Salbacion Ta Pertenece na Jehova
“E Dios berdadero ta pa nos un Dios di actonan di salbacion.”—SALMO 68:20.
1, 2. (a) Pakico nos por bisa cu Jehova ta e Fuente di salbacion? (b) Con lo bo splica Proverbionan 21:31?
JEHOVA ta Salbador di hende cu ta stim’é. (Isaías 43:11) E famoso Rey David di Israel tabata sa esaki di experencia personal, i el a canta di henter curason: “Salbacion ta pertenecé na Jehova.” (Salmo 3:8) Profeta Jónas a usa e mésun palabranan den oracion ferviente ora e tabata den barica dje piscá grandi.—Jónas 2:9.
2 David su yu Sálomon tambe tabata sa cu Jehova ta e Fuente di salbacion, pasobra el a bisa: “Cabai ta algu prepará pa dia di bataya, pero salbacion ta pertenecé na Jehova.” (Proverbionan 21:31) Den Medio Oriente di antigwedad, tabata usa bue pa hala ploeg, buricu pa hala carga, mula pa hende core ariba i cabai pa guera. Sin embargo, promé cu e israelitanan a drenta e Tera Primintí, Dios a manda pa nan futuro rey ‘no aumentá cabai pa su mes.’ (Deuteronomio 17:16) Lo no tabatin mester di cabai di guera pasobra Jehova lo a salba su pueblo.
3. Ki preguntanan ta merecé nos consideracion?
3 E Soberano Señor Jehova ta “un Dios di actonan di salbacion.” (Salmo 68:20) Ki un pensamentu animador! Pero ki “actonan di salbacion” Jehova a efectuá? I ken el a salba?
Jehova Ta Salba e Rectonan
4. Con nos por sa cu Jehova ta salba hende deboto na dje?
4 Tur esnan cu ta sigui un moda di anda recto como Dios su sirbidónan dedicá por saca consuelo for dje palabranan di apostel Pedro: “Jehova sa con pa libra hende deboto na dje for di prueba, pero pa reservá hende inhustu p’e dia di huicio pa ser cortá.” Pa proba e punto aki, Pedro a bisa cu Dios no a “keda sin castigá un mundu di antigwedad, sino a warda Noe, un predicadó di husticia, sano i salbo cu shete otro ora el a trece un diluvio riba un mundu di hende malbado.”—2 Pedro 2:5, 9.
5. Bou di ki condicion Noe a sirbi como “un predicadó di husticia”?
5 Imaginá bo meimei dje condicionnan den tempu di Noe. Demoñonan materialisá ta riba tera. E yunan dje angelnan desobediente aki ta trata hende cruelmente, i ‘e tera ta yen di violencia.’ (Génesis 6:1-12) Sin embargo, nan no por intimidá Noe i pon’é bandoná Jehova su sirbishi. Mas bien, e ta “un predicadó di husticia.” E cu su famia ta traha un arca i no ta duda ningun momento so cu maldad lo ser eliminá durante nan bida. Noe su fe ta condená e mundu ei. (Hebreonan 11:7) Condicionnan dje tempu actual ta mescos cu esnan di tempu di Noe, marcando esakinan como e último dianan dje mal sistema di cosnan aki. (Mateo 24:37-39; 2 Timoteo 3:1-5) Pues, mescos cu Noe, lo bo resultá di ta fiel como predicadó di husticia sirbiendo huntu cu Dios su pueblo segun cu bo ta spera e salbacion di Jehova?
6. Con 2 Pedro 2:7, 8 ta proba cu Jehova ta salba e rectonan?
6 Pedro ta duna mas evidencia cu Jehova ta salba e rectonan. E apostel ta bisa: “[Dios] a libra hustu Lot, cu a keda masha afligí p’e libertinahe di hende desafiadó di ley. Pasobra e homber hustu ei, dor di loke el a mira i a tende miéntras cu el a biba den nan dia tras dia, tabata tormentá su alma hustu debí na nan malechonan.” (2 Pedro 2:7, 8; Génesis 19:1-29) Inmoralidad sexual a bira un moda di biba pa miyones di hende den e último dianan aki. Bo tambe, mescos cu Lot, ta “masha afligí p’e libertinahe” di parti di asina tantu hende awe? Si ta asina, i si bo ta practicá husticia, bo por ta entre esnan cu Jehova ta salba ora e caba cu e mal sistema di cosnan aki.
Jehova Ta Salba Su Pueblo for di Opresor
7. Con Jehova su trato cu e israelitanan na Egipto ta proba cu e ta libra su pueblo for di opresion?
7 Tanten cu e sistema di cosnan bieu aki dura, Jehova su sirbidónan lo haña nan cu persecucion i opresion di enemigu. Pero nan por tin confiansa cu Jehova lo libra nan, pasobra den pasado el a salba su pueblo oprimí. Suponé cu bo tabata un israelita cu a sufri opresion na man dje egipcionan den tempu di Moises. (Exodo 1:1-14; 6:8) Dios ta dal Egipto cu un plaga tras di otro. (Exodo 8:5–10:29) Ora e di dies plaga mortífero ta causa morto di primogénito egipcio, fárao ta permití Israel bai, pero despues ta mobilisá su ehército militar i ta sali nan tras na careda. Pero, no ta tarda muchu cu é huntu cu su hombernan ta ser destruí den Laman Corá. (Exodo 14:23-28) Bo ta djoin Moises i henter Israel den e cantica aki: “Jehova ta un persona baronil di guera. Jehova ta su nomber. El a tira fárao su garoshinan i su forsanan militar na laman, i a hundi esnan selectá di su guereronan den Laman Corá. E awanan agitá a cubri nan; nan a bai abou manera piedra den e profundidadnan.” (Exodo 15:3-5) Desaster similar ta spera tur opresor dje pueblo di Dios den e último dianan aki.
8, 9. Duna un ehempel for dje buki di Huesnan cu ta proba cu Jehova ta salba su pueblo for di opresor.
8 Pa añanan despues cu e israelitanan a drenta e Tera Primintí, huesnan a administrá husticia den nan. Algun biaha e pueblo a sufri opresion di parti di stranheronan, pero Dios a usa huesnan fiel pa libra nan. Aunke nos tambe kisas ta ‘suspirá pa motibu di opresornan i di esnan cu ta stot nos p’aki p’aya,’ Jehova lo salba nos tambe como su sirbidónan leal. (Huesnan 2:16-18; 3:9, 15) De facto, e buki bíblico di Huesnan ta duna nos siguransa di esaki i dje salbacion mas grandi cu Dios lo percurá pa medio di su Hues nombrá, Jesucristo.
9 Laga nos bai bek n’e dianan di Hues Barak. Pa motibu di adoracion falsu i desaprobacion divino, e israelitanan a experenciá 20 aña di dominacion cruel na man dje rey cananeo Jabin. Sísara ta hefe dje gran ehército militar cananeo. Pero, ‘bo no por mira ni un escudo, ni un lansa entre cuarenta mil den Israel,’ aunke e nacion tin kisas cuater miyon hende. (Huesnan 5:6-8) Cu curason repentí, e israelitanan ta sclama na Jehova pa yudansa. Riba instruccion cu Dios a duna mediante profetisa Débora, Barak ta reuní 10.000 homber riba Ceru Tabor, i Jehova ta trece e enemigunan n’e vaye na pia dje ceru haltu di Tabor. Cu hopi bochincha e trupanan di Sísara i mas cu 900 garoshi di guera ta crusa e yanura i e fondo secu di riu Kison. Pero un yobida torencial ta yena Kison cu awanan inundante. Segun cu Barak i su hombernan ta baha for di Ceru Tabor bou di capa dje tormenta, nan ta mira e desaster cu Jehova su furia ta causa. Barak su hombernan ta mata e cananeonan spantá i na careda un pa un i ningun di nan no ta scapa. Ki un spiertamentu pa nos opresornan cu ta tribi bringa contra Dios!—Huesnan 4:3-16; 5:19-22.
10. Pakico nos por ta sigur cu Dios lo salba su sirbidónan actual for di tur nan opresornan?
10 Jehova lo salba su sirbidónan actual for di tur nan enemigunan opresivo, mescos cu el a salba Israel temeroso di Dios den tempu di peliger. (Isaías 43:3; Jeremías 14:8) Dios a libra David “for di plant’i man di tur su enemigunan.” (2 Samuel 22:1-3) Pues, asta ora hende oprimí of persiguí nos como Jehova su pueblo, laga nos tene curashi, pasobra su Rey Mesiánico lo libra nos for di opresion. Sí, “alma di esnan pober lo e salba. For di opresion i for di violencia lo e rescatá nan alma.” (Salmo 72:13, 14) E rescate ei en berdad ta cerca.
Dios Ta Salba Esnan Cu Ta Confia den Dje
11. Ki ehempel hóben David a duna di confia riba Jehova?
11 Pa mira e salbacion di Jehova, nos tin cu confia den dje cu curashi. David a desplegá confiansa intrépido den Dios ora el a bai pa topa e gigante Goliat. Imaginá e filisteo gigante ei pará dilanti hóben David, cu ta sclama: “Bo ta bini riba mi cu un spada i cu un lansa i cu un gabalina, pero ami ta bini riba bo cu e nomber di Jehova di ehércitonan, e Dios dje liñanan di bataya di Israel, kende bo a desafiá cu mofa. Riba e dia aki Jehova lo entregá bo den mi man, i ami sigur lo tumbá bo i kita bo cabes afó; i ami sigur lo duna cadaver dje campamentu dje filisteonan riba e dia aki na para di shelu i na bestia salbahe dje tera; i hende di henter e tera lo sa cu ta existí un Dios cu ta pertenecé na Israel. I henter e congregacion aki lo sa cu Jehova no ta salba ni cu spada ni cu lansa, pasobra e bataya ta di Jehova.” Djis despues Goliat ta morto, i e filisteonan ta sufri un derota aplastante. Ta bisto cu Jehova a salba su pueblo.—1 Samuel 17:45-54.
12. Pakico lo ta bon pa corda David su homber poderoso Eleazar?
12 Ora nos ta enfrentá hende cu ta persiguí nos, kisas nos tin cu “tuma un curashi” i confia den Dios mas plenamente. (Isaías 46:8-13; Proverbionan 3:5, 6) Tuma nota dje incidente aki na un lugá cu yama Pas-damim. Israel ta bati retirada dilanti e forsanan filisteo. Pero temor no ta paralisá Eleazar, un di David su tres poderoso hombernan sobresaliente. E ta tuma su posicion den un cunucu di cebada i su so ta mata e filisteonan cu spada. Asina ‘Jehova ta salba Israel cu un gran salbacion.’ (1 Crónicanan 11:12-14; 2 Samuel 23:9, 10) Ningun hende no ta spera pa nos derotá un forsa militar nos so. Tog, tin bes nos por ta nos so i bou di preshon di enemigu. Nos lo dependé cu oracion riba Jehova, e Dios di actonan di salbacion? Nos lo busca su yudansa pa asina evitá di traicioná nos compañeronan creyente den man di persiguidó?
Jehova Ta Salba Wardadónan di Integridad
13. Pakico tabata difícil pa mantené integridad na Dios den e reino di dies tribu di Israel?
13 Pa experenciá e salbacion di Jehova, nos tin cu mantené integridad na dje cueste loke cueste. Dios su pueblo di tempu antiguo a pasa den vários prueba. Pensa riba loke lo bo por a enfrentá si bo tabata biba den e reino di dies tribu di Israel. Rehoboam su crueldad a pone cu dies tribu a stop di sosten’é i nan a forma e reino di Israel di nort. (2 Crónicanan 10:16, 17; 11:13, 14) Dje reino ei su hopi reynan, Jehú tabata e mihó, pero ni e ‘no a cana den e ley di Jehova di henter su curason.’ (2 Reynan 10:30, 31) No obstante, e reino di dies tribu tabatin su hendenan cu a warda integridad. (1 Reynan 19:18) Nan a ehercé fe den Dios, i el a resultá di ta cu nan. Abo ta manteniendo integridad na Jehova apesar di prueba di bo fe?
14. Ki salbacion Jehova a efectuá den e dianan di Rey Ezekías, i kico a hiba n’e conkista di Huda na man dje babilonionan?
14 Falta di respet extenso p’e Ley di Dios a hiba na calamidad p’e reino di Israel. Ora e asirionan a conkist’é na 740 P.E.C., sin duda tabatin individuonan di su dies tribunan cu a hui bai n’e reino di dos tribu di Huda, caminda nan por a adorá Jehova na su tempel. Cuater di Huda su 19 reynan dje liña di David—Asa, Jehósafat, Ezekías i Hosías—tabata sobresaliente den nan debocion na Dios. Den e dianan dje wardadó di integridad Ezekías, e asirionan a bini contra Huda cu un ehército poderoso. Como contesta riba Ezekías su súplicanan, Dios a usa un angel so pa mata 185.000 asirio den un solo anochi, i asina duna salbacion na Su adoradónan! (Isaías 37:36-38) Mas despues, ora e pueblo no a warda e Ley ni haci caso di spiertamentu di parti dje profetanan di Dios, esei a hiba na conkista di Huda i destruccion di su capital, Jerusalem, i dje tempel na aña 607 P.E.C., na man dje babilonionan.
15. Pakico exiliadonan hudiu na Babilonia tabatin mester di awante, i, cu tempu, con Jehova a efectuá un liberacion?
15 E exiliadonan hudiu tabatin mester di awante pa por a mantené integridad na Dios miéntras nan tabata den cautiverio na Babilonia pa rond di 70 aña penoso. (Salmo 137:1-6) Un wardadó di integridad notabel tabata profeta Daniel. (Daniel 1:1-7; 9:1-3) Imaginá su goso ora e decreto di Rey Ciro di Persia a drenta na vigor na 537 P.E.C., i a permití e hudiunan regresá Huda pa reconstruí e tempel! (Esdras 1:1-4) Daniel i otronan a wanta pa añanan, pero finalmente nan a mira e caida di Babilonia i e liberacion dje pueblo di Jehova. Esaki mester yuda nos desplegá awante segun cu nos ta spera e destruccion di “Babilonia e Grandi,” e imperio mundial di religion falsu.—Revelacion 18:1-5.
Semper Jehova Ta Salba Su Pueblo
16. Ki salbacion Dios a efectuá den e dianan di Reina Ester?
16 Semper Jehova ta salba su pueblo ora nan ta fiel na su nomber. (1 Samuel 12:22; Isaías 43:10-12) Pensa riba e dianan di Reina Ester—siglo cincu P.E.C. Rey Asuero (Herhes I) a nombra Haman promé minister. Haman ta furioso pasobra e hudiu Mardokeo a nenga di buig p’e. P’esei e ta trama un complot pa caba cu Mardokeo huntu cu tur hudiu den e Imperio di Persia. E ta pinta nan como kibradó di ley, e ta agregá un incentivo económico, i e rey ta permitié usa su renchi di seyo pa seya un documento cu ta decretá pa exterminá nan. Cu curashi Ester ta bisa e rey cu e tambe ta bini dje hudiunan i ta exponé e complot asesino di Haman. Poco despues, Haman ta cologá n’e mésun staca cu el a prepará pa ehecutá Mardokeo. Mardokeo ta bira promé minister, cu autorisacion pa permití e hudiunan defendé nan mes. Nan ta gana un victoria grandi riba nan enemigunan. (Ester 3:1–9:19) E suceso aki mester fortalecé nos fe cu Jehova lo efectuá actonan di salbacion na fabor di su sirbidónan obediente djawe.
17. Con obedencia a hunga un papel den liberacion dje cristiannan hudiu di promé siglo cu tabata biba na Hudea?
17 Un otro motibu pakico Dios ta salba su pueblo ta cu nan ta obedec’é i tambe su Yu. Pone bo mes den lugá di Jesus su disipelnan hudiu di promé siglo. E ta bisa nan: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca. E ora ei laga esnan den Hudea cuminsá hui p’e cerunan.” (Lucas 21:20-22) Añanan ta pasa, i bo ta puntra bo mes ki dia e palabranan aki lo cumpli. Anto ta bini un rebelion hudiu na 66 E.C. Forsanan romano bou di Cesto Gallo ta rondoná Jerusalem i ta avansá bai n’e murayanan dje tempel. Di ripiente, e romanonan ta retirá sin ningun aparente motibu. Kico cristiannan hudiu lo haci? Den su Ecclesiastical History (Historia Eclesiástico) (Buki III, capítulo V, 3), Eusebio ta bisa cu nan a hui for di Jerusalem i Hudea. Nan a scapa pasobra nan a obedecé Jesus su spiertamentu profético. Bo tambe ta cla pa cumpli cu e guia di Bijbel cu “e fiel mayordomo” nombrá riba tur ‘pertenencia’ di Jesus ta percurá p’e?—Lucas 12:42-44.
Salbacion pa Bida Eterno
18, 19. (a) Ki salbacion Jesus su morto a haci posibel, i pa ken? (b) Kico apostel Pablo tabata determiná pa haci?
18 Dor cu cristiannan hudiu na Hudea a haci caso dje spiertamentu di Jesus, esei a salba nan bida. Pero Jesus su morto ta haci salbacion pa bida eterno posibel pa “tur clase di hende.” (1 Timoteo 4:10) Humanidad su necesidad di un rescate a lanta ora Adam a peca, i asina a perde bida pa su mes i a bende e rasa humano den sclabitud na picá i morto. (Romanonan 5:12-19) Sacrificio di animal ofrecí bou dje Ley di Moises a cubri picá superficialmente so. (Hebreonan 10:1-4) Como cu Jesus no tabatin un tata humano i tabata claro cu Dios su spiritu santu a cubri Maria cu su “sombra” for dje tempu cu el a concibí te na Jesus su nacementu, el a nace liber di cualkier herencia di picá of imperfeccion. (Lucas 1:35; Juan 1:29; 1 Pedro 1:18, 19) Ora Jesus a muri como un wardadó perfecto di integridad, el a ofrecé su mes bida perfecto pa cumpra humanidad bek i libra nan. (Hebreonan 2:14, 15) Asina Cristo “a duna su mes como un rescate corespondiente pa tur.” (1 Timoteo 2:5, 6) No ta tur hende lo haci uso dje percuracion aki pa salbacion, pero Dios ta aprobá pa aplicá su beneficionan na esnan cu ta acept’é cu fe.
19 Dor di presentá e balor di su sacrificio di rescate na Dios den shelu, Cristo a cumpra Adam su yunan bek. (Hebreonan 9:24) Asina Jesus ta gana un Bruid, formá pa su 144.000 siguidónan ungí cu a resucitá na bida celestial. (Efesionan 5:25-27; Revelacion 14:3, 4; 21:9) Tambe e ta bira un “Tata Eterno” pa esnan cu ta aceptá su sacrificio i ta ricibí bida eterno riba tera. (Isaías 9:6, 7; 1 Juan 2:1, 2) Ki un areglo amoroso! Pablo su aprecio p’e ta evidente den su di dos carta inspirá n’e cristiannan na Corinto, manera e siguiente artículo lo mustra. De echo, Pablo tabata determiná pa no laga nada previnié di yuda hende haci uso di Jehova su percuracion maraviyoso di salbacion pa bida eterno.
Con Lo Bo Contestá?
◻ Ki prueba bíblico tin cu Dios ta salba su pueblo recto?
◻ Con nos sa cu Jehova ta salba esnan cu ta confia den dje i ta mantené nan integridad?
◻ Ki percuracion Dios a haci pa salbacion pa bida eterno?
[Plachi na página 12]
David a confia den Jehova, e “Dios di actonan di salbacion.” Abo tambe?
[Plachi na página 15]
Semper Jehova ta salba su pueblo, manera el a demostrá den tempu di Reina Ester