Nos Mester Soña

BO SA soña? Nos por asumí esei sin mas, siendo cu nos tur ta soña ora nos ta drumi, asta si nos pretendé cu nos no sa soña. Segun cálculo, hende ta lubidá mas cu 95 porciento di tur soño. Cua di nan bo ta corda? Realmente, esnan cu generalmente nos ta corda ta esnan cu nos soña djis promé cu nos spierta.

Investigadornan di soño a descubrí cu soño ta un proceso progresivo cu ta mas profundo den e promé par di oranan, anto ta bira mas leve despues di esei. Soñamentu ta tuma lugá specialmente durante periodonan di ‘movementu rápido di wowo,’ yamá soño di ‘REM’ [Rapid Eye Movement]. Esaki ta intercambiá cu soño no-REM. Cada ciclo di soño no-REM/REM ta dura mas o ménos 90 minuut, i e ciclonan aki ta ripití nan mes cincu of seis biaha durante e anochi, e último tumando lugá djis promé cu nos spierta.

Ta un ekibocacion pa kere cu bo celebro ta na un nivel abou di actividad ora bo ta drumi. Hende a descubrí cu e celebro ta mas activo ora bo ta soña cu na cierto momentonan cu bo ta lantá, cu excepcion di cierto neuronnan den e ‘troncon’ dje celebro, cu ta relacioná cu tinu i memoria. Ta parce cu esakinan ta sosegá durante soño di REM. Pero por lo general e neuronnan den e celebro tin comunicacion intercelular continuo.

Nos celebro ta un parti asombrosamente complicá dje curpa cu miles di miyones di elemento cu ta generá señalnan rond di shen pa dos of treshen bes pa seconde. Tin mas elemento den un solo celebro humano cu tin hende riba tera. Algun investigador ta calculá cu e ta contené for di 20 mil miyon te na mas cu 50 mil miyon elemento. Su complehidad ta confirmá loke e escritor di Bijbel, David, a bisa tocante e curpa humano: “Lo mi alabá bo pasobra di un manera cu ta inspirá temor mi ta trahá maraviyosamente. Bo obranan ta maraviyoso.”—Salmo 139:14.

E Mundu di Soño

Durante e oranan cu nos ta lantá, nos cincu sentidonan constantemente ta transmití informacion i imágen n’e celebro, pero ora nos ta drumi esaki no ta e caso. E celebro ta generá imágen den su mes sin e yudansa di nos cincu sentidonan. P’esei, loke nos ta mira den soño i e accionnan cu nos ta experenciá den nan tin biaha ta manera halucinacionnan. Esaki ta haci parce posibel pa nos haci cosnan cu ta violá leynan natural, tal como bula manera personahenan den cuenta di ada of cai for di un klip sin heridá nos mes. Nos por bruha den tempu di manera cu nos ta mira pasado como si fuera e ta presente. Of si nos ta purba core bai, ta parce cu nos no tin control riba nos movecionnan—nos pianan no kier reaccioná. Impresionnan fuerte i experencianan cu nos por pasa aden ora nos ta lantá, naturalmente, ta afectá nos soñonan. Hopi hende cu a experenciá e atrocidadnan spantoso di guera no por lubidá nan fácilmente, tampoco algun no por lubidá e sintimentu di a ser atacá dor di un criminal. Experencianan perturbador asina miéntras cu nos ta lantá por surgi den nos soñonan, causando pesadianan. Cosnan comun cu ta den nos mente ora nos ta bai drumi por bini ariba den nos soñonan.

Sa sosodé cu ora nos ta purba resolvé un problema, e solucion ta bini na nos durante soño. Esaki por indicá cu no ta tur e ora cu nos ta drumi nos ta soña. Un parti di dje nos ta pasa pensando.

Un buki tocante soño i nos celebro ta remarcá: “E forma mas comun di actividad mental ora nos ta drumi no ta soñamentu sino pensamentu. Pensamentu den soño no ta bai compañá pa ilusionnan di nos sentidonan ni no ta basá riba fantasia. E tin tendencia di ta comun i coriente, hopi biaha relacioná cu sucesonan di bida real di ayera of mañan, i ta generalmente comun, no-creativo i ripititivo.”

Algun hende ta kere cu e cosnan cu nan ta soña tin mensahenan special pa nan. Pa por laga interpretá e soñonan, nan tin un ‘notebook’ banda di nan cama pa nan por skirbi nan soñonan ora nan spierta. Relacioná cu e utilidad di bukinan cu ta purba duna nificacion na símbolonan di soño, The Dream Game (E Wega di Soño) di Ann Faraday, ta bisa: “Bukinan di soño den cua bo ta busca nificacion di temanan i símbolonan di soño ta igualmente inútil, sea nan ta tradicional of basá riba un of otro teoria sicológico moderno.”

Siendo cu ta parce cu soñonan ta originá principalmente den e celebro, no ta razonabel pa pensa cu nan tin mensahenan special pa nos. Nos tin cu mira nan como un funcion normal dje celebro cu ta yuda manten’é den un condicion saludabel.

Pero kico di esnan cu ta bisa cu nan a soña cu e morto di un famia of un amigu i a haña sa e siguiente dia cu e persona a muri? Esei no ta indicá cu soñonan por pronosticá futuro? Den e siguiente artículo, nos lo considerá loke tin tras di soñonan profético.