E Parlamento di Religion di Mundo

E Tabatin Bon Éxito?

CIENTOS di lider religioso a reuni den e segundo Parlamento di Religion di Mundo celebrá den Chicago, Illinois, E.U.A., den berano di 1993. Budismo, cristiandad, hinduísmo, hudaísmo, i islam tabatin representante. Hacidor di bruha i adorador di diosa també tabatin representante. Nan a considera nan papel den e ponimento di fin na gera. E presidente dje parlamento a admiti cu “dos tercera parti di conflicto principal den e mundo djawe tin relacion religioso.”

Cien aña pasá

E parlamento a goza bon éxito? Tira un bista riba loke a pasa cien aña pasá den e promé Parlamento di Religion di Mundo. Nan a celebra esei també den Chicago, den berano di 1893, i mas cu 40 religion tabatin representante. E Concilio pa un Parlamento di Religion di Mundo ta admiti cu esnan cu a asisti na 1893 “a kere cu esei lo ser e promé di un serie di reunion di union di religion internacional cu por contribui na comprendimento, paz i progreso. Esei no a sosode. Intolerancia religioso i violencia tabata parti di gera dje pasado 100 aña, i ta sigi asina awe.” Pakico e fracaso? Pasobra Dios no ta aproba dje concepto mes di union di religion. E Bijbel ta bisa: “No bira uní bao di yugo desigual cu hende no creyente.”​—⁠2 Corintio 6:​14-17.

Apropiadamente, e número di Zion’s Watch Tower di September di 1893 a enfatizá e falta di apoyo bíblico dje Parlamento di Religion di Mundo ora el a bisa, sin ningun indicacion di sarcasmo: “[Arqueólogo] a descubrí hopi maraviyoso cilínder di clei horná den resto di Babilonia i otro stad di antigua, pero tin algun cu nan no a haya ainda. . . . Nan no a haya ningun cu a mencioná cu Moisés i Hosué a reuni un ‘Parlamento di Religion,’ di moabita i ammonita, i edomita . . . Nan no a haya ningun cu ta menciona cu e homber fiel i sabí, Samuel, a manda na Gat i Ekron pa reuni un delegacion di sacerdote di Dagón pa bini na Siló pa tene un conferencia cu sacerdote di Jehova . . . Nan no a haya ningun cu ta mencioná cu e sabí, Elías, cu su faha di cuero, a propone un ‘congreso’ cu sacerdote di Baal i Moloc pa un siman di consideracion di siñanza di nan religion respectivo, afin di promove respet mutuo pe religion di otro.”

E Reino di Dios​—⁠e único speranza

E Parlamento di Religion di Mundo lo no goza bon éxito. Curant i delegado ta usa palabra tal como “caos,” “desordu,” i “confusion extremo” en relacion cu e parlamento. Segun un informe, asta e poliz tabata enbolbí den e calmamento di dos disturbio cu desunion político a causa. Den un documento di 1952, e parlamento a mencioná como un propósito di dje: “Pa establece un Parlamento Mundial di Religion permanente pa traha cu NACION UNÍ pa alcanza paz mundial i comprendimento entre tur pueblo.” Na contraste, Jesús a bisa cu su Reino no ta parti di mundo. E Bijbel ta siñala ne Reino di Dios como e único solucion pa problema di humanidad.​—⁠Daniel 2:44; Juan 18:⁠36. ◆