E Cena di Señor Cu Cuantu Frecuencia Mester Celebr’é Observ’é?

PASCU di Nacimentu, Pascu di Resureccion, dianan di “santunan.” Iglesianan di cristiandad ta celebrá hopi dia di fiesta. Pero bo sa cuantu celebracion Jesucristo a manda su siguidornan pa observá? E contesta ta, Solamente un! Ningun dje otro fiestanan a ser autorisá p’e Fundador di cristianismo.

Claramente, si Jesus a instituí solamente un celebracion, e ta masha importante. Cristiannan mester celebr’é exactamente manera Jesus a manda. Kico tabata e único observancia aki?

E Unico Celebracion

E observancia aki a ser introducí dor di Jesus rib’e dia cu el a muri. El a conmemorá e fiesta hudiu di Pascu huntu cu su apostelnan. Anto el a pasa algun dje pan di Pascu sin zuurdeeg na nan, bisando: “Esaki ta nificá mi curpa cua lo ser duná na fabor di boso.” Despues, Jesus a pasa un copa di biña, bisando: “E copa aki ta nificá e pacto nobo pa birtud di mi sanger, cua lo ser dramá na fabor di boso.” Tambe el a bisa: “Sigui haci esaki na mi recuerdo.” (Lucas 22:​19, 20; 1 Corintio 11:​24-26) E observancia aki ta ser yamá e Cena di Señor, of e Memorial. E ta e único celebracion cu Jesus a manda su siguidornan pa observá.

Hopi iglesia ta pretendé cu nan ta tene e observancia aki huntu cu tur nan otro fiestanan, pero mayoria no ta conmemor’é n’e manera cu Jesus a manda. Kisas e diferencia mas notabel ta e frecuencia dje celebracion. Algun iglesia ta celebr’é tur luna, tur siman, asta tur dia. Esei ta loke Jesus tabata kier men ora el a bisa su siguidornan: “Sigui haci esaki na mi recuerdo”? The New English Bible ta bisa: “Haci esaki como memorial di mi.” (1 Corintio 11:​24, 25) Cu ki frecuencia un memorial of un aniversario ta ser observá? Generalmente, solamente un bes pa aña.

Corda tambe, cu Jesus a cuminsá e observancia aki i despues a muri riba e fecha dje calender hudiu di 14 di Nisan.a Esei tabata e dia di Pascu [hudiu], un festival cu a recordá e hudiunan dje gran liberacion cu nan a experenciá na Egipto den siglo 16 P.E.C. N’e tempu ei e sacrificio di un lamchi a resultá den e salbacion dje primogénitonan hudiu, miéntras e angel di Jehova a mata tur e primogénitonan di Egipto.​—⁠Éxodo 12:​21, 24-27.

Con esaki ta yuda nos comprendimentu? Wel, apostel cristian Pablo a skirbi: “Cristo nos pascu a ser sacrificá.” (1 Corintio 5:⁠7) E morto di Jesus tabata un sacrificio di Pascu mas grandi, dunando humanidad e oportunidad pa un salbacion muchu mas grandi. P’esei, pa hende cristian, e Memorial dje morto di Cristo a reemplasá e Pascu hudiu.​—⁠Juan 3:16.

E Pascu hudiu tabata un celebracion anual. Lógicamente, anto, e Memorial tambe ta. E Pascu hudiu​—⁠e dia cu Jesus a muri​—⁠semper a cai riba dia 14 dje luna hudiu Nisan. P’esei, e morto di Cristo mester ser recordá un biaha pa aña rib’e dia di calender cu ta corespondé cu 14 di Nisan. Den 1994 e dia ei ta djasabra, 26 di mart, despues cu solo baha. Pero, pakico e iglesianan di cristiandad no a haci esaki un dia pa observancia special? Un bistaso breve den historia lo contestá e pregunta ei.

Custumber Apostólico den Peliger

No tin duda cu durante e promé siglo E.C., esnan guiá p’e apostelnan di Jesus a celebrá e Cena di Señor exactamente manera el a manda. Sin embargo, durante e di dos siglo, algun a cuminsá cambia e tempu di su conmemoracion. Nan a tene e Memorial rib’e promé dia di siman (yamá awor djadumingu), no riba e dia cu a corespondé cu 14 di Nisan. Pakico nan a haci esei?

P’e hudiunan, un dia a cuminsá rond di seis ’or di atardi i a core te n’e mésun ora e siguiente dia. Jesus a muri dia 14 di Nisan, 33 E.C., cua a core for di djahuebs atardi te djabierne atardi. El a ser resucitá rib’e di tres dia, djadumingu mainta trempan. Algun persona kier a observá e conmemoracion di Jesus su morto riba un dia fiho di siman cada aña, en bes di riba e dia riba cua 14 di Nisan a cai. Tambe nan a considerá e dia dje resureccion di Jesus como mas importante cu esun di su morto. P’esei nan a scoge djadumingu.

Jesus a manda pa recordá su morto, no su resureccion. I siendo cu e Pascu hudiu ta cai riba un dia diferente cada aña segun e calender gregoriano cu nos ta usa awor, ta solamente natural pa mescos ta cierto dje Memorial. P’e motibu ei, hopi hende a pega n’e areglo original i a observá e Cena di Señor dia 14 di Nisan cada aña. Cu tempu nan a yega di ser yamá e cuartodécimonan, nificando e “di diescuaternan.”

Algun escolástico a admití cu e “di diescuaternan” aki tabata siguiendo e patronchi apostólico original. Un historiador a bisa: “En cuanto e dia pa observá e Pascha [e Cena di Señor], e uso dje iglesianan cuartodécimo di Asia tabata idéntico cu esun dje iglesia di Jerusalem. Den e di dos siglo e iglesianan aki na nan Pascha dia 14 di Nisan a conmemorá e rescate cu e morto di Cristo a efectuá.”​—⁠Studia Patristica, Volúmen V, 1962, página 8.[1]

Un Disputa Ta Crece

Miéntras hopi hende den Asia Menor a sigui e práctica apostólico, djadumingu a ser apartá pa observancia na Roma. Rond di aña 155 E.C., Policarpo di Smirna, un representante dje congregacionnan asiático, a bishitá Roma pa discutí esaki i otro problemanan. Desafortunadamente, no a logra ningun acuerdo rib’e asuntu aki.

Ireneo di Lions a skirbi den un carta: “Anicetus [di Roma] no por a convencé Policarpo pa no observá loke semper el a observá huntu cu Juan e disipel di nos Señor i e otro apostelnan cu ken el a asociá; ni tampoco Policarpo a convencé Anicetus ainda pa observ’é, pasobra Anicetus a bisa cu e mester pega n’e custumber dje ancianonan promé cuné.” (Eusebius, Buki 5, capítulo 24) Nota cu Policarpo segun informe a basa su posicion rib’e autoridad dje apostelnan, miéntras cu Anicetus a apelá n’e custumber dje ancianonan cu a biba promé cuné na Roma.

E disputa aki a intensificá cerca e fin di siglo dos E.C. Rond di aña 190 E.C., un tal Victor a ser elegí como obispu di Roma. El a haña cu mester a observá e Cena di Señor riba un djadumingu i el a busca apoyo di mas tantu otro lider cu ta posibel. Victor a pone presion rib’e congregacionnan asiático pa nan cambia p’e areglo di djadumingu.

Contestando na nomber di esnan na Asia Menor, Polycrates di Efeso a nenga di cede n’e presion aki. El a bisa: “Nos ta observá e dia sin konkel cuné, sin kita sin pone.” Anto el a mencioná hopi autoridad, incluyendo apostel Juan. El a afirmá: “Esakinan tur, a observá e di diescuater dia p’e Pascha conforme cu e Evangelio, sin desviá absolutamente for di dje.” Polycrates a agregá: “Ami di mi parti, rumannan, . . . no ta spanta pa menasa. Pasobra esnan mihó cu mi [e apostelnan] a bisa, Nos mester obedecé Dios mas bien cu hende.”​—⁠Eusebius, Buki 5, capítulo 24.

Victor tabata disgustá cu e contesta aki. Un obra histórico ta bisa cu el “a scomulgá tur e Iglesianan asiático, i a manda su comunicadonan cartanan circulario na tur Iglesia cu tabatin mésun opinion cuné, cu nan no tabatin mag di tene comunion cu nan.” Sin embargo, “e acto imprudente i frescu aki di dje no a cai den bon tera cerca tur e hombernan sabí i sincero di su mes partido, varios di cua a skirbi’é di un manera skerpi, consehand’e . . . p’e preservá amor, unidad i pas.”​—⁠Antiquities of the Christian Church di Bingham, Buki 20, capítulo 5.[4]

Apostasia Organisá

Apesar di tal protesta, e cristiannan den Asia Menor a bira mas isolá riba e cuestion di na ki tempu pa celebrá e Cena di Señor. Variacionnan gradualmente a gatia drenta tur caminda. Algun persona a celebrá henter e periodo for di 14 di Nisan te e siguiente djadumingu. Otronan tabata celebrá e ocasion mas frecuentemente​—⁠semanalmente riba djadumingu.

Na 314 E.C. e Concilio di Arles (Francia) a purba forsa e areglo romano i sofocá cualkier alternativa. E sobrá cuartodécimonan a nenga di bai di acuerdo. Afin di resolvé esaki i otro asuntunan cu tabata dividiendo e supuesto cristiannan den su imperio, na 325 E.C. e emperador pagano Constantino a convocá un asamblea ecuménico, e Concilio di Nicea. El a emití un decreto cu a instruí tur persona na Asia Menor pa ahustá n’e custumber romano.

Ta interesante pa nota un dje argumentonan principal cu nan a usa pa bandoná e observancia dje Memorial di morto di Cristo segun e fecha rib’e calender hudiu. A History of the Christian Councils, di K. J. Hefele, ta bisa: “A ser declará cu tabata particularmente indigno pa esaki, e festival di mas santu cu tur, sigui e custumber (e calculacion) dje hudiunan, kendenan a susha nan mannan cu e crímen di mas spantoso, i kendenan nan mente a ser ciegá.” (Volúmen 1, página 322) Pa ta den un posicion asina a ser considerá como un “ ‘sumision humiyante’ n’e Snoa locual a iritá e Iglesia,” segun J. Juster, citá den Studia Patristica, Volúmen IV, 1961, página 412.

Esei tabata anti-semitismo [discriminacion contra hudiu]! Esnan cu a celebrá e Memorial di Jesus su morto rib’e mésun dia cu el a muri a ser considerá como hudaista. Nan a lubidá cu Jesus mes tabata un hudiu i cu el a duna e dia su nificacion dor di ofrecé e dia ei su bida na fabor di humanidad. Djei en adelante, e cuartodécimonan a ser censurá como apóstatanan i separatistanan i a ser persiguí. E Concilio di Antiokia na 341 E.C. a decretá pa nan ser scomulgá. Sin embargo, ainda tabatin hopi di nan na 400 E.C., i nan a sigui existí den gruponan chikitu hopi tempu despues.

Desde e dianan ei, cristiandad a keda sin regresá n’e areglo original di Jesus. Profesor William Bright a admití: “Ora un dia special, Bierne Santu, a ser dedicá n’e conmemoracion dje ‘Pasion’ [sufrimentu di Cristo entre e anochi dje Ultimo Cena i su morto] como tal, tabata muchu lat pa limitá na dje e asociacionnan di ‘pascha’ cu San Pablo a conectá cu e morto sacrificial: nan a ser aplicá libremente n’e Festival di resureccion mes, i un confusion di idea a establecé su mes den e idioma ritual di cristiandad di griego i latin.”​—⁠The Age of the Fathers, Volúmen 1, página 102.

Kico di Awe?

Kisas bo ta puntra, ‘Despues di tur e añanan aki, ta importá realmente ki dia e Memorial ta ser celebrá?’ Sí, ta importá. Hombernan cu mente fuerte den lucha pa poder a haci cambio. Hende a sigui nan mes ideanan en bes di obedecé Jesucristo. E spiertamentu di Pablo a cumpli claramente: “Mi sa cu despues di mi baimentu lobonan opresivo lo drenta meimei di boso [cristiannan] i lo no trata e tou cu ternura, i di den boso mes hombernan lo lanta i papia cosnan trocí pa lastra e disipelnan tras di nan mes.”​—⁠Echo 20:​29, 30.

E cuestion ta e asuntu di obedencia. Jesus a establecé solamente un celebracion pa cristiannan observá. Bijbel ta splica claramente ki dia i con mester observ’é. Ken, anto, tin e derecho pa cambia esei? E cuartodécimonan di antigua a sufri persecucion i expulsion mas bien cu haci compromiso den e asuntu aki.

Talbes bo ta interesá pa sa cu ainda tin hende cristian riba tera kendenan ta respetá Jesus su deseo i ta conmemorá e Memorial di su morto riba e fecha cu el a establecé. E aña aki, Testigonan di Jehova lo reuní huntu den nan Salon di Reino rond e tera despues di 6:00 p.m. riba djasabra, 26 di mart​—⁠ora e dia 14 di Nisan ta cuminsá. E ora ei nan lo haci exactamente loke Jesus a bisa cu mester haci n’e tempu di mas significante aki. Pakico no observá e Cena di Señor cu nan? Dor di ta presente, abo tambe por mustra bo respet p’e deseonan di Jesucristo.

[Footnotes]

[Box on page 6]

“E RESCATE PRECIOSO EI”

E sacrificio di rescate di Jesucristo ta hopi mas cu un doctrina. Jesus a bisa di su mes: “E Yu di hende a bini, no pa ser sirbí, sino pa sirbi i pa duna su alma como rescate en cambio pa hopi.” (Marco 10:45) Tambe el a splica: “Dios a stima e mundu [di humanidad] asina tantu cu el a duna su Yu unigénito, pa tur cu ehercé fe den dje no ser destruí pero haña bida eterno.” (Juan 3:16) P’e mortonan, e rescate ta habri e caminda pa un resureccion i e prospecto di bida eterno.​—⁠Juan 5:​28, 29.

Ta e morto di Jesucristo vitalmente importante cu ta ser conmemorá n’e observancianan dje Cena di Señor. Su sacrificio ta logra asina tantu! Un señora kende a ser entrená dor di mayornan piadoso i kende a cana den e berdad di Dios pa hopi década a expresá su gratitud cu e palabranan aki:

“Nos ta spera cu anhelo e Memorial. E ta bira mas special cada aña. Mi ta corda ora mi tabata pará den e cas funerario 20 aña pasá, mirando mi kerido tata [difuntu] i cu mi a bin haña un berdadero aprecio di curason p’e rescate. E tabata simplemente un asuntu di conocimentu mental promé cu esei. Bon, mi tabata sa tur e textonan i con pa splica nan! Pero ta solamente ora mi a sinti e realidad friu di morto cu onestamente mi curason a cuminsá brota cu goso riba loke e rescate precioso ei lo logra pa nos.”