintionan 9:7.

4. Den cada congregacion, tin ancianonan of superintendentenan. Nan ta hiba e delantera den siñamentu den e congregacion. (1 Timoteo 3:1-7; 5:17) Nan ta ser yudá dor di sirbidornan ministerial. (1 Timoteo 3:8-10, 12, 13) E hombernan aki no ta ser halsá riba e resto dje congregacion. (2 Corintionan 1:24) Nan no ta haña títulonan special. (Mateo 23:8-10) Nan no ta bisti diferente for di otronan. Ni tampoco nan no ta ser pagá pa nan trabou. Ancianonan boluntariamente ta percurá pa e necesidadnan spiritual dje congregacion. Nan por duna consuelo i guia den tempu di dificultad.—Santiago 5:14-16; 1 Pedro 5:2, 3.

5. Tambe Testigonan di Jehova ta tene asambleanan of congresonan grandi tur aña. Na e ocasionnan aki hopi congregacion ta reuní huntu pa un programa special di instruccion bíblico. Bautismo di disipelnan nobo ta un parti regular di cada programa di asamblea of congreso.—Mateo 3:13-17; 28:19, 20.

6. E sede mundial di Testigonan di Jehova ta na New York. Einan e Cuerpo Gobernante ta situá, un grupo central di ancianonan experenciá cu ta supervisá e congregacion mundial. Tambe tin mas cu 100 sucursal rond mundu. Na e sitionan aki, boluntarionan ta yuda imprimí i manda literatura bíblico. Tambe ta duna guia pa organisá e trabou di predicá. Pakico no planea pa bishitá e sucursal mas cerca di bo?