Alivio pa Hende Ku Tin Hamber Ta na Kaminda!

KISAS bo ta puntra: ‘Ki sorto di hamber?’ Esei ta un hamber spiritual! Un profeta hebreo di antigwedat a profetisá di e hamber aki: “‘Mira, dianan ta bin,’ SEÑOR Dios ta deklará, ‘ku lo mi manda hamber riba e tera; no hamber pa pan ni set pa awa, ma mas bien pa tende e palabranan di SEÑOR.’” (Ámos 8:11) Pa yuda aliviá e hamber spiritual aki, e 48 miembronan di e di 112 klas di e Skol Bíbliko di Galad di Watchtower, situá na Patterson, New York, ta bayendo 19 diferente pais den 5 kontinente i isla di laman.

Nan ta bai ekipá, no ku karni i grano literal, sino ku konosementu, eksperensia i preparashon. Sinku luna largu nan a partisipá den un studio di Beibel intensivo diseñá pa fortalesé nan fe i sirbishi di misionero den teritorionan stranhero. Dia 9 di mart 2002, e 5.554 presentenan a keda enkantá pa skucha e programa di graduashon.

Stephen Lett, kende ta sirbi komo miembro di e Kuerpo Gobernante di Testigunan di Yehova, a kuminsá e programa ku hopi entusiasmo. El a yama tur e invitadonan ku a bini for di diferente parti di mundu bon biní na un manera spesial. Despues el a apliká e palabranan di Hesus, “Boso ta e lus di mundu,” na e trabou di e futuro misioneronan. (Mateo 5:14) El a splika: ‘Den boso asignashonnan boso lo “iluminá” vários aspekto di Yehova su obranan maravioso, i pèrmití esnan di kurason onrado mira e bunitesa di Yehova i di su propósito. Ruman Lett a animá e misioneronan pa usa e lus dje Palabra di Dios pa eksponé e skuridat di doktrina falsu i duna guia na esnan ku ta buska e bèrdat.

Bon Aktitut Ta Vital pa Éksito

Despues di e komentarionan di introdukshon di parti dje presidente di programa, Baltasar Perla, miembro di e Komité di Sukursal di Merka, a duna e promé di un seri di diskurso prepará pa yuda e graduadonan bira misioneronan eksitoso. El a desaroyá e tema “Sea Fuerte, Tene Kurashi i Aktua.” (1 Krónikanan 28:20) Rei Sálomon di Israel di pasado a risibí e tarea difísil di hasi algu ku nunka el a yega di hasi: konstruí un tèmpel den Yerúsalèm. Sálomon a pone man na obra i ku yudansa di Yehova a kompletá e tèmpel. Ruman Perla a apliká e lès na e klas i a bisa: ‘Boso a risibí un asignashon nobo, komo misionero, i boso mester tin kurashi i ser fuerte.’ E garantia ku Yehova lo no bandoná hende tanten ku nan ta leal na dje sigur tabata un konsuelo pa e studiantenan. Ruman Perla a konmové e ouditorio dor di konkluí ku e komentario personal: ‘Boso por logra hopi komo misionero. Ta misioneronan a trese e bèrdat pa ami ku mi famia!’

“Akudí na Yehova pa Éksito” tabata e tema dje diskurso ku Samuel Herd, otro miembro di e Kuerpo Gobernante, a duna. E studiantenan ta kuminsá un karera den e obra di misionero, i nan éksito ta dependé pa gran parti di nan relashon ku Yehova. Ruman Herd a urgi nan: ‘Boso a akumulá hopi konosementu di Beibel atraves di boso estudionan na Galad. Boso a risibí ku goso. Pero awor, pa boso haña berdadero éksito, boso tin ku kuminsá kompartí loke boso a siña.’ (Echonan 20:35) E misioneronan lo tin hopi oportunidat pa hasi esaki ora nan ta ‘basha nan mes’ na fabor di otro hende.—Filipensenan 2:17.

Ki konseho di despedida e instruktornan tabatin pa e studiantenan? Mark Noumair a basa su tema riba Rut 3:18: “Warda te Ora Bo Sa Kon e Asuntu Ta Resultá.” Usando e ehèmpel di Rut ku Noemi, e orador a animá esnan ku a gradua pa tene pleno konfiansa den e areglonan ku e organisashon terenal di Dios a establesé i pa respetá outoridat teokrátiko. Ruman Noumair a konmové e studiantenan ora el a bisa: ‘Por sosodé ku bo no ta komprendé pakiko otronan a tuma un desishon ku ta afektá bo òf kisas bo ta haña ta mihó pa hasi un sierto kos na un otro manera. Kiko lo bo hasi? Lo bo lanta para i tuma asuntunan den bo mes man òf lo bo “warda” i konfia den e direkshon di Dios, ku e siguransa ku despues di tempu, lo e kousa solamente loke ta bon?’ (Romanonan 8:28) E konseho pa ‘konsentrá riba promové interesnan di Reino, fiha riba loke e organisashon di Yehova ta hasiendo en bes di riba diferensianan di personalidat,’ sin duda lo resultá di ta balioso p’e futuro misioneronan den nan asignashon den stranheria.

Wallace Liverance, kende tabata un misionero i kende awor ta sirbi komo instruktor di Galad, a duna e diskurso final den e promé seri di diskurso. E tema di su diskurso tabata “Mantené Bo Enfoke, Keda den Sirbishi di Dios.” El a mustra ku profeta Daniel a diserní for di e kaida di Babilonia i for di loke Yeremías a profetisá ku e liberashon dje israelitanan for di sklabitut tabata serka. (Yeremías 25:11; Daniel 9:2) Daniel tabata sa ku Yehova tin un tempu pa hasi tur kos, i esei a yud’é mantené su enfoke riba kon e propósito di Dios ta desaroyá. En kambio, e israelitanan den e tempu di profeta Hageo a bisa: “E tempu no a yega.” (Hageo 1:2) Nan no a enfoká riba e tempu den kua nan tabata biba, pero nan a kuminsá konsentrá riba nan mes komodidatnan i logronan personal, i a bandoná e trabou pa kua nan a ser librá for di Babilonia, esta, e rekonstrukshon dje tèmpel. Ruman Liverance a konkluí: “Pues, mantené boso enfoke dor di kòrda semper riba e propósito di Yehova.”

E instruktor di Galad Lawrence Bowen a sirbi komo moderador di un parti ku e tema “Yehova Ta Bendishoná Esnan Ku Ta Usa e Palabra Bibu.” (Hebreonan 4:12) E parti aki a trata ku e eksperensianan di sirbishi ku e klas tabatin i ku a resaltá kon Yehova ta bendishoná esnan ku ta usa Beibel ora di prediká i siña. E moderador a mustra ku Hesukristu a pone un ehèmpel ekselente pa tur minister di Dios: ‘Hesus tabatin rason bèrdè ora el a bisa ku loke el a siña no a originá di dje, sino ku el a papia e Palabra di Dios.’ Hende di kurason onrado a rekonosé e bèrdat i a respondé faborablemente na dje. (Huan 7:16, 17) Awe ta meskos.

Galad Ta Prepará Bo pa Tur Bon Obra

Siguientemente, miembronan di famia di Bètel di hopi aña, Richard Abrahamson i Patrick LaFranca a entrevistá seis graduado di Galad ku awor ta sirbiendo den otro formanan di sirbishi di tempu kompleto. Tabata un gran animashon pa esnan ku a gradua di e di 112 klas tende ku añanan despues, e seisnan ei, apesar di tin un otro asignashon awor akí, ainda ta benefisiá di e entrenamentu ku nan a risibí na Galad en konekshon ku studio di Beibel, proyektonan di investigashon i kon pa sali bon ku hende.

Theodore Jaracz, miembro di e Kuerpo Gobernante, a duna e diskurso prinsipal dje programa. E tabata titulá “Loke Nos Ta Logra Ora Nos Ta Wanta Odio Satániko.” Durante e último sinku lunanan, e studiantenan a biba den un ambiente teokrátiko di amor. Sin embargo, manera a bini dilanti den e seshonnan di klas, nos ta biba den un mundu enemigu. Rònt mundu e pueblo di Yehova ta bou di atake. (Mateo 24:9) Usando vários relato di Beibel, ruman Jaracz a mustra ku ‘nos ta e blanko spesial di Diabel. Nos tin ku fortalesé nos relashon ku Yehova i bira fuerte pa enfrentá prueba.’ (Job 1:8; Daniel 6:4; Huan 15:20; Revelashon 12:12, 17) Ruman Jaracz a konkluí ku apesar dje odio kontinuo kontra e pueblo di Dios, ‘ningun arma formá kontra nos lo tin éksito, manera Isaías 54:17 ta bisa. Yehova ta garantisá nos ku lo e libra nos na su debido tempu i manera.’

‘Bon ekipá,’ e graduadonan di e di 112 klas di Galad sin duda lo kontribuí hopi pa aliviá e hamber di alimento spiritual den e paisnan kaminda nan lo bai sirbi. (2 Timoteo 3:16, 17) Nos tin masha gana di tende despues kon nan ta proklamá e mensahe nutritivo na e poblashonnan den e paisnan aki.

[Kuadro na página 23]

ESTADÍSTIKANAN DJE KLAS

Kantidat di pais representá: 6

Kantidat di pais na kua a asigná nan: 19

Kantidat di studiante: 48

Edat promedio: 33,2

Promedio di aña den e bèrdat: 15,7

Promedio di aña den sirbishi di tempu kompleto: 12,2

[Plachi na página 24]

E di 112 Klas di Graduadonan dje Skol Bíbliko di Galad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.