Alegrá den Jehova Apesar di Prueba

MANERA GEORGE SCIPIO A RELATA

Na december 1945, mi tabata drumí den hospital, completamente paralisá cu excepcion di mi man i pianan. Ami a pensa cu mi condicion tabata un cos temporal, pero otronan tabata duda cu un dia lo mi cana atrobe. Esei sí tabata un prueba enorme pa un hóben activo di 17 aña! Mi a nenga di aceptá e pronóstico ei. Mi tabatin asina tantu plan, incluso un biahe pa Inglatera e aña siguiente, huntu cu mi doño di trabou.

MI TABATA víctima dje epidemia di polio cu a asotá nos isla natal, St. Helena. Diesun persona a muri di dje i un gran cantidad a keda paralisá. Miéntras mi tabata drumí riba cama, mi tabatin hopi tempu pa refleccioná riba mi bida corticu i riba mi futuro. Asina, mi a bin realisá cu apesar di mi afliccion, mi tabatin motibu pa alegrá.

Un Comienso Chikitu

Na aña 1933 ora mi tabatin cincu aña di edad, mi tata Tom, un oficial di polis i diácono den e Iglesia Baptista, a haña algun buki cerca dos Testigo di Jehova. Nan tabata evangelisadó di tempu completo, of pionero, cu a bishitá e isla pa un tempu corticu.

Un dje bukinan tabatin e título El Arpa de Dios. Mi tata a us’é pa studia Bijbel cu nos famia i cu vários persona interesá. El a contené material pisá i mi tabata comprendé masha poco di dje. Pero mi ta corda cu mi tabata marca tur texto cu nos a considerá den mi mes Bijbel. No a tarda hopi cu mi tata a realisá cu nos tabata studiando e berdad i cu esei tabata diferente for di loke e tabata predicá den Iglesia Baptista. El a cuminsá conta otronan tocante dje, i a predicá for di preekstoel cu Trinidad, fiernu di candela i alma inmortal no ta existí. Esaki a causa bastante conmocion den misa.

Cu tempu, den un intento pa resolvé e problema, a tene un reunion n’e iglesia. A haci e pregunta: “Ken ta na fabor dje Iglesia Baptista?” E mayoria tabata. E siguiente pregunta tabata: “Ken ta na fabor di Jehova?” Rond di 10 pa 12 persona tabata. A pidi nan pa bandoná e iglesia.

Esaki tabata e comienso chikitu di un religion nobo na St. Helena. Mi tata a tuma contacto cu e sede di Sociedad Watch Tower na Merca i a pidi un tocadisco grandi pa e por a toca discursonan bíblico grabá p’e público. Nan a bis’é cu e mashin ta muchu grandi pa manda St. Helena. Nan a manda un tocadisco mas chikitu, i despues e rumannan a encargá dos mas. Nan tabata pasa rond e isla, na pia i riba buricu, hibando e mensahe n’e pueblo.

N’e mésun grado cu a plama e mensahe, oposicion tambe a crece. Na mi scol, muchanan tabata canta: “Tur hende bini, tur hende bin scucha Tommy Scipio i su banda di tocadisco!” Esei tabata un berdadero prueba pa mi, un mucha di scol cu tabata kier aprobacion di su pareunan. Kico a yuda mi wanta?

Nos famia grandi di seis yu, tabatin un studio di famia regular. Tambe nos tabata lesa Bijbel huntu tur mainta, promé cu desayuno. Sin duda esaki a contribuí cu nos famia a keda fiel den e berdad atrabes di añanan. Ami mes a haña un amor pa Bijbel for di chikitu, i atrabes di añanan, mi a sigui mantené e custumber di lesa Bijbel regularmente. (Salmo 1:1-3) Pa ora cu mi a kita for di scol, na edad di 14 aña, mi tabatin un base firme den e berdad, i mi tabata teme Jehova di curason. Esaki a pone cu mi por a alegrá den Jehova apesar dje pruebanan ei.

Mas Prueba i Goso

Drumí malu na cama, pensando riba e añanan ei i mi prospectonan pa futuro, mi tabata sa for di mi studio di Bijbel cu e malesa aki no tabata un prueba of castigu di Dios. (Santiago 1:12, 13) Sin embargo, polio tabata un prueba doloroso i pa e resto di mi bida lo mi a sinti su efectonan.

Miéntras mi tabata recuperá, mi mester a siña cana di nobo. Algun músculo di mi brasa tambe a stop di funcioná. Mi no sa cuantu bes pa dia mi tabata cai. Pero, cu oracion sincero i esfuerso continuo, pa aña 1947, mi tabata por a cana cu yudansa di un garoti.

Durante e tempu ei, mi a namorá di un mucha muher, Doris, cu tabatin e mésun conviccionnan religioso cu mi. Nos tabata muchu yong pa pensa riba casamentu, pero esei a motivá mi pa sigui mehorá mi canamentu. Tambe mi a kita for di trabou, pasobra mi salario no tabata suficiente pa mantené un famia, i mi a cuminsá mi mes laboratorio dental, cu a funcioná pa e siguiente dos añanan. Na aña 1950 nos a casa. P’e tempu ei, mi a gana suficiente cen cu mi por a cumpra un auto chikitu. Awor mi por a hiba e rumannan reunion i sirbishi di veld.

Adelanto Teocrático Riba e Isla

Na aña 1951, Sociedad a manda nan promé representante pa nos. Esaki tabata Jacobus van Staden, un yoncuman for di Sur Africa. Nos a caba di muda bai den un cas espacioso, p’esei e por a keda cerca nos henter un aña. Siendo cu mi tabata traha riba mi mes, nos a dedicá hopi tempu huntu den sirbishi, i mi a ricibí hopi entrenamentu balioso for di dje.

Jacobus, of Koos, manera nos tabata yam’é, a organisá reunionnan regular di congregacion, na cua nos tur a asistí cu smak. Nos tabatin un problema cu transport, dor cu entre tur esnan interesá tabatin solamente dos auto. E isla tin tereno malu i yen di ceru, i n’e tempu ei tabatin masha poco caminda bon. P’esei, pa logra haña tur hende na reunion tabata un trabou grandi. Algun hende tabata cuminsá cana mainta trempan. Mi tabata bai cu tres den mi auto chikitu, i hiba nan mitar caminda. Nan tabata baha i sigui cana. Mi ta bai bek, coge tres mas i baha nan despues di un cierto distancia, i bolbe. Dje forma aki, finalmente tur hende tabata yega reunion. Despues di reunion, nos tabata haci mescos pa tur hende por yega cas.

Tambe Koos a siña nos duna presentacionnan eficas na porta di hende. Nos tabatin hopi bon experencia i algun cu no tabata asina bon. Pero e goso cu nos tabatin den e ministerio di veld a surpasá tur e pruebanan causá dor di hende cu tabata oponé nos actividad di predicá. Un mainta mi tabata traha cu Koos. Ora nos a yega na un porta, nos a tende un stem paden. Un homber tabata lesa for di Bijbel na bos haltu. Nos por a tende cla-cla e palabranan conocí di Isaías capítulo 2. Ora el a yega na versículo 4, nos a bati na porta. Un homber amigabel a invitá nos paden, i nos a usa Isaías 2:4 pa splik’é e bon nobo dje Reino di Dios. Aunke e tabata biba den un lugá casi inaccesibel, nos a cuminsá un studio di Bijbel cuné. Nos mester a baha un ceru, crusa un rooi dor di stap riba piedra, subi un otro ceru, i despues baha bai su cas. Pero tabata bale la pena. E homber bieu i humilde aki a aceptá e berdad i a bautisá. Pa bai reunion, e ta tabata usa dos garoti p’e cana yega na un lugá unda mi por a recog’é, i asina e resto dje caminda el bai cu auto. El a muri como un Testigo fiel.

E comisario di polis tabata contra nos trabou, i hopi biaha el a menasá cu lo e laga deportá Koos. Un bes pa luna e tabata yama Koos pa interogacion. E echo cu semper Koos tabata duna contesta direct for di Bijbel, a dun’é asta mas rabia. Tur biaha e tabata bisa Koos p’e stop di predicá, pero cada bes e tabata haña un testimonio. El a sigui oponé e trabou, asta despues cu Koos a bandoná St. Helena. Despues, e comisario, un homber grandi i fuerte, a bira malu di ripiente i el a bira hopi flacu. Dokternan no por a comprendé kico tabata falt’é. Esei a pone cu el a bandoná e isla.

Bautismo i Crecementu Continuo

Despues cu Koos tabatin tres luna riba e isla, el a pensa cu tabata oportuno pa tene un ocasion pa bautismo. Tabata un problema pa haña un pisina adecuá. Nos a dicidí di coba un buracu grandi, pleister e, i carga awa bin yen’é. E anochi promé cu e bautismo, awaceru a cai, i e siguiente mainta tabata un goso pa mira e buracu yen-yen te na rand.

E diadomingo mainta ei, Koos a duna e discurso di bautismo. Ora el a pidi e candidatonan pa bautismo lanta para, nos 26 a lanta pa contestá e preguntanan di custumber. Nos tabatin e privilegio di ta e promé Testigonan cu a bautisá riba e isla. Esei tabata e dia mas felis di mi bida, ya cu semper mi tabata preocupá cu Armagedon lo por bini sin cu mi a bautisá.

Cu tempu, a forma dos congregacion, unu na Levelwood i unu na Jamestown. Tur siman riba diasabra, nos tres of cuater tabata biaha 13 kilometer bai na un congregacion pa tene e Scol di Ministerio Teocrático i Reunion di Sirbishi. Diadomingo mainta, despues di sirbishi di veld, nos tabata bolbe i tene e mésun reunionnan i tambe e Studio di Toren di Vigilancia, den nos mes congregacion atardi i anochi. Pues, nos fin di siman tabata yen di actividad teocrático gososo. Mi tabata anhelá pa traha e trabou di predicá di tempu completo, pero mi tabatin cu percurá pa mi famia. P’esei, na 1952, mi a bolbe drenta servicio permanente di gobiernu como dentista.

Na aña 1955, superintendentenan di circuito, representantenan biahero di Sociedad, a cuminsá bishitá e isla tur aña, i nan a pasa un parti di nan estadia na mi cas. Nan tabatin un influencia positivo riba nos famia. Rond dje mésun tempu ei, mi tabatin e privilegio tambe di participá den pasa e tres películanan di Sociedad na tur parti dje isla.

E Emocionante Asamblea Boluntad Divino

Na aña 1958, mi a bolbe tuma mi retiro for di servicio di gobiernu pa mi por a asistí n’e Asamblea Internacional Boluntad Divino, na New York. E asamblea ei tabata un evento significativo den mi bida—un ocasion cu a duna mi hopi motibu pa alegrá den Jehova. Dor cu no tabatin transport regular p’e isla, nos a keda afó cincu luna i mei. E asamblea a dura ocho dia, i e sesionnan tabata di nueb’or di mainta te cu nueb’or djanochi. Pero mi no a cansa niun ratu, i mi tabata anticipá cada dia. Mi tabatin e privilegio di tin un parti chikitu di dos minuut como representante di St. Helena. Papia dilanti e gran multitud na Yankee Stadium i Polo Grounds, tabata un experencia cu a haci mi masha nervioso.

E asamblea a fortalecé mi determinacion pa traha como pionero. E discurso público, “E Reino di Dios Ta Goberná—Fin di Mundu Ta Cerca?,” tabata particularmente animante. Despues dje asamblea nos a bishitá e oficinanan principal di Sociedad na Brooklyn i nos a haña un tour dor dje fábrica. Mi a papia cu Ruman Knorr, n’e tempu ei presidente di Sociedad Watch Tower, tocante e progreso dje trabou na St. Helena. El a bisa cu lo e tin gana di bishitá nos isla un dia. Nos a bai cas bek cu casetnan grabá cu tur discurso i tambe hopi filmacion dje asamblea pa compartí cu famia i amigunan.

Mi Ta Logra Mi Meta di Sirbishi di Tempu Completo

Ora mi a regresá, nan a bolbe ofrecé mi e funcion cu mi tabatin anteriormente ya cu no tabatin dentista riba e isla. Sin embargo, mi a splica nan cu mi tin intencion di drenta e ministerio di tempu completo. Despues di hopi negociacion, nos a cumbiní cu mi por traha tres bes pa siman, pero cu un salario mas haltu cu tempu mi tabata traha seis dia pa siman. Jesus su palabranan a resultá di ta berdad: “Sigui busca, anto, promé e reino i Su husticia, i tur e otro cosnan aki lo ser agregá na boso.” (Mateo 6:33) No tabata semper fácil pa mi a biaha na pia riba e isla su tereno yen di ceru. Tog, mi a traha pionero pa 14 aña i mi por a yuda hopi isleño conocé e berdad, loke sigur-sigur ta un motibu pa hopi alegria.

Na aña 1961, gobiernu kier a manda mi Islanan Fidji pa sigui un curso grátis di entrenamentu pa dos aña, pa asina mi bira un dentista completamente cualificá. Asta nan a ofrecé pa manda mi famia huntu cu mi. Esaki tabata un oferta atractivo, pero despues di a pensa seriamente riba dje, mi a nengu’é. Mi no kier a bandoná e rumannan pa un periodo di tempu asina largu, i perde e privilegio cu mi tabatin di sirbi huntu cu nan. E funcionario médico haltu cu a organisá e biahe tabata masha rabia. El a bisa: “Si bo ta kere cu fin ta asina cerca, bo por usa e cen cu bo ta bai gana miéntras tantu.” Pero mi a para firme.

E siguiente aña mi a haña invitacion pa bai Sur Africa pa asistí n’e Scol di Ministerio di Reino, un curso di un luna pa entrená superintendentenan di congregacion. Nos a haña instruccion balioso pa yuda nos cumpli mihó cu nos asignacionnan den congregacion. Despues dje scol, mi a ricibí mas entrenamentu dor di traha huntu cu un superintendente biahero. Anto pa mas cu dies aña, mi a sirbi como superintendente di circuito substituto p’e dos congregacionnan na St. Helena. Cu tempu, mas ruman homber cualificá a bira disponibel, i nos a usa e sistema rotativo.

Miéntras tantu, nos a muda for di Jamestown bai Levelwood, unda e necesidad tabata mas grandi, i nos a keda dies aña einan. Durante e tempu aki, mi tabata traha hopi duru sin masha sosiegu: mi tabata traha pionero, traha tres dia pa siman pa gobiernu i mi a manehá un toko. Ademas, mi tabata atendé asuntunan di congregacion, i ami cu mi casá tabata percurá pa un famia di cuater yu cu tabata birando grandi. Pa por wanta, mi a kita for di mi trabou di tres bes pa siman, mi a bende e toko, i a bai vakansi cu henter famia na Kaapstad, Sur Africa, pa tres luna. Despues nos a muda bai Isla Asencion i nos a keda un aña einan. Durante e tempu ei, nos por a yuda hopi hende gana un conocimentu exacto dje berdad di Bijbel.

Ora nos a regresá St. Helena, nos a bolbe bai biba na Jamestown. Nos a drecha un cas cu tabata situá pegá cu e Salon di Reino. Pa percurá pa nos necesidadnan material, ami cu mi yu homber, John, a combertí un truck marca Ford den un van di ijscream, i e siguiente cincu añanan nos a bende ijscream. Djis despues cu nos a cuminsá cu e negoshi, mi a haña un accidente cu e van. El a boltu i a pone cu mi pianan a keda pegá. Esei a mata e nervionan bou di mi rudia, i a tuma mi tres luna pa recuperá.

Bendicionnan Ricu den Pasado i den Futuro

Atrabes di añanan, nos a haña hopi bendicion—mas motibunan pa alegrá. Un di esakinan tabata nos biahe pa Sur Africa pa asistí na un congreso nacional na aña 1985 i pa bishitá e cas di Betel nobo, cu ainda tabata den construccion. Un otro ta e participacion chikitu cu ami i mi yu homber, John, tabatin den construí e bunita Salon di Asamblea cerca di Jamestown. Tambe nos ta contentu cu tres di nos yu hombernan ta sirbi como anciano, i cu un nietu ta sirbi n’e cas di Betel na Sur Africa. I e echo cu nos por a yuda hopi hende adkerí un conocimentu exacto di Bijbel, sigur-sigur a duna nos hopi goso i satisfaccion.

Dor cu e pueblo ta consistí di solamente un 5.000 persona, nos veld pa ministerio ta limitá. Sin embargo, traha den mésun teritorio bes tras bes, a producí resultadonan excelente. Masha poco hende ta trata nos malu. St. Helena ta conocí pa su amabilidad, i unda cu bo bira, riba caya of den bo auto, hende ta cumindá bo. Mi experencia ta cu, mas mihó bo conocé e hendenan, mas fácil ta pa bo duna nan testimonio. Awor aki, nos tin 150 publicadó, maske hopi a muda bai for dje isla.

Awor cu tur nos yunan a crece i a sali for di cas, ami cu mi casá a keda nos so atrobe despues di 48 aña casá. Mi casá su amor i apoyo leal atrabes di añanan a yuda mi sigui sirbi Jehova cu goso apesar di prueba. Nos fortalesa físico ta menguando, pero nos fortalesa spiritual ta ser renobá tur dia. (2 Corintionan 4:16) Ami, huntu cu mi famia i amigunan, ta anhelá e futuro maraviyoso ora cu mi condicion físico lo ta restorá na unu asta mas mihó di loke e tabata tempu mi tabatin 17 aña di edad. Mi mas profundo deseo ta, pa disfrutá di perfeccion den tur sentido i, mas cu tur cos, sirbi nos amoroso Dios, Jehova i su Rey reinante, Jesucristo, pa semper.—Nehemías 8:10.

[Plachi na página 26]

George Scipio i tres di su yu hombernan cu ta sirbi como anciano

[Plachi na página 29]

George Scipio cu su casá, Doris