Informe di Proclamadonan di Reino

No Keda sin Declará e Bon Nobo

TEMPU exploradónan europeo a bishitá Golfo di Venezuela i Lago di Maracaibo pa promé biaha, e costa tabata yen di cabaña chikitu trahá riba palu riba e awanan plat. E bista a pone nan corda Venecia, Italia, caminda hende tabata traha nan cas cant’i awa. P’esei e exploradónan di abla spañó a yama e área Venezuela, cu ta nificá “Venecia Chikitu.”

Awe tin un otro clase di programa di construccion ta tumando lugá den e pais bunita aki, unu spiritual. Ei Testigonan di Jehova ta ocupá den sembra simia di Reino na tur ocasion apropiado. E cosecha spiritual cu ta resultá for di esei ta treciendo hopi alabansa na “e Doño dje cosecha,” Jehova Dios.—Mateo 9:37, 38.

Ora un superintendente biahero a bishitá un congregacion den e estado di Zulia den nortwest di Venezuela, e Testigonan local a haci areglo pa e i su esposa bishitá un isla chikitu den cercania cu yama Toas. Miéntras cu nan tabata warda den fila pa coge un ferry mainta trempan pa bai e isla, e esposa dje superintendente biahero, Mery, a sugerí su compañera, un ruman muher pionero di tempu completo, pa nan papia cu algun dje trahadónan riba e boto. E ruman muher pionero a bai di acuerdo.

Mery a acercá un mecánico i a present’é e buki Conocimentu cu Ta Hiba na Bida Eterno. El a mustr’é e capítulo “Edificando un Famia cu Ta Onra Dios,” i e homber a mustra cu el a gust’é. E ora ei Mery a splik’é cu usando e publicacion aki, lo e por tin un studio di Bijbel na su mes cas. El a aceptá e buki, i Mery a haci areglo pa un hende bishit’é na su cas.

Un poco tempu despues, tabatin un dia special di asamblea den e área. Tabata ki un sorpresa pa Mery mira e mecánico, Señor Nava, ei, huntu cu su esposa i dos yu muher chikitu! Mery a puntra e esposa kico e tabata pensa tocante nan studio di Bijbel di famia. Su contesta tabata masha sorprendente.

“Mi ta gradicí Jehova cu nos a siña e berdad,” el a bisa. Anto el a splica: “Ora bo a papia cu mi casá, el a caba di bai lagá mi cu un otro muher. Tambe e tabata bebe hopi. Tin biaha ora e tabata burachi, e tabata abusá di hende, loke e comunidad chikitu riba e isla no tabata gusta. Tambe e tabata practicá spiritismo. Sin embargo, e conocimentu di Bijbel cu el a gana for dje studio a yud’é haci cambionan enorme den su bida. El a bandoná tur su prácticanan impuru. Su mayornan, cu ta católico, ta hopi impresioná p’e cambionan aki. Nan ta contentu cu awor e ta un esposo i tata responsabel.”

Señor Nava a bautisá na 1996 i actualmente ta sirbi como un minister di tempu completo. Su esposa, Jenny, a bautisá na 1997. E alcalde dje pueblo a keda asina impresioná p’e cambionan den e mecánico di ferry aki, cu e tambe a pidi pa un studio di Bijbel. Ki contentu e ruman muhernan ta cu nan no a keda sin declará e bon nobo ora nan tabata warda den fila pa coge ferry e mainta ei!

[Plachinan na página 7]

Compartiendo e bon nobo di Reino cu un mecánico di ferry a trece resultadonan gososo