Papiamento na Lenga Straño—Un Fenómeno Aumentante
“UN FORZA a domina mi lenga i palabra simplemente a basha for di mi boca manera awa. Ki un gozo esei tabata! Mi a sintími super limpi. Desde e ora ei mi no a keda mescos,” segun e persona cu tabatin e experencia extraordinario di papia na “lenga desconocí.”
Esei ta detaye di un persona cu tabatin su promé experencia papiando na “lenga desconocí.” Algun hende por puntra hustamente, ‘Pero, kico esei tá?’ E ta referi na un costumber of creencia di algun religion ora homber i muher ta bisa cu e spiritu di Dios ta impulsánan pa papia na idioma stranhero of desconocí na nan.
Esei ta un fenómeno religioso of cos straño cu ta aumenta. Na antes tal papiamento na lenga tabata considerá como algo cu pentecostal so a haci, pero awor e ta pasa frontera di secta tradicional pa inclui, bautista, anglicano, luterano, metodista, protestante, i católico romano. Nan ta bisa cu mientras cu hende ta papia na lenga straño nan ta foi tino, frenético, i hipnótico. Algun hende asta ta yamé un experencia histérico. Tin algo misterioso i carismático relacioná cu papiamento na lenga straño, of glosolalia.
Pakico Hende Djawe ta Deseá e Don di Papia na Lenga Straño?
Den su buki na inglés Lenga di spiritu, Cyril G. Williams ta indica cu por tin un “correlacion entre un sintimento di fracaso i e deseo di [papia na] ‘lenga.’” El a pinté como un mecanismo di deshogá cu “balor terapéutico cu ta reduci tension” i ta “resolve conflicto interno.” Factor cu ta ser mencioná cu ta contribui na tal papiamento foi tino ta frustracion den trabao religioso, tension emocional, fracaso den ofishi, perdimento di un querido, tension den famía, of enfermedad den e famía.
Di igual manera, den e buki na inglés E sicología di papia na lenga straño, John P. Kildahl ta bisa cu “ansia ta un requisito pa desaroya e capacidad di papia na lenga straño.” Mediante investigacion personal i entrevista cuidadoso, nan a descubri cu “mas cu 85% di hende cu ta papia na lenga straño a experimenta un crisis di ansia claramento bisto promé cu nan a cuminza.” Por ehempel, un mama a deseá di papia na lenga straño pe haci oracion pa su yiu cu a padece di cáncer. Un homber a cuminza papia na lenga straño durante un periodo di indecision riba e oferta di promocion na trabao. Un señora a cuminza papia na lenga straño un siman despues cu su esposo a drenta Alcohólico Anónimo.
Kico Hende ta Sinti?
Un otro hende cu a papia na lenga straño pe promé bez a informa: “Mi a sinti un kimamento den tur mi curpa, i calafriu i gota grandi di sodor, un temblamento i un cierto debilidad den mi braza i pia.” Relacioná hopi bez cu experencia di papia na lenga straño ta conducta straño cu ta molestiá algun hende. Por ehempel, “un hovencita casi a hoga cu su mes scupi ora e tabata rek riba un stoel, cu su nek riba e parti patrás di dje, su hilchi na suela, i su pia stijf.” Durante un reunion di congregacion “un homber a haci koproll di punta te punta di misa.”
Profesor William J. Samarin a skirbi: “Pa algun hende, papiamento na lenga straño ta un requisito pa nan bautiza den e Spiritu Santo.” Faltando esei, ta “hácinan síntinan incompleto.” També, nan ta considera esei “como un contesta pa nan oracion, un garantía di amor i aceptacion divino.” Otronan ta bisa cu esei ta hácinan sinti un armonía, gozo i paz interno, i cu un “mayor sintimento di poder” i “un sintimento mas intenso di identidad.”
Papiamento foi tino realmente ta duna prueba di obramento di spiritu santo? Tal experencia ta identifica hende como cristian berdadero? Papiamento na lenga straño ta un parti di adoracion aceptabel awendia? Pregunta asina ta merece mas cu un contesta superficial. Pakico? Pasobra nos kier pa Dios aproba di nos adoracion i bendicioné.