INFORME DI PROCLAMADOR DI REINO

Firmeza ta resulta den recompensa ricu

JESÚS a profetiza cu sigidor di dje lo ser persigí, i apóstol Pablo també, segun cu 2 Timoteo 3:12 ta bisa: “Realmente, tur hende cu kier biba cu debocion piadosa den asociacion cu Cristo Jesús lo ser persigí també.” Pero, firmeza den e sirbishi di Jehova Dios ta resulta den recompensa ricu.

◻ Esei tabata cierto den un pueblo na costa di nortoost di Malasia. Aunque un tata tabata un budista firme cu a dicta severamente na su yiunan, e no por a preveni su tres yiu muher i tres yiu homber di studia e Bijbel cu Testigo di Jehova. Asta su esposa a mustra interés den e berdad. Anto un dia un beciña a tene mofa di dje: “Con bo por perde control di bo yiunan i láganan bira Testigo di Jehova? Tur mi yiunan ta pega na mi i nos religion budista tradicional. Bo ta lastimoso!”

E tata a bai cas purá i a amenazá di zuta Testigo di Jehova cu tabata conduci estudio cu su yiunan. Pero, e yiunan a calmé i a sigi studia e Bijbel cu Testigo di Jehova i asisti na reunion cu e apoyo di nan mama.

Sin embargo, pa caba, e tata a yama tur e famía dilanti dje. El a exigi: “Scoge entre ami i bibando den mi cas of bira cristian i bandona e cas.” E yiu mayor, un mucha homber cu boz suave, a cuminza paketa pa bandona e cas. E tata a grita: “No! Siendo cu boso tur ta yiu rebelde, mihor mi muri.” Anto a sali for di cas purá, cu su famía tras di dje cu a rogué pa no mata su curpa. Impresioná cu nan rogamento, el a bai cas.

Tempo a pasa. E tata a cuminza tuma nota dje bon efecto di e berdad bíblico riba e conducta di su yiunan. Un dia el a contra cu su amigo mofador, cu awor tabata un homber basta tristu, cu a bisa: “Mi ta keda mashá desilusioná cu mi yiunan. Nan ta gañámi i ta hortámi.” Pero e tata dje yiunan cu tabata studia cu Testigo di Jehova a bisa: “O, mi yiunan ta otro! Nan ta tratámi cu bondad i asta a yudámi paga mi debe riba mi auto ora mi tabata sin trabao.”

Awe, e tres yiu muher i e mama ta bautizá. Un yiu homber ta pionero special. I e tata rabiá cu tabata budista firme? Awor e ta cariñoso i a asisti na Memorial.

Jehova Dios a recompensá e yiu homber i su tres ruman muher i també nan mama pa nan firmeza pa cu Dios. Awor nan ta celoso predicador di Reino, haciendo e curazón di Jehova Dios alegrá.—Proverbio 27:11.