Sigurá un Futuro Duradero pa Bo Famia

1. Kico tabata Jehova su propósito p’e areglo di famia?

ORA Jehova a uni Adam i Eva den matrimonio, Adam a expresá su goso dor di pronunciá e poesia hebreo di mas antiguo. (Génesis 2:22, 23) Sin embargo, e Creador tabatin mas na mente cu meramente trece placer pa su yunan humano. E tabata kier pa parehanan casá i famianan haci su boluntad. El a bisa e promé pareha: “Sea fructífero i bira hopi i yena e tera i domin’é, i tene dominio riba piscá di laman i riba criatura bulador di shelu i riba tur criatura bibiente cu ta move riba tera.” (Génesis 1:28) Ki un asignacion magnífico i recompensador esei tabata! Con contentu nan i nan futuro yunan lo mester tabata si Adam i Eva a cumpli cu Jehova su boluntad den pleno obedencia!

2, 3. Con famianan por haña e mayor felicidad awe?

² Awe, tambe, famianan ta mas felis ora nan traha huntu pa haci Dios su boluntad. Apostel Pablo a skirbi: “Debocion piadoso ta beneficioso pa tur cos, pasobra e ta encerá promesa dje bida awor i di esun pa bini.” (1 Timoteo 4:8) Un famia cu ta biba cu debocion piadoso i ta sigui Jehova su guia manera e ta skirbí den Bijbel lo haña felicidad den “e bida awor.” (Salmo 1:1-3; 119:105; 2 Timoteo 3:16) Asta si un solo miembro di famia aplicá principionan bíblico, e situacion ta mas mihó cu si ningun haci esei.

³ E buki aki a considerá hopi principio bíblico cu ta contribuí na felicidad den famia. Probablemente bo a ripará cu algun principio ta aparecé repetidamente den e buki. Pakico? Pasobra nan ta representá berdadnan poderoso cu ta beneficiá tur hende den vários aspecto di bida di famia. Un famia cu ta haci esfuerso pa aplicá e principionan bíblico aki ta haña cu debocion piadoso realmente ta ‘encerá e promesa di bida awor.’ Laga nos considerá atrobe cuater dje principionan importante ei.

E BALOR DI DOMINIO PROPIO

4. Pakico dominio propio ta vital den un matrimonio?

⁴ Rey Sálomon a bisa: “Manera un stad cu a ser invadí, cu no tin muraya, ta e hende cu no tin freno pa su spiritu.” (Proverbionan 25:28; 29:11) ‘Frenando bo spiritu,’ eherciendo dominio propio, ta vital pa esnan cu kier un matrimonio felis. Entregá na emocionnan destructivo, manera rabia of pasionnan inmoral, lo causa daño cu ta tuma añanan pa drecha—si e por ser drechá mes.

5. Con un hende imperfecto por cultivá dominio propio, i cu ki beneficionan?

⁵ Naturalmente, ningun desendiente di Adam por dominá completamente su carni imperfecto. (Romanonan 7:21, 22) Sin embargo, dominio propio ta un fruta di spiritu. (Galationan 5:22, 23) P’esei, Dios su spiritu lo producí dominio propio den nos si nos haci oracion p’e cualidad aki, si nos aplicá e conseho oportuno cu ta ser hañá den e Scritura, i si nos asociá cu otronan cu ta manifest’é i ta evitá esnan cu no ta hacié. (Salmo 119:100, 101, 130; Proverbionan 13:20; 1 Pedro 4:7) Un curso asina lo yuda nos “hui di fornicacion,” asta ora nos ta ser tentá. (1 Corintionan 6:18) Nos lo rechasá violencia i lo evitá of vence alcoholismo. I nos lo trata mas calmu cu provocacionnan i situacionnan difícil. Laga—incluso yunan—siña cultivá e fruta di spiritu vital aki.—Salmo 119:1, 2.

UN PUNTO DI BISTA CORECTO DI HEFATURA

6. (a) Cua ta e areglo divinamente establecí di hefatura? (b) Kico un homber mester corda si e kier pa su hefatura trece felicidad na su famia?

⁶ E di dos principio importante ta reconocimentu di hefatura. Pablo a describí e ordu corecto di cosnan ora el a bisa: “Mi kier pa boso sa cu e cabes di tur homber ta Cristo; en buelta e cabes di un muher ta e homber; en buelta e cabes di Cristo ta Dios.” (1 Corintionan 11:3) Esaki ta nificá cu un homber ta hiba delantera den e famia, su esposa lealmente ta duna apoyo, i e yunan ta obediente na nan mayornan. (Efesionan 5:22-25, 28-33; 6:1-4) Sin embargo, ripará cu hefatura ta hiba na felicidad solamente ora e ta ser tratá den un manera corecto. Esposonan cu ta biba cu debocion piadoso sa cu hefatura no ta dictadura. Nan ta imitá Jesus, nan Cabes. Aunke Jesus mester tabata “cabes riba tur cos,” el “a bini, no pa ser sirbí, sino pa sirbi.” (Efesionan 1:22; Mateo 20:28) Den un manera similar, un homber cristian ta ehercé hefatura, no pa beneficiá su mes, sino pa cuida e interesnan di su esposa i yunan.—1 Corintionan 13:4, 5

7. Cua principionan bíblico lo yuda un esposa cumpli cu su rol cu Dios a asigná na dje den famia?

⁷ Di su parti, e esposa cu ta biba cu debocion piadoso no ta competí cu su esposo ni ta busca pa domin’é. E ta contentu pa apoyá su esposo i pa cooperá cuné. Bijbel ta papia tin biaha dje esposa como siendo un “propiedad” di su esposo, lagando ningun duda cu e esposo ta su cabes. (Génesis 20:3) Mediante matrimonio e ta bini bou dje “ley di su esposo.” (Romanonan 7:2) Na mésun tempu, Bijbel ta yam’é un “yudante” i “un complemento.” (Génesis 2:20) E ta agregá cualidadnan i abilidadnan cu su esposo ta falta, i ta dun’é e apoyo necesario. (Proverbionan 31:10-31) Bijbel ta bisa tambe cu un esposa ta un “socio,” unu cu ta traha lado a lado cu su casá. (Malakías 2:14) E principionan bíblico aki ta yuda un esposo i un esposa pa comprendé otro su posicion i pa cada un trata e otro cu debido respet i dignidad.

‘SEA LIHE PA TENDE’

8, 9. Splica algun principio cu lo yuda tur den e famia pa mehorá nan abilidadnan di comunicá.

⁸ Den e buki aki, e necesidad pa comunicacion ta ser resaltá frecuentemente. Pakico? Debí cu ta mas fácil pa resolvé problema ora hende ta papia cu otro i realmente ta scucha otro. Repetidamente a ser enfatisá cu comunicacion ta un intercambio di palabranan. Disipel Santiago a expres’é e manera aki: “Tur hende mester ta lihé pa tende, slow pa papia.”—Santiago 1:19.

⁹ Ta importante tambe pa ser cauteloso en cuanto con nos ta papia. Palabranan papiá muchu purá, pa busca pleitu, of severamente crítico no ta constituí comunicacion exitoso. (Proverbionan 15:1; 21:9; 29:11, 20) Asta ora loke nos ta bisa ta corecto, si e ta ser expresá den un manera cruel, orguyoso of insensitivo, ta probabel cu lo e haci mas daño cu bon. Nos abla mester ta di bon gustu, “sazoná cu salu.” (Colosensenan 4:6) Nos palabranan mester ta manera “apel di oro den obra grabá di plata.” (Proverbionan 25:11) Famianan cu siña comunicá bon a dal un paso grandi den direccion di logra felicidad.

E ROL VITAL DI AMOR

10. Cua clase di amor ta vital den matrimonio?

¹⁰ E palabra “amor” ta aparecé bes tras bes den henter e buki aki. Bo ta corda e clase di amor cu a referí principalmente na dje? Ta cierto cu amor romántico (na griego, eʹros) ta hunga un rol importante den matrimonio, i den matrimonionan exitoso, cariño profundo i amistad (fi·liʹa) ta crece entre un esposo i un esposa. Pero asta mas importante ta e amor representá dor dje palabra griego a·gaʹpe. Esaki ta e amor cu nos ta cultivá pa Jehova, pa Jesus, i pa nos próhimo. (Mateo 22:37-39) Ta e amor cu Jehova ta expresá pa cu humanidad. (Juan 3:16) Ki maraviyoso cu nos por mustra e mésun clase di amor pa nos casá i yunan!—1 Juan 4:19.

11. Con amor ta obra p’e beneficio di un matrimonio?

¹¹ Den matrimonio e amor elevá aki ta berdaderamente “un laso perfecto di union.” (Colosensenan 3:14) E ta mara un pareha huntu i ta pone cu nan kier haci loke ta mihó pa otro i pa nan yunan. Ora famianan ta enfrentá situacionnan difícil, amor ta yuda nan pa trata cu cosnan unidamente. Segun cu un pareha ta bira mas bieu, amor ta yuda nan pa apoyá i sigui apreciá otro. “Amor . . . no ta busca su mes interes. . . . E ta soportá tur cos, ta kere tur cos, ta spera tur cos, ta wanta tur cos. Amor nunca ta faya.”—1 Corintionan 13:4-8.

12. Pakico amor pa Dios di parti di un pareha casá ta fortalecé nan matrimonio?

¹² E union matrimonial ta specialmente fuerte ora e ta ser seyá no djis dor di amor entre casá pero principalmente dor di amor pa Jehova. (Eclesiástes 4:9-12) Pakico? Wel, apostel Juan a skirbi: “Esaki ta loke e amor di Dios ta nificá, cu nos ta warda su mandamentunan.” (1 Juan 5:3) Pues, un pareha mester entrená nan yunan den debocion piadoso no simplemente debí cu nan ta stima nan yunan profundamente sino pasobra esaki ta e mandamentu di Jehova. (Deuteronomio 6:6, 7) Nan mester evitá inmoralidad no solamente pasobra nan ta stima otro pero principalmente debí cu nan ta stima Jehova, kende “lo husga fornicador i adúlteronan.” (Hebreonan 13:4) Asta si un casá ta causa problemanan serio den un matrimonio, amor pa Jehova lo conmové e otro casá pa continuá siguiendo principionan bíblico. Felis, en berdad, ta e famianan ei den cua amor un pa otro ta ser fortalecí dor di amor pa Jehova!

E FAMIA CU HACI DIOS SU BOLUNTAD

13. Con un determinacion pa haci e boluntad di Dios lo yuda individuonan pa sigui enfocá riba e cosnan berdaderamente importante?

¹³ Un cristian su bida completo ta centralisá riba haci e boluntad di Dios. (Salmo 143:10) Esaki ta loke debocion piadoso realmente kier men. Haciendo e boluntad di Dios lo yuda famianan pa mantené nan bista riba e cosnan berdaderamente importante. (Filipensenan 1:9, 10) Por ehempel, Jesus a spierta: “Mi a bini pa causa division, i un homber lo ta contra su tata, i un yu muher contra su mama, i un esposa hóben contra su suegra. En berdad, enemigu di un hende lo ta personanan di su mes cas.” (Mateo 10:35, 36) Manera Jesus a spierta, hopi di su siguidornan a ser persiguí dor di miembronan di famia. Ki un situacion tristu i penoso! No obstante, lasonan familiar no mester pisa mas cu nos amor pa Jehova Dios i pa Jesucristo. (Mateo 10:37-39) Si un persona perseverá apesar di oposicion di famia, e opositornan por cambia ora nan mira e bon resultadonan di debocion piadoso. (1 Corintionan 7:12-16; 1 Pedro 3:1, 2) Asta si esei no sosodé, no ta obtené ningun beneficio duradero dor di stop di sirbi Dios pa motibu di oposicion.

14. Con un deseo pa haci e boluntad di Dios lo yuda mayornan actua den e mihó interes di nan yunan?

¹⁴ Haciendo e boluntad di Dios ta yuda mayornan tuma decisionnan corecto. Por ehempel, den algun comunidad mayornan tin e tendencia pa considerá yunan como un inversion, i nan ta dependé riba nan yunan pa percurá pa nan den nan behes. Aunke ta corecto pa yunan adulto cuida nan mayornan di edad avansá, un punto di bista asina no mester haci e mayornan influenciá nan yunan pa busca un estilo di bida materialístico. Mayornan no ta haci nan yunan ningun fabor si nan cria nan pa balorá posesionnan material mas cu cosnan spiritual.—1 Timoteo 6:9.

15. Con Timoteo su mama, Eunice, tabata un excelente ehempel di un mayor cu a haci e boluntad di Dios?

¹⁵ Un ehempel excelente den esaki ta Eunice, mama di Pablo su amigu hóben Timoteo. (2 Timoteo 1:5) Aunke e tabata casá cu un persona no-creyente, Eunice, huntu cu Timoteo su wela Loida, exitosamente a cria Timoteo pa sigui tras di debocion piadoso. (2 Timoteo 3:14, 15) Ora Timoteo tabata suficiente grandi, Eunice a permitié bandoná cas i drenta den e trabou di predicacion di Reino como Pablo su compañero misionero. (Echonan 16:1-5) Ki emocioná Eunice lo mester tabata ora su yu homber a bira un misionero sobresaliente! Su debocion piadoso como un adulto a reflehá bon riba su entrenamentu anterior. Siguramente, Eunice a haña satisfaccion i goso den tende informenan di Timoteo su ministerio fiel, maske probablemente el a sinti falta di dje na cas.—Filipensenan 2:19, 20.

E FAMIA I BO FUTURO

16. Como un yu homber, ki preocupacion apropiado Jesus a demostrá, pero kico tabata su obhetivo principal?

¹⁶ Jesus a ser criá den un famia piadoso i, como un adulto, a mustra e preocupacion apropiado di un yu homber pa su mama. (Lucas 2:51, 52; Juan 19:26) Sin embargo, Jesus su obhetivo principal tabata pa cumpli cu Dios su boluntad, i p’e esaki a incluí habriendo e caminda pa hende disfrutá di bida eterno. Esaki el a haci ora el a ofrecé su bida humano perfecto como un rescate pa humanidad pecaminoso.—Marco 10:45; Juan 5:28, 29.

17. Ki prospecto glorioso Jesus su curso fiel a habri pa esnan cu haci e boluntad di Dios?

¹⁷ Despues di Jesus su morto, Jehova a lant’é na bida celestial i a dun’é gran autoridad, cu tempu instaland’e como Rey den e Reino celestial. (Mateo 28:18; Romanonan 14:9; Revelacion 11:15) Jesus su sacrificio a haci posibel pa algun hende por ser scogé pa goberná cuné den e Reino ei. Esei a habri e caminda tambe p’e resto di humanidad di curason recto disfrutá di bida perfecto riba un tera restorá na condicionnan paradísico. (Revelacion 5:9, 10; 14:1, 4; 21:3-5; 22:1-4) Un di e privilegionan mas grandi cu nos tin awe ta di conta nos próhimo dje bon nobo glorioso.—Mateo 24:14.

18. Ki recordatorio i ki animacion ta ser duná tantu na famianan como na individuonan?

¹⁸ Manera apostel Pablo a mustra, hibando un bida di debocion piadoso ta encerá e promesa cu hende por heredá e bendicionnan ei den e bida “pa bini.” Siguramente, esaki ta e manera di mas mihó pa haña felicidad! Corda, “e mundu ta pasando forbij i tambe su deseo, pero esun cu ta haci e boluntad di Dios ta permanecé pa semper.” (1 Juan 2:17) P’esei, sea bo ta un yu of un mayor, un esposo of un esposa, of un adulto soltero cu of sin yu, haci esfuerso pa haci e boluntad di Dios. Asta ora bo ta bou di presion of ta enfrentá dificultadnan extremo, nunca lubidá cu bo ta un sirbidor dje Dios bibu. Pues, laga bo accionnan trece goso pa Jehova. (Proverbionan 27:11) I laga bo conducta resultá den felicidad pa bo awor i bida eterno den e mundu nobo binidero!