Informe di Proclamador di Reino

Carné di Jesús ta Scucha Su Boz

MIENTRAS cu e trabao di predica ta extende te na tur parti di mundo, Jehova Dios ta usa su angelnan pa dirigi su sirbidornan cerca hende semehante di carné. Nan ta tende e boz di Jesús i ta siña sirbié cu bida eterna na bista. Jesús a bisa den Juan 10:27, 28: “Mi carnénan ta scucha mi boz, i mi ta conocénan, i nan ta sigími. I mi ta dúnanan bida eterna.” Ripara con hende di curazón onrado di Madagascar a scucha e boz di Jesús.

Un Testigo di Jehova a duna ehemplar dje buki Bo por biba pa semper den Paradijs riba tera i Bo hubentud—sacando mayor probecho foi dje ne docter cu a bini pa bishita su tata enfermo.

E docter tabata protestante i mashá contra Testigo di Jehova, pero el a leza e buki i a comproba texto den su mes Bijbel. Su esposa, un católico i també un docter, a leza e buki Hubentud varios bez pasobra el a bisa cu ta parce cu e tabata skirbí specialmente pe. Splicacion bíblico dje Sociedad dje importancia di 1914 a impresiona nan dos. E esposo a haci contacto cu e testigo cu a duné e dos buki. E testigo a duné e buki La vida... ¿cómo se presentó aquí? ¿Por evolución, o por creación?, i a haci arreglo pa bishitá e pareha i contestá nan pregunta. Ora el a bishitánan, el a cuminza un estudio bíblico regularmente cu e pareha i nan tres yiu. Progreso den comprendimento dje Bijbel tabata rápido.

Despues dje promé estudio, e famía henter a cuminza asisti na reunion den Salón di Reino i pronto despues nan a matricula den e Scol di Ministerio Teocrático. E conducta di yiu a mehora mashá. Den nan estudio bíblico, nan a siña cu celebracion di cumpliaña i otro fiesta religioso no ta cristian; pues, nan no a celebránan mas. E esposo a nenga di duna su sanger na un pariente, aunque nan no a considera e asunto ainda den nan estudio bíblico. Pronto su uniforme di karate a desparce for di cashi; el a mandé ne sneiru pa traha di dje paña pa su yiunan. El a kima tur revista i buki di dje riba horoscop. Den tres luna so despues cu nan a cuminza studia, tanto e esposo como su esposa a retira for di nan religion respectiva i a expresa nan deseo pa participa den e trabao di predica. Awor nan ta bautizá.

◻ Un señora den Tailandia tabata busca e berdad. Aunque e tabata budista, e nunca tabata deboto na su religion pasobra el a mira mucho hipocresía i golosidad. Además, tabatin varios costumber cu el considerá ofensivo. E tabata fadá di tur esei.

Anto, un beciña a recomenda pe purba religion cristian i a hibé ne misa pentecostal. Pero, durante e reunion e señora a haya un deseo fuerte di sali i bai cas debí ne desordu, pasobra tur hende presente tabata reza na boz halto. Esei tabata e último bez cu el a bishita nan misa.

Despues, el a bai na misa católico romano. Pero, despues di a asisti varios bez, el a mira di nobo hipocresía i golosidad, i també e bida di luho dje pastor. El a disgusta i no a bai mas. E pastor a keda curioso en cuanto pakico el a bai. Despues di a tende e motibo, el a bisa na moda di mofa: “Si bo kier sigi un grupo realmente estricto, bai cerca Testigo di Jehova.” E señora a puntra: “Unda nan tá?” E pastor a contesta: “Nan ta cerca e planta di awa.” Su mañan el a búscanan, pero no a contra cu nan. Desilusioná, toch el a sigi corda Testigo di Jehova constantemente.

Un dia el a tende un beciña di dje bisa un otro cu mofa: “Pronto bo ta bira Testigo di Jehova!” Ora el a tende esei, e señora a bai lihé cerca su beciña i a puntra: “Tin Testigo di Jehova akinan?” El a contestá cu “Sí. Algun lo bishitábo trahando di cas pa cas. Bo por reconocénan pasobra nan ta bistí limpi i nechi.” Anto el a sali na carreda pa búscanan. Na principio e no a háyanan, pero ora e tabata bolbe cas, el a ripara dos hende muher bistí nechi conbersando cu un hende. El a yega cerca i a puntra si nan ta Testigo di Jehova. Ora nan a bisa cu sí, el a pidi: “Haci fabor di bini na mi cas. Mi kier papia cu boso.”

Un estudio bíblico a cuminza, i apesar di oposicion i mofa di miembro di famía, e señora a cuminza asisti na reunion i duna testimonio na su famía.

Jesús realmente ta conoce su carnénan i ta recogénan den su organizacion pa nan sobrebiba i drenta den su mundo nobo di husticia.