Charadanan Divino i Dios Su Propósito

ORA bo no sa su contesta, e ta un desafio; pero una bes bo sabié, no tin nada aden mas. Kico e ta? Un charada.

Den e sociedad djawe cu ta abordá tur cos den un manera práctico, hende tin tendencia di mira charada como un wega di mucha, pero den tempu di antigwedad, charada “tabata un test di sabiduria,” segun The Interpreter’s Dictionary of the Bible.—Compará cu Proverbionan 1:5, 6.

En bes di declará su boluntad of propósito cu tur claridad, tin biaha Jehova intencionalmente ta haci su dichonan profético ménos cla dor di usa comparacion, asombroso “dichonan obscuro” of charadanan cu ta confundí hende. (Salmo 78:2, King James Version; Númeronan 12:8, The Emphasized Bible) De facto, aunke Bijbel ta usa e palabra hebreo pa charada 17 bes so, e Scritura ta literalmente yen di charada i proverbio.

Tin Abundancia di Charada Bíblico

Tabata ser bisá cu rey Sálomon por a contestá asta e preguntanan of charadanan di mas complicá cu hende a present’é. (1 Reynan 10:1, nota na pia di página) Esaki sigur-sigur tabata como resultado di sabiduria divino. Si tin algu di berdad den loke e historiadónan di antigwedad a bisa, esta, cu un biaha Sálomon a perde un contest di charada contra rey Hiram di Tiro, probablemente esei lo a sosodé despues cu el a perde Jehova su spiritu debí na su apostasia. Mescos tambe, hues Samson a mustra cu e tabata gusta charada mashá. Na un ocasion, bou di poder dje spiritu santu, un charada a dun’é chens di hinca miedu den curason di enemigunan di Dios.—Huesnan 14:12-19.

Pero, hopi charada bíblico tin di haber directamente cu Jehova su propósitonan. Considerá por ehempel, Génesis 3:15. E profecia aki cu ta forma e base pa e tema di Bijbel, ta riba su mes un enigma, un “secreto sagrado.” (Romanonan 16:25, 26) Ademas di vision i revelacionnan sobrenatural cu Pablo a haña, tambe el a mira cierto aspecto dje propósito di Dios den un “forma vago” of literalmente “expresionnan obscuro.” (1 Corintionan 13:12; 2 Corintionan 12:1-4) I kico dje cantidad sinfin di speculacion rond di e number misterioso dje bestia salbahe—“seishentisesentiseis”—cu Revelacion 13:18 a introducí di ripiente i sin splicacion? Ken por resolvé e charadanan divino aki, i ki propósito nan tin?

Resolviendo Secretonan Sagrado

Pa hopi di nos, nos bista ta esun di mas balioso entre nos cincu sentidonan. Pero sin lus, bista humano lo tabata casi inútil. Nos lo tabata prácticamente ciegu. Esei ta e caso tambe cu hende su mente. E tin un abilidad asombroso pa cuadra característicanan cu otro, usa lógica i resolvé puzel. Pero, pa resolvé secreto sagrado, algu mas ta necesario. Aunke otronan por bin cu contesta p’e charadanan cu Bijbel ta presentá, ta solamente nan Autor, Jehova, e Dios di lus, por revelá nan berdadero nificacion.—1 Juan 1:5.

Desafortunadamente, hopi bes hende ta demasiado orguyoso i independiente pa spera riba Jehova pa contesta. Intrigá cu e misterio, tin hende cu, en busca di stimulacion intelectual i no necesariamente e berdad, a bai busca contesta fuera di Dios su Palabra. Por ehempel, misticismo hudiu, manera den Cabala, a considerá a fondo e nificacion mágico di cifra i dje letternan di alfabet hebreo. Di otro banda, e gnósticonan di siglo dos, a usa e Scrituranan Hebreo i Griego den nan intento pa saca nificacionnan secreto for di nan.

Sin embargo, tur e buscamentunan ei a hiba nan mas den ritonan pagano of supersticion i leu for dje berdad divino. ‘Wel, si e mundu ta yen di maldad,’ e gnósticonan a razoná, ‘anto su Creador, Yahweh, no por ta un bon Dios.’ Esaki ta e mihó conclusion cu nan por a saca? Esta superficial razonamentu humano ta! Nada straño cu apostel Pablo, kende tabata lucha contra ideanan apóstata cu sectanan gnóstico a desaroyá despues, a duna un spiertamentu fuerte den su carta: “No bai mas ayá di e cosnan skirbí”!—1 Corintionan 4:6.

Tirando Lus Riba “Dichonan Obscuro”

Pero, pakico un Dios di lus lo a papia mes den “dichonan obscuro”? E naturalesa mes di un charada ta desafiá un persona su imaginacion i capacidad di deducí. Pues, plamá aki i aya den henter e Scritura, nan ta manera adorno apetitoso den un cuminda special. Tin bes a usa charada djis pa lanta interes dje auditorio of pa duna mas bida n’e mensahe presentá. Generalmente den e casonan aki, e splicacion ta sigui djis despues.—Ezekiel 17:1-18; Mateo 18:23-35.

Jehova ta duna sabiduria generosamente, pero nunca pa loco. (Santiago 1:5-8) Wak e buki di Proverbionan, un coleccion inspirá di hopi dicho misterioso, cu algun hende lo por considerá charada. Ta tuma tempu i meditacion pa comprendé nan. Pero cuantu hende ta dispuesto pa haci e esfuerso ei? E sabiduria cu e dichonan aki ta contené ta accesibel solamente pa esnan cu ta dispuesto pa coba pa hañ’é.—Proverbionan 2:1-5.

Mescos tambe, Jesus a usa ilustracion pa saca na cla e actitud di curason di su oyentenan. Multitud di hende a rondon’é. Nan tabata gusta loke el a conta. Nan tabata stima su milagernan. Pero, cuantu di nan tabata dispuesto pa cambia nan estilo di bida i siguié? Esta un contraste cu e disipelnan di Jesus, kendenan bes tras bes a busca pa comprendé Jesus su siñansanan i tabata dispuesto di nenga nan mes pa bira su siguidó!—Mateo 13:10-23, 34, 35; 16:24; Juan 16:25, 29.

Dependé Riba e Lus

Un fuente a observá: “Interes den charada ta parce di coincidí cu periodonan di iluminacion intelectual.” Awe nos tin e gran privilegio di biba den un tempu durante cua ‘lus spiritual a resplandecé’ p’e pueblo di Dios. (Salmo 97:11; Daniel 12:4, 9) Nos por spera cu pacenshi riba Jehova p’e revelá su propósitonan di acuerdo cu su orario? Mas importante ainda, nos ta actua mesora pa haci cambio den nos bida ora nos haña sa con pa cumpli mas cabal cu Dios su boluntad revelá? (Salmo 1:1-3; Santiago 1:22-25) Si nos haci esei, Jehova lo bendicioná nos esfuersonan pa asina, mescos cu bril por corigí un bista nublá, e spiritu santu por enfocá bon cla den nos un cuadro mental completo i bunita dje propósito divino, haciendo nos bista spiritual mas skerpi.—1 Corintionan 2:7, 9, 10.

Sí, charadanan bíblico ta engrandecé Jehova como e “Revelador di secreto.” (Daniel 2:28, 29) Ademas, e ta tambe un Scudriñador di curason. (1 Crónicanan 28:9) No mester ta un sorpresa pa nos cu revelacion dje lus di berdad divino semper tabata progresivo. (Proverbionan 4:18; Romanonan 16:25, 26) En bes di busca conocimentu dje cosnan profundo di Dios mediante misticismo of sabiduria humano superficial, cu por hiba nos solamente na banidad, laga nos dependé cu confiansa riba Jehova Dios pa na su debido tempu e cende e lus dje berdad riba su “dichonan obscuro,” i haci su propósitonan maraviyoso conocí pa fiel sirbidónan.—Amos 3:7; Mateo 24:25-27.

[Rekonosementu pa Potrèt na página 26]

Biblia Hebraica Stuttgartensia, Deutsche Bibelgesellschaft Stuttgart