Informe di Proclamador di Reino

“Feliz Ta e Hende Cu Ta Haya Sabiduría”

E PROVERBIO a resulta di ser correcto den Corea, unda cu tin mas cu 71.000 feliz Testigo di Jehova awor. (Proverbio 3:13) I imaginábo, 42 porciento di tal predicador ta den e sirbishi di tempo completo! E sigiente experencia ta mustra cu tal felicidad ta e suerte di hende cu ta busca berdadero sabiduría.

Un señora den Pusan a bai misa di cristiandad pa 16 aña. El a mira tanto costumber no bíblico cu el a cuminza kere cu no por existi Dios. En cambio, e no por a nenga existencia di Dios, p’sei el a pidi Dios sinceramente den oracion pe haya e religion berdadero, si ta existi tal cos. Ne momento ei el a corda di ripiente Testigo di Jehova, i el a corda cu su religion a despreciánan i a duna baidor di misa aviso contra nan pasobra Testigo di Jehova no ta kere den un trinidad, ni den candela di fiernu, ni den otro doctrina di cristiandad. Tal bez nan ta e religion berdadero? Cu e yudanza di un beciña, el a localiza e Salón di Reino. Su mañan mes, el a asisti ne reunion.

E bon ordu dje reunion a duné sorpresa. No tabatin gritamento fanático ni cantamento emocional manera nan a haci den su religion. El a cera conocí cu un Testigo cu tabata dispuesto pa studia e Bijbel cuné, i e promé estudio a sigi pa hopi ora pa motibo dje cantidad di pregunta cu el a haci. Den e segundo estudio, el a anuncia cu lo e retira for di su religion i bira un Testigo di Jehova. El a bisa e ruman cu e no tin cu sigi studia cuné, pasobra e por asisti na reunion so. Pero, e ruman a mustré e balor di un estudio bíblico personal además di asisti na reunion. El a acepta e sugerencia, a aplica su mes ne estudio, i na debido tempo a bautiza.

E ta asina feliz awor cu el a haya e sabiduría di e Dios berdadero, Jehova, i tin e speranza di biba pa semper den e mundo nobo di Dios.

Un general pensioná a siña e berdad

E esposa di un general pensioná dje ehército a bautizá na 1962. Su casá tabata contra na principio, pero despues e no a opone mas, i de bez en cuando pe sigiente 28 aña, varios ruman a studia cuné, pa yudé bira interesá den e berdad. El a asisti na algun reunion i asamblea, pero e tabata un dje hendenan cu no ta tuma e berdad na serio. Na 1990 e i su esposa a bai Hapón, unda nan a asisti ne asamblea di districto. Ne ocasion ei el a scucha atentamente na discurso—algo cu e no a haci promé. Discurso franco desenmascarando religion falso a dalé un golpi, pero nan siguramente a habri su wowo ne hipocresía di cristiandad. El a keda impresioná cu e ordu i felicidad dje pueblo di Dios den Hapón, locual ta mescos cu el a mira den Corea. Despues di a bolbe pa Corea, el a cuminza un estudio serio di Bijbel i finalmente a bautiza.

Pero, kico e mester haci despues di a bautiza? El a retira for di su puesto como presidente di un famoso hotel di turista i a bai cu su esposa den e ministerio di pionero di tempo completo. E ta kere cu e sirbishi di pionero regular ta e mihor manera pa reclama e 28 aña cu el a perde kedando atrás.

Awor e ta reconoce cu e proverbio di “feliz ta e hende cu ta haya sabiduría” ta aplica na dje també!