E Tera Fructífero dje Vendanan

E ULTIMO dies añanan, ami cu mi esposa a traha como evangelisadó di tempu completo den e pueblo di Venda. E vendanan ta biba sur di riu Limpopo den parti nort di Sur Africa, i nan nacion ta consistí di vários tribu cu a crusa Limpopo durante e último siglonan. Algun venda ta bisa cu nan antepasadonan a establecé nan mes aki mas cu 1.000 aña pasá.

En berdad, un tempu e region aki tabata parti di un civilisacion bieu cu tabata yama e Reino di Mapungubwe. E tabata e promé poblacion urbano grandi di Sur Africa, i tabata controlá e vaye inmenso di riu Limpopo, for di Botswana den west te na Mozambique den oost. For di rond di añanan 900 E.C. pa 1100 E.C., Mapungubwe a duna comerciantenan arabir marfil, cachu di rinócero, cueru di animal, koper i asta oro. Riba un ceritu di entiero real cu yama Mapungubwe, a coba saca obhetonan di escultura masha bunita cubrí cu oro. Un enciclopedia ta indicá cu esakinan ta entre “e promé indicacionnan di mina di oro na Sur Africa.”

Nan no ta mina oro mas aki. Awe, e tera dje vendanan ta renombrá como un tera fructífero. Sur dje cerunan di Soutpansberg tin un vaye berde, caminda frutanan manera awakati, bacoba, mango i guyaba ta crece na abundancia. Aparte di nechi manera pecan i macadamia, tin tambe un suministro abundante di berdura. Esakinan ta incluí e muroho shimaron, cu ta smak manera spinazi i cu hende local gusta mashá.

E vendanan ta un pueblo pacífico i hospitalario. No ta algu straño pa un cabes di famia pidi su hendenan di cas cushiná un galiña pa un bishita cu a yega inesperá. Ta come esaki huntu cu vhuswa, e cuminda básico, trahá di maishi. Despues dje bishita, e cabes di famia ta compañá su bishita pa un distancia corticu. Esaki ta e manera tradicional pa mustra respet na un bishitante. Nan ta siña e muchanan pa saludá bishitantenan cu cortesia dor di buig i pasa man na otro. Riba e página aki bo ta mira dos muher venda cumindá otro den e manera habitual aki.

Un Idioma Difícil

No ta fácil pa hende di orígen europeo dominá idioma venda. Un dificultad ta cu nan ta skirbi hopi palabra mescos pero ta pronunciá nan diferente. Un dia, ora mi tabata duna un discurso bíblico na un congregacion venda di Testigo di Jehova, mi kier a animá e auditorio pa papia cu tur persona. Un individuo den auditorio mester a hari ora mi a bisa “dede pa dede” en bes di “hende pa hende.”

Ora mi a purba papia venda pa promé bes den e trabou di duna testimonio público, un muher venda a contestá: “Mi no ta papia ingles.” Mi a kere cu mi a caba di papia bon venda, pero e a kere cu tabata ingles! Na un otro ocasion, ora mi a acercá un cas, mi a pidi un hobencito p’e yama e cabes di famia. E palabra venda pa cabes di famia ta thó·ho. Pa ekibocacion, mi a bisa thohó, pidiendo asina pa papia cu e macacu dje cas! Sorto di ekibocacionnan asina a desanimá mi, pero dor di perseverancia, awor tantu ami como mi esposa por combersá razonablemente bon na venda.

Fruta Spiritual

E tera dje vendanan ta resultá di ta fructífero den un sentido spiritual. Den añanan ’50, a forma un congregacion di Testigonan di Jehova entre imigrantenan cu a bini for di paisnan bisiña pa traha den e mina di koper den e pueblo di Messina. Nan actividad celoso a yuda hopi venda cera conocí cu berdadnan di Bijbel. Un década mas despues tabatin un grupo di Testigo venda ta tene reunion den un cas privá den e pueblo di Sibasa.

Pa acelerá e aumento, e sucursal di Sur Africa di Sociedad Watch Tower a manda evangelisadónan di tempu completo den e campo fructífero aki. Pronto, e grupo di Sibasa a crece bira un congregacion grandi. Nan tabata tene reunionnan cristian den un klas di scol e tempu ei. Pero, cu yudansa di Testigonan di Jehova den e área di Pietersburg rond di 160 kilometer sur, a construí un Salon di Reino na Thohoyandou, un pueblo bisiña.

E poblacion di abla venda den nort di Sur Africa ta pasa 500.000. No tabatin Testigo venda tempu cu e trabou di predicacion di Reino a cuminsá aki den añanan ’50. Awor tin mas cu 150. Pero ainda tin hopi área bírgen i bastante trabou di haci. Na 1989 nos a cuminsá bishitá un pueblo venda cu yama Hamutsha. E tempu ei tabatin un Testigo so ta biba einan. Awor tin mas cu 40 proclamadó di Reino ta biba den e pueblo ei. Nos ta trahando duru pa caba nos Salon di Reino, danki atrobe n’e yudansa di Testigonan for dje congregacionnan di Pietersburg i e contribucionnan financiero di rumannan den paisnan mas próspero.

Nos ta biba den un trailer chikitu den un cunucu. Dor di tene nos bida simpel, nos tin mas tempu pa alcansá e hendenan local cu e bon nobo. (Marco 13:10) Como resultado, nos a ser bendicioná ricamente cu e privilegio di yuda hopi hende dedicá nan bida na Jehova Dios. Un ehempel ta un homber cu yama Michael, kende a mira e buki Bo por biba pa semper den Paradijs riba tera na cas di un amigu.a El a cuminsá les’é i a reconocé e berdad mesora. Di manera cu el a skirbi Sociedad Watch Tower pa pidi mas literatura bíblico. Den su carta Michael a splica cu el a caba di bautisá como miembro di un iglesia apostólico local. El a sigui bisa: “Mi a descubrí cu mi no ta riba e caminda cu ta hiba n’e Reino di Dios. Mi a dicidí di bira un di boso miembronan, pero mi no sa con pa haci esei.” Anto el a duna su adres i a pidi pa manda un Testigo di Jehova bin yud’é. Mi a logra haña Michael i a cuminsá un studio di Bijbel cuné. Awe, e ta un Testigo bautisá i ta sirbi Jehova lealmente.

Na december 1997, nos a asistí n’e Congreso di Distrito di Testigonan di Jehova “Fe den e Palabra di Dios” cu a ser tené den un stadion deportivo na Thohoyandou. Tabatin un asistencia di 634 persona, i 12 persona nobo a bautisá. Mi tabatin e privilegio di duna dos discurso na venda. Esei tabata berdaderamente un logro den e década felis cu nos a pasa den e tera fructífero aki!—Contribuí.

[Nota]