Famia ta Bao di Atake!

“E FAMÍA ta e institucion humano di mas edad. Di hopi manera e ta esun mas importante. E ta e unidad mas fundamental dje arreglo social humano. Civilizacion henter a sigi of a desparce dependiendo di si bida di famía tabata fuerte of swak.”

The World Book Encyclopedia a bisa esei ayá na 1973. No obstante, tumando na cuenta e situacion djawe, e palabra ei ta tuma forma di un spiertamento, casi un pronosticacion. Añanan mas reciente a presenciá loke ta igual cu un atake frontal contra bida di ­famía. E consehero popular John Bradshaw a skirbi: “Tin un crisis den famía di awendia. . . . E gran cantidad di divorcio, disturbio huvenil, uso enorme di droga, epidemia di incesto, maleza di stoma i maltrato físico ta evidencia di cu algo ta bai mashá malu.”

Berdaderamente, tin “evidencia di cu algo ta bai mashá malu” den famía rond di mundo. E revista The Unesco Courier a bisa tocante e situacion den Europa: “Desde 1965, tabatin un aumento grandi den divorcio den tur e continente. . . . [Tin] un aumento den e cantidad di famía cu ta falta tata of mama.” País desaroyando també ta experimenta un aumento di kibramento di famía. Autora Hélène Tremblay a bisa: “Pa miyones di hende cu ta biba den arreglo social cu a conoce un moda di biba normal, rutinario, i incambiabel pa siglonan, esaki ta un tempo di hopi disturbio.”

E ambiente cu ta existi den hopi cas awe ta specialmente alarmante. Den América so tin miyones i miyones di yiu cu un mama of un tata alcohólico so ta cria. També, tin un aumento spantoso di violencia den famía. Den nan buki na inglés Violencia íntimo, investigador Richard Gelles i Murray Straus ta informa: “Tin mas probabilidad pa bo bira víctima di asalto, golpi, i morto den bo mes cas den man di un stimá, cu na cualkier otro parti of den man di cualkier otro persona den nos arreglo social.”

Si existencia di civilizacion realmente ta depende di famía fuerte, tin motibo pa preocupá tocante e futuro di dje. Sin embargo, ta posibel cu e futuro di civilizacion no ta preocupábo mes. Ta hopi mas probable cu bo ta preocupábo tocante con tal disturbio lo afecta bo famía. Kico lo sosode? E contesta di un fuente autorizá por wel sorprendébo mashá.