Sigui Tras di Pas Divino den Bida di Famia
“Atribuí na Jehova, O famianan di pueblo, atribuí na Jehova gloria i fortalesa.”—SALMO 96:7.
1. Ki clase di inicio Jehova a duna bida di famia?
E BIDA di famia cu Jehova a iniciá tabata unu felis i na pas ora el a uni e promé homber i e promé muher den matrimonio. En realidad, Adam tabata asina felis cu el a expresá su goso den e poema di mas antiguo cu a ser registrá: “Esaki por fin ta wesu di mi wesunan i carni di mi carni. Esun aki lo ser yamá Muher, pasobra for di homber esun aki a ser tumá.”—Génesis 2:23.
2. Kico Dios tabatin na mente pa matrimonio ademas di trece felicidad pa su yunan humano?
2 Ora Dios a instituí matrimonio i e areglo di famia, e tabatin mas na mente cu solamente trece felicidad na su yunan humano. E tabata kier pa nan haci su boluntad. Dios a bisa e promé pareha: “Sea fructífero i bira hopi i yena e tera i domin’é, i tene dominio riba piscá di laman i riba criaturanan bulador di shelu i riba tur criatura bibiente cu ta move riba tera.” (Génesis 1:28) En berdad, un asignacion recompensador. Ki contentu Adam, Eva i nan futuro yunan lo tabata si e promé pareha casá a cumpli obedientemente cu e boluntad di Jehova!
3. Kico ta necesario pa famianan biba cu debocion piadoso?
3 Asina mes, asta awe famianan ta mas felis ora nan ta traha huntu pa haci e boluntad di Dios. I ki prospectonan espléndido famianan obediente asina tin! Apostel Pablo a skirbi: “Debocion piadoso ta beneficioso pa tur cos, ya cu e ta encerá promesa dje bida djawor i di esun pa bini.” (1 Timoteo 4:8) Famianan cu ta biba cu berdadero debocion piadoso ta sigui e principionan dje Palabra di Jehova i ta haci su boluntad. Nan ta sigui tras di pas divino i como resultado nan ta haña felicidad den e “bida djawor.”
Bida di Famia na Peliger
4, 5. Pakico nos por bisa cu bida di famia ta na peliger rond mundu?
4 Naturalmente, nos no ta haña pas i felicidad den tur famia. Citando un estudio hací dor di un instituto di demografia yamá e Conseho di Poblacion, The New York Times ta declará: “Den tantu paisnan ricu como pober, e structura di bida di famia ta pasando dor di cambionan profundo.” A cita un autor dje estudio aki cu a bisa: “E idea cu famia ta un unidad stabil i coherente den cua tata ta fungi como e percuradó económico i mama como e dunadó di cuido emocional ta un mito. E realidad ta cu tendencianan manera mama soltero, aumento den tasa di divorcio [i] famianan mas chikitu . . . ta tumando lugá rond mundu.” Debí na tendencianan asina, miyones di famia ta falta stabilidad, pas i felicidad, i hopi ta kibrando for di otro. Na Spaña e tasa di divorcio a subi te na 1 di cada 8 matrimonio na cuminsamentu di añanan ’90—un gran aumento compará cu 1 di cada 100 djis 25 aña promé. Segun informe, Inglatera tin un dje tasanan di divorcio di mas haltu di Europa—4 di cada 10 matrimonio ta fracasá. E pais ei a mira tambe un aumento repentino den e cantidad di famianan di un solo mayor.
5 Ta parce cu algun hende casi no por warda pa haña un divorcio. Hopi hende ta basha bai n’e “Tempel di Kibra Laso” den becindario di Tokio, Hapon. E tempel sintoista aki ta aceptá peticionnan pa divorcio i pa kiebro di otro relacionnan no-deseá. Cada adoradó ta skirbi su peticion riba un tabla di palu fini, ta cologu’é n’e muraya rond dje tempel, i ta resa pa un contesta. Un corant di Tokio ta bisa cu ora e tempel a ser fundá rond di un siglo pasá, “e esposanan di comerciantenan local ricu tabata skirbi oracionnan pidiendo pa nan esposo bandoná nan amantenan i bini bek cerca nan.” Sin embargo, awe mayoria peticion ta pa divorcio, no pa reconciliacion. Sin duda, rond mundu bida di famia ta na peliger. Esaki mester sorprendé cristiannan? No, pasobra Bijbel ta yuda nos comprendé e motibunan p’e crísis actual den bida di famia.
Pakico e Crísis di Famia?
6. Ki relacion 1 Juan 5:19 tin cu e crísis di famia djawe?
6 Un motibu pa e crísis di famia djawe ta esaki: “Henter e mundu ta drumí den poder dje malbado.” (1 Juan 5:19) Kico nos por spera dje malbado, Satanas e Diabel? E ta un gañadó malbado i inmoral. (Juan 8:44) Nada straño cu su mundu tin satisfaccion den engaño i inmoralidad, cosnan asina devastador pa bida di famia! Pafó dje organisacion di Dios, influencia satánico ta menasá di destruí Jehova su areglo di matrimonio i di trece un fin na bida di famia pacífico.
7. Con e característicanan cu hopi hende den e último dianan aki ta manifestá por afectá famianan?
7 Un otro motibu pa e problemanan di famia cu awor ta plaga humanidad ta ser indicá na 2 Timoteo 3:1-5. Pablo su palabranan profético registrá einan ta mustra cu nos ta bibando den “e último dianan.” Famianan no por tin pas ni felicidad si nan miembronan ta “stimadó di nan mes, stimadó di placa, presumido, halsá, blasfemadó, desobediente na mayornan, malagradecí, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios, teniendo un forma di debocion piadoso pero resultando falsu na su poder.” Un famia no por ta completamente felis si asta un di su miembronan ta falta cariño natural of ta desleal. Cuantu pas por tin den bida di famia si un persona den cas ta feros i no ta dispuesto na ningun acuerdo? Pió ainda, con por tin pas i felicidad si miembronan di famia ta stimadó di placer mas bien cu stimadó di Dios? Esakinan ta e característicanan di hende den e mundu aki goberná dor di Satanas. Nada straño cu felicidad den famia ta difícil pa alcansá den e último dianan aki!
8, 9. Ki efecto e comportacion di yunan por tin riba felicidad di famia?
8 Un otro motibu mas pakico hopi famia ta carecé di pas i felicidad ta e mal conducta di yunan. Ora Pablo a profetisá di condicionnan den e último dianan, el a profetisá cu hopi yu lo ta desobediente na mayornan. Si abo ta un hóben, bo comportacion ta contribuí na pas i felicidad den bo famia?
9 Algun yu no ta ehemplar den nan comportacion. Por ehempel, un hobencito a skirbi su tata e carta desagradabel aki: “Si bo no hibá mi Alehandria lo mi no skirbí bo ningun carta, ni papia cu bo, ni yamá bo ayó, i si bo bai Alehandria sin mi, lo mi no tene bo man ni cumindá bo nunca mas. Esaki ta loke lo sosodé si bo no hibá mi . . . Pero manda un [harpa] pa mi, mi ta rogá bo. Si bo no hacié, lo mi no come i lo mi no bebe. Mi no ta haci wega!” Esei ta parce un situacion actual? Wel, e carta ei cu un mucha homber a manda pa su tata a ser skirbí den Egipto di antigwedad mas cu 2.000 aña pasá.
10. Con hóbennan por yuda nan famia sigui tras di pas divino?
10 E actitud dje hóben egipcio ei no a promové pas den famia. Naturalmente, cosnan hopi mas serio cu esei ta sosodé den famianan den e último dianan aki. Sin embargo, hóbennan, boso por yuda boso famia sigui tras di pas divino. Con? Dor di obedecé e conseho bíblico aki: “Yunan, sea obediente na boso mayornan den tur cos, pasobra esaki ta masha agradabel den Señor.”—Colosensenan 3:20.
11. Con mayornan por yuda nan yunan bira sirbidónan fiel di Jehova?
11 Mayornan, kico di boso? Amorosamente yuda boso yunan bira sirbidónan fiel di Jehova. “Entrená un mucha homber conforme cu e caminda p’e,” Proverbionan 22:6 ta bisa. “Asta ora e bira bieu lo e no desviá for di dje.” Cu siñansa excelente for dje Scritura i bon ehempel di nan mayornan, hopi mucha homber i mucha muher no ta apartá for dje caminda corecto ora nan bira mas grandi. Pero hopi ta dependé dje calidad i grado di entrenamentu bíblico i dje curason dje hóben.
12. Pakico un hogar cristian mester ta pacífico?
12 Si tur miembro di nos famia ta purba pa haci e boluntad di Jehova, nos lo mester ta disfrutando di pas divino. Un hogar cristian mester ta yená cu ‘amigunan di pas.’ Lucas 10:1-6 ta mustra cu Jesus tabatin personanan asina na mente ora el a manda 70 disipel como minister i a bisa nan: “Unda cu boso drenta den un cas bisa promé, ‘Pas sea cu e cas aki.’ I si tin un amigu di pas ei, boso pas lo keda riba dje.” Segun cu sirbidónan di Jehova ta bai pacíficamente di cas pa cas cu “e bon nobo di pas,” nan ta busca amigunan di pas. (Echonan 10:34-36; Efesionan 2:13-18) Siguramente, un famia cristian cu ta consistí di amigunan di pas mester ta pacífico.
13, 14. (a) Kico Noemí a deseá pa Rut i Orpa? (b) Un hogar cristian mester ta ki clase di lugá di descanso?
13 Un hogar mester ta un lugá di pas i sosiegu. E biuda di edad avansá, Noemí, a spera cu Dios lo a duna su suegranan biuda hóben, Rut i Orpa, e sosiegu i consuelo cu ta resultá di tin un bon esposo i hogar. Noemí a bisa: “Cu Jehova duna boso un regalo, i haña un lugá di descanso, cada un di boso den e cas di su esposo.” (Rut 1:9) En cuanto e deseo di Noemí, un erudito a skirbi cu den hogarnan asina, Rut i Orpa “lo tabata liber di inkietud i ansiedad. Nan lo a haña descanso. Lo e tabata un lugá den cua nan por a biba i den cua nan sintimentunan di mas tierno i deseonan di mas onorabel lo a haña satisfaccion i sosiegu. E forsa peculiar dje palabra hebreo . . . ta ser manifestá di un manera excelente dor dje naturalesa dje expresionnan cu ta asociá cuné den [Isaías 32:17, 18].”
14 Por fabor, ripará e referencia aki na Isaías 32:17, 18. Ei nos ta lesa: “E trabou di berdadero husticia mester bira pas; i e sirbishi di berdadero husticia, trankilidad i siguridad te na tempu indefiní. I mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.” Un hogar cristian mester ta un lugá di descanso di husticia, trankilidad, siguridad i pas divino. Pero kico si pruebanan, desacuerdonan of otro problemanan presentá? E ora ei specialmente nos tin cu conocé e secreto di felicidad den famia.
Cuater Principio Vital
15. Con lo bo definí e secreto di felicidad den famia?
15 Tur famia riba tera debe nan nomber na Jehova Dios, e Creador di famia. (Efesionan 3:14, 15) Pues esnan cu ta deseá felicidad den famia mester busca su guia i alab’é, mescos cu e salmista a haci: “Atribuí na Jehova, O famianan di pueblo, atribuí na Jehova gloria i fortalesa.” (Salmo 96:7) E secreto di felicidad den famia ta ser hañá den e Palabra di Dios, Bijbel, i den aplicá su principionan. Un famia cu ta aplicá e principionan aki lo ta felis i lo disfrutá di pas divino. P’esei, laga nos considerá cuater dje principionan importante aki.
16. Ki papel dominio propio mester hunga den bida di famia?
16 Un dje principionan aki ta basá riba esaki: Dominio propio ta vital pa pas divino den bida di famia. Rey Sálomon a bisa: “Manera un stad cu a ser invadí, cu no tin muraya, asina ta e hende cu no tin freno pa su spiritu.” (Proverbionan 25:28) Frena nos spiritu—ehercé dominio propio—ta vital si nos ta deseá di tin un famia felis i na pas. Aunke nos ta imperfecto, nos tin cu ehercé dominio propio, cua ta un fruta dje spiritu santu di Dios. (Romanonan 7:21, 22; Galationan 5:22, 23) E spiritu lo producí dominio propio den nos si nos pidi den oracion p’e cualidad aki, aplicá conseho bíblico tocante dje, i asociá cu otro personanan cu ta manifest’é. E curso aki lo yuda nos “hui di fornicacion.” (1 Corintionan 6:18) Tambe dominio propio lo yuda nos rechasá violencia, evitá of vence alcoholismo i trata mas calmu cu situacionnan difícil.
17, 18. (a) Con 1 Corintionan 11:3 ta aplicá na bida di famia cristian? (b) Con reconociendo hefatura ta promové pas divino den un famia?
17 Un otro principio esencial por ser declará den e manera aki: Reconocimentu di hefatura lo yuda nos sigui tras di pas divino den nos famia. Pablo a skirbi: “Mi kier pa boso sa cu e cabes di tur homber ta e Cristo; en buelta e cabes di un muher ta e homber; en buelta e cabes di e Cristo ta Dios.” (1 Corintionan 11:3) Esaki ta nificá cu un homber ta hiba delantera den e famia, cu su esposa ta apoy’é lealmente, i cu e yunan ta obediente. (Efesionan 5:22-25, 28-33; 6:1-4) Conducta asina siguramente lo promové pas divino den bida di famia.
18 Un esposo cristian tin cu corda cu hefatura bíblico no ta nificá dictadura. E tin cu imitá Jesus, su Cabes. Aunke Jesus mester tabata “cabes riba tur cos,” el “a bini, no pa ser sirbí, sino pa sirbi.” (Efesionan 1:22; Mateo 20:28) Den un manera similar, un homber cristian ta ehercé hefatura den un manera amoroso cu ta permitié cuida e interesnan di su famia bon. I siguramente un esposa cristian kier cooperá cu su esposo. Como su “yudante” i “complemento,” e ta suministrá cualidadnan cu su esposo ta falta i ta dun’é asina e apoyo necesario. (Génesis 2:20; Proverbionan 31:10-31) Eherciendo hefatura di un manera apropiado ta yuda esposo i esposa trata otro cu respet i ta motivá yunan pa ta obediente. Sí, reconociendo hefatura ta promové pas divino den bida di famia.
19. Pakico bon comunicacion ta esencial pa pas i felicidad den famia?
19 Un di tres principio importante por ser expresá den e palabranan aki: Bon comunicacion ta vital pa pas i felicidad den famia. Santiago 1:19 ta bisa nos: “Tur hende mester ta lihé pa tende, slow pa papia, slow pa rabia.” Miembronan di famia tin cu scucha i papia cu otro pasobra comunicacion den famia ta un caminda di dos direccion. Sin embargo, asta ora loke nos ta bisa ta berdad, ta probabel cu lo e haci mas daño cu bon si nos ta expres’é den un manera cruel, orguyoso of insensibel. Nos abla mester ta agradabel, “sasoná cu salu.” (Colosensenan 4:6) Famianan cu ta sigui principionan bíblico i ta comunicá bon ta siguiendo tras di pas divino.
20. Pakico lo bo bisa cu amor ta esencial pa pas den famia?
20 Un di cuater principio ta esaki: Amor ta esencial pa pas i felicidad den famia. Amor romántico por hunga un rol importante den matrimonio, i cariño profundo por desaroyá entre miembronan di un famia. Pero asta mas importante ta e amor cu e palabra griego a·gaʹpe ta denotá. Esaki ta e amor cu nos ta cultivá pa Jehova, pa Jesus i pa nos próhimo. (Mateo 22:37-39) Dios a demostrá e amor aki pa humanidad dor di duna “su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Ta ki maraviyoso cu nos por manifestá e mésun clase di amor pa nos miembronan di famia! E amor elevá aki ta “un laso perfecto di union.” (Colosensenan 3:14) E ta mara un pareha casá na otro i ta motivá nan pa haci loke ta mihó pa otro i pa nan yunan. Ora situacionnan difícil presentá, amor ta yuda nan atendé asuntunan unidamente. Nos por ta sigur di esaki pasobra “amor . . . no ta busca su mes interes . . . E ta soportá tur cos, ta kere tur cos, ta spera tur cos, ta wanta tur cos. Amor nunca ta faya.” (1 Corintionan 13:4-8) En berdad, felis ta famianan den cua amor pa Jehova ta haci e amor un pa otro mas fuerte!
Sigui Continuamente Tras di Pas Divino
21. Kico probablemente lo aumentá e pas i felicidad di bo famia?
21 E principionan mencioná anteriormente i otronan sacá for di Bijbel ta ser describí den publicacionnan cu Jehova a percurá bondadosamente mediante “e esclabo fiel i discreto.” (Mateo 24:45) Por ehempel, informacion asina ta ser hañá den e buki di 192 página E Secreto pa Felicidad den Famia, presentá n’e Congreso di Distrito “Mensaheronan di Pas Divino” di Testigonan di Jehova tené rond mundu na 1996/1997. Studio personal i di famia dje Scritura cu yudansa di un publicacion asina por resultá den hopi beneficio. (Isaías 48:17, 18) Sí, aplicando conseho bíblico probablemente lo aumentá e pas i felicidad di bo famia.
22. Rond di kico nos bida di famia mester drei?
22 Jehova tin cosnan maraviyoso reservá pa famianan cu ta haci su boluntad, i e ta merecé nos alabansa i sirbishi. (Revelacion 21:1-4) P’esei, laga bo bida di famia drei rond dje adoracion dje Dios berdadero. I cu nos amoroso Tata celestial, Jehova, bendicioná bo ricamente cu felicidad segun cu bo ta sigui tras di pas divino den bo bida di famia!
Con Lo Bo Contestá?
◻ Kico ta necesario si famianan kier biba cu debocion piadoso?
◻ Pakico tin un crísis di famia awe?
◻ Kico ta e secreto di felicidad den famia?
◻ Kico ta algun principio cu lo yuda nos promové pas i felicidad den bida di famia?
[Plachi na página 24]
Bon comunicacion ta yuda nos sigui tras di pas divino den bida di famia