Bijbel Ta Contestá Preguntanan Vital di Nos Dia

BIJBEL ta relevante awe? P’e contesta por ta sí, sin duda e buki hopi bieu aki lo tin cu ofrecé su lectornan guia riba temanan relevante i di interes actual. Bijbel ta duna conseho beneficioso riba temanan cu ta di berdadero importancia den e mundu djawe?

Laga nos analisá dos cuestion actual. Segun cu nos ta haci esei, nos lo examiná loke Bijbel ta bisa tocante e asuntunan aki.

Pakico Dios Ta Permití Sufrimentu?

En bista dje condicionnan den e mundu djawe, un dje preguntanan mas comun ta: Pakico Dios ta permití hende inocente sufri? E pregunta aki ta hustificá, ya cu crímen violento, corupcion, genocidio, tragedia personal i cosnan por estilo ta afectá mas i mas hende.

Por ehempel, na juni 1998 un trein di alto velocidad a dal den un brug na nort Alemania i mata mas cu shen pasahero. E esena sangriente i horibel a trastorná asta dokter i bomberonan experenciá cu a asistí esnan heridá i morto. Un obispu di Iglesia Evangélico a puntra: “Mi Dios, pakico e cos aki mester a pasa?” E obispu mes no tabatin contesta.

Experencia ta mustra cu ora hende inocente sufri maldad sin haña un splicacion dje causa, tin bes esei ta amargá nan. Aki ta caminda Bijbel por yuda, pasobra e ta splica pakico hende inocente ta sometí na maldad i sufrimentu.

Ora Jehova Dios a crea tera i tur cos riba dje, su intencion no tabata pa maldad i sufrimentu afligí humanidad. Con nos por ta sigur di esei? Pasobra ora el a completá su creacion, “Dios a mira tur cos cu el a traha i, mira! e tabata hopi bon.” (Génesis 1:31) Puntra bo mes: ‘Si mi mira algu cu ta malu, lo mi bisa cu e ta “hopi bon”?’ Claro cu no! Mescos tambe, ora Dios a bisa cu tur cos tabata “hopi bon,” no tabatin ningun rastro di maldad riba tera. Pues na ki tempu i con maldad a cuminsá?

Djis despues dje creacion di nos promé mayornan, Adam cu Eva, un criatura spiritual poderoso a acercá e muher i a cuestioná si Jehova a papia berdad i si e tin derecho di ta soberano. (Génesis 3:1-5) Mas despues e criatura aki, Satanas e Diabel, a pretendé cu hende lo no keda leal na Dios ora nan haña nan cu contratempu. (Job 2:1-5) Con Jehova a reaccioná riba e situacion aki? El a laga tempu pasa pa asina por a bira bisto cu hende no por dirigí nan pasonan cu éxito independiente di dje. (Jeremías 10:23) Ora criaturanan ta actua contrario cu e ley i principionan di Dios, e resultado ta picá, loke ta producí condicionnan perhudicial. (Eclesiástes 8:9; 1 Juan 3:4) Pero apesar dje circunstancianan desfaborabel aki, Jehova tabata sa cu algun hende lo a keda íntegro na dje.

Desde e rebelion fatal den Eden, rond di 6.000 aña a transcurí. Esei ta muchu largu? Jehova por a destruí Satanas i su apoyadónan siglonan pasá. Pero no tabata mihó pa warda te ora caba cu tur duda imaginabel tocante Jehova su derecho di ehercé su soberania i tocante hende su integridad na dje? Acaso no ta asina cu den e sistema actual di husticia un caso di corte pa proba ken tin rason of no, por tuma añanan?

En bista dje importancia dje cuestionnan dilanti Jehova i humanidad—esta, soberania universal i integridad di hende—tabata sabí di parti di Dios pa laga tempu pasa! Awor nos ta mira bon cla kico ta sosodé ora hende ignorá Dios su leynan i tuma control di nan mes asuntunan. E resultado ta maldad plamá tur caminda. I p’e motibu ei asina tantu hende inocente ta sufri awe.

Pero afortunadamente, e Palabra di Dios ta indicá cu maldad lo no dura pa semper. De facto, pronto Jehova lo pone fin na maldad i na esnan cu ta caus’é. “En cuanto e malbadonan,” segun Proverbionan 2:22, “nan lo ser cortá for dje tera mes; i en cuanto esnan traicionero, nan lo ser rancá for di dje.” Di otro banda, esnan cu ta fiel na Dios por spera e tempu, cu ta masha cerca awor, ora “lo no tin morto mas, ni lo no tin lamento ni sclamacion ni dolor mas.”—Revelacion 21:4.

Pues anto, Bijbel ta splica claramente pakico hende inocente ta sufri. Tambe e ta sigurá nos cu maldad i sufrimentu lo caba pronto. Sin embargo, nos ta sigui experenciá e miserianan di bida, i p’esei nos mester haña contesta riba un otro pregunta vital.

Kico Ta e Propósito di Bida?

Tal bes awor mas cu cualkier otro tempu den historia di humanidad, hende ta purba haña sa kico ta kico den bida. Hopi ta puntra nan mes: ‘Pakico mi ta biba? Con mi por haña nificacion den mi bida?’ Vários circunstancia ta pone nan haci e preguntanan aki.

Un tragedia personal por kibra bida di un hende. Por ehempel, na principio di 1998, nan a secuestrá i mata un hobencita di 12 aña cu tabata biba na Bavaria, Alemania. Un aña despues, su mama a admití cu e ta pasa tur dia ta busca un propósito den bida—ma en bano. Algun hóben tin gana di sa e nificacion di bida. Nan ta busca siguridad, satisfaccion i un sintimentu cu otro hende ta aceptá nan. Pero e hipocresia i corupcion extenso ta pone nan desesperá. Otro individuonan ta edificá nan bida rond di un carera, pero nan ta descubrí cu poder, prestigio i posesion no ta satisfacé e anhelo interno pa haña un motibu pa nan existencia.

Sea loke sea ta impulsá un persona pa busca pa sa mas tocante e propósito di bida, e pregunta aki ta merecé un contesta serio i satisfaciente. Aki atrobe, Bijbel por ta di gran beneficio. E ta identificá Jehova como un Dios di propósito, unu cu tin motibu válido pa tur loke e ta haci. Puntra bo mes: Lo bo construí un cas sin tin un motibu? Probablemente cu no, ya cu pa traha un cas bo mester di basta placa i e por tuma luna of añanan. Bo ta traha un cas pa abo of un otro hende por biba aden. Nos por aplicá e mésun lógica na Jehova. E no a pasa tur e trabou di crea tera i e cosnan bibiente riba dje sin tin un motibu, un propósito. (Compará cu Hebreonan 3:4.) Kico ta su propósito p’e tera?

E profecia di Isaías ta identificá Jehova como “e Dios berdadero, e Formador dje tera i e Hacidor di dje.” Sí, e ta “Esun cu a establecé [tera] firmemente, cu no a cre’é simplemente pornada, cu a form’é asta pa ser habitá.” (Isaías 45:18) Sí, for di tempu cu tera a ser creá, tabata Jehova su propósito pa e ser habitá. Salmo 115:16 ta bisa: “En cuanto e shelunan, na Jehova e shelunan ta pertenecé, pero e tera el a duna n’e yunan di hende.” Asina Bijbel ta mustra cu Jehova a crea tera pa hende obediente habit’é i cuid’é.—Génesis 1:27, 28.

E rebelion di Adam cu Eva a pone Jehova cambia su propósito? No. Con nos por ta asina sigur di esei? Wel, pensa riba e punto aki: A skirbi Bijbel miles di aña despues dje rebelion den Eden. Si Dios a bandoná su propósito original, pakico Bijbel no ta mencioná esei? E conclusion lógico ta cu su propósito pa tera i pa humanidad no a cambia.

Ademas, Jehova su propósito no ta faya nunca. Mediante Isaías, Dios ta duna e garantia aki: “Mescos cu yobida fuerte i tambe sneu, ta baha for di shelu i no ta bolbe n’e lugá ei, a ménos cu realmente e saturá tera i pon’é producí i spruit, i realmente duna simia n’e sembradó i pan na esun cu ta come, asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur den loke mi a mand’é.”—Isaías 55:10, 11.

Loke Dios Ta Spera di Nos

Ta keda claro anto cu nos por tin confiansa den e cumplimentu dje propósito di Dios pa hende obediente habitá tera pa semper. Si nos kier ta entre esnan cu tin e privilegio di biba permanentemente riba tera, nos tin cu haci loke rey sabí Sálomon a bisa: “Teme e Dios berdadero i warda su mandamentunan. Pasobra esaki ta henter e obligacion di hende.”—Eclesiástes 12:13; Juan 17:3.

Biba na armonia cu e propósito di Jehova pa humanidad ta nificá conocé e Dios berdadero i cumpli cu su rekisitonan describí den e Scritura Santu. Si nos haci esaki awor, nos por carga e speransa di bida eterno riba un tera paradísico, caminda hamas nos lo stop di siña cosnan nobo tocante Dios i su creacion maraviyoso. (Lucas 23:43) Ki un prospecto emocionante!

Hopi hende cu ta busca un propósito den bida ta acudí na Bijbel i ta haña gran felicidad awor aki mes. Por ehempel, un yoncuman cu yama Alfred no por a haña nificacion den bida. E enbolbimentu di religion den guera a disgust’é, i e hipocresia i corupcion den política a molesti’é. Alfred a bishitá e indjannan norteamericano cu e speransa di haña un aclaracion tocante e propósito di bida, pero el a regresá Europa desapuntá. Den desesperacion, el a acudí na droga i música extravagante. Sin embargo, un examinacion regular i cuidadoso di Bijbel mas despues a yuda Alfred reconocé e berdadero propósito di bida i haña satisfaccion.

Un Lus Confiabel pa Nos Caminda

Kico anto nos por concluí tocante Bijbel? E ta relevante awe? Sí, e ta relevante pasobra e ta ofrecé guia riba temanan actual. Bijbel ta splica cu no ta Dios ta responsabel pa maldad i tambe e ta yuda nos haña un propósito satisfactorio den bida. Ademas, Bijbel tin hopi di bisa riba otro asuntunan cu ta di gran interes awe. E Palabra di Dios ta trata temanan manera matrimonio, lantamentu di yu, relacionnan humano i speransa p’e mortonan.

Por fabor, examiná contenido di Bijbel si bo no a hacié ainda. Una bes bo descubrí e berdadero balor di su guia pa bida, bo por wel sinti mescos cu e salmista cu a acudí na Jehova Dios pa guia i a canta: “Bo palabra ta un lampi pa mi pia, i un lus pa mi caminda.”—Salmo 119:105.

[Plachi na página 6]

Bo sa pakico Dios ta permití hende inocente sufri?

[Plachi na página 7]

Bo por disfrutá di un bida yen di propósito