Dikon Dios Tin un Organisashon?

1. Dikon Dios a organisá e nashon di Israel di pasado?

Dios a organisá e desendientenan di e patriarka Abraham komo un nashon i a duna nan un kódigo di lei. El a yama e nashon ei “Israel” i a duna nan e responsabilidat di protehá su palabra i pega na adorashon berdadero. (Salmo 147:19, 20) Di e manera ei, hende di tur nashon por a risibí bendishon pa medio di Israel.—Lesa Génesis 22:18.

Dios a skohe e israelitanan pa nan a sirbi komo su testigunan. Historia di e pueblo akí ta mustra ki benefisio hende por saka si nan obedesé Dios su leinan. (Deuteronomio 4:6) Pues, pa medio di Israel otro nashonnan por a siña konosé e Dios berdadero.—Lesa Isaías 43:10, 12.

2. Dikon kristiannan berdadero ta un grupo organisá?

Ku tempu e nashon di Israel a pèrdè Dios su aprobashon; p’esei Yehova a remplas’é ku e kongregashon kristian. (Mateo 21:43; 23:37, 38) Awor, na lugá di e israelitanan, ta e kristiannan berdadero ta Yehova su testigunan.—Lesa Echonan 15:14, 17.

Hesus a organisá su siguidónan pa prediká i hasi disipel den tur nashon. (Mateo 10:7, 11; 24:14; 28:19, 20) E obra akí ta yegando su kulminashon durante e konklushon di e era akí. Pa promé biaha den historia, Yehova a uni miónes di hende for di tur nashon den adorashon berdadero. (Revelashon 7:9, 10) Kristiannan berdadero ta bon organisá pa yuda otro i animá otro. Rònt mundu, nan ta sigui e mesun programa di instrukshon bíbliko na nan reunionnan.—Lesa Hebreonan 10:24, 25.

3. Kon e organisashon di Testigunan di Yehova di nos tempu a kuminsá?

Den e dékada di 1870, un grupo chikitu di studiante di Beibel a kuminsá saka na kla bèrdatnan bíbliko ku pa hopi tempu tabata skondí. Nan a haña sa ku Hesus a organisá e kongregashon kristian pa hasi e trabou di prediká. P’esei, nan a start un kampaña internashonal di prediká e mensahe di Reino. Anto na 1931 nan a adoptá e nòmber Testigunan di Yehova.—Lesa Echonan 1:8; 2:1, 4; 5:42.

4. Kon e organisashon di Testigunan di Yehova ta funshoná awe?

Den promé siglo, kongregashonnan kristian di hopi pais a benefisiá di e guia di un kuerpo gobernante sentral ku a rekonosé Hesus komo Kabes di kongregashon. (Echonan 16:4, 5) Awe tambe, rònt mundu Testigunan di Yehova ta benefisiá di e guia ku nan ta haña di un Kuerpo Gobernante ku ta konsistí di ansianonan ku tin hopi eksperensia. E Kuerpo akí ta supervisá e sukursalnan di Testigunan di Yehova ku ta tradusí, imprimí i distribuí literatura bíbliko den mas ku 600 idioma. Di e manera ei, e Kuerpo Gobernante por duna instrukshon i animashon for di e Skritura na mas ku 100.000 kongregashon rònt mundu. Anto den kada kongregashon tin hòmber kualifiká ku ta sirbi komo ansiano, òf superintendente. E hòmbernan akí ta stima e tou di Dios i ta kuid’é.—Lesa 1 Pedro 5:2, 3.

Testigunan di Yehova ta bon organisá pa prediká e bon notisia i hasi disipel. Meskos ku e apòstelnan, nos ta prediká di kas pa kas. (Echonan 20:20) Tambe nos ta ofresé estudio di Beibel na hende sinsero ku ke haña sa e bèrdat. Pero Testigunan di Yehova no ta djis un organisashon; nos ta manera un famia ku tin un Tata amoroso. Nos ta manera ruman hòmber i ruman muhé ku ta interesá den otro. (2 Tesalonisensenan 1:3) Ya ku e pueblo di Yehova ta organisá pa sirbié i pa yuda otro hende, nan ta e famia di mas felis na mundu.—Lesa Salmo 33:12; Echonan 20:35.