INFORME DI PROCLAMADOR DI REINO

“Dios no ta haci distincion di persona”

MIL nuebe cien aña pasá, e apóstol inspirá Pedro a bisa: “Dios no ta haci distincion di persona, sino den tur nacion e hende cu ta temele i ta obra husticia ta aceptable pe.” (Echo 10:​34, 35) Den Testigo di Jehova tin hende di tur raza i pasado religioso. Nan ta deseá husticia, i nan ta teme Dios. Jehova Dios ta recibi nan tur den e sociedad di mundo nobo, mescos, por ehempel, cu el a haci cu un cierto señora di Chad.

E señora no a keda satisfecho cu su religion. Hopi aña pasá el a acepta un copia dje buki Bo hubentud​—⁠sacando mayor probecho foi dje, cu Testigo di Jehova ta publica, i el a aprecia e conseho excelente cu e buki ta contene. Un estudio bíblico a cuminza, i e semper tabata presente pe estudio. Sin embargo, ora e tabata invitá pa asisti na reunion den Salón di Reino, e no a bini. Pakico? Aunque su esposo no a opone su estudio, el a nenga di duné permiso pa asisti na reunion den Salón di Reino.

Ora su esposa kier a asisti na asamblea di circuito, e Testigo cu a conduci e estudio a mustra e esposo e programa, enfatizando e conseho excelente cu lo ser presentá. El a consenti di laga su señora asisti “un biaha so.” El a asisti i a goza e programa mashá. Despues cu el a splica su casá loke el a siña, e no a strobé di asisti na otro reunion. E esposa a keda impresioná cu e echo cu e congregacion tabatin hende di varios raza cu a stima otro hopi. Despues el a asisti ne asamblea di districto i a keda babucá ora el a mira su yiunan sintá den scochi di Testigo di otro país, cu a comparti cuminda cu e yiunan, i a mustra amor pa nan como si fuera di nan mes famía. Esei tabata e punto culminante pe.

Pero oposicion a sigi. Aunque e mama tabata tímido di carácter, el a cuminza duna comentario den reunion i resisti cu curashi comentario negativo di famía i beciña. Aunque el a biba hopi aña cu su esposo, nan no tabata legalmente casá. Con e por menciona e asunto di casa legalmente? Despues di haci oracion sincero na Jehova Dios, el a papia cu su esposo, cu a bisa cu lo e investiga e posibilidad. Finalmente el a hacié i e pareha a casa legalmente.

Un cuñá cu a biba cerca nan a causa hopi problema, pero su esposo a defende su esposa. Anto e tata dje esposo a bini pa un bishita. El a manda su yiu divorciá su esposa, pasobra el a cambia su religion. E tata a bisa su yiu cu lo e paga e bruidprijs pa un “esposa hopi mas mihor.” E yiu a contestá: “No, lo mi no haci esei. E ta un bon esposa. Si e kier bai, esei ta su cuenta, pero lo mi no bisé bai.” E esposa a mustra mashá cortesía ne suegro, i el a tene bergüenza di su conducta. Sin embargo, ora el a bai cas, el a skirbi su yiu, i awor a duné un ultimato. El a bisa cu si su yiu nenga di despidi di su esposa, e no tabata su yiu mas. Atrobé e yiu a defende su esposa. Imaginábo e gozo dje esposa pa mira su casá tuma un posicion tanto definitivo.

Awor nan dos yiu homber chikito ta gusta bai cu nan mama na Salón di Reino. Nan asta a pidi nan tata dúnanan dashi, pasobra nan a mira cu tur ruman cu a duna discurso a bisti dashi. Awe e señora ta un ruman bautizá.

E ta un dje 345 Testigonan feliz den Chad declarando e bon nobo dje Reino di Jehova Dios i ta aprecia cu, berdaderamente, “Dios no ta haci distincion di persona.”