Nos Tin Bon Motibu pa Ta Kontentu

HENTER e kreashon—for di e sèl di mas chikitu te na e super konstelashonnan di galaksia—ta reflehá un sierto órden. Esei no ta nada straño pasobra nos Kreador ‘no ta Dios di desòrdu.’ (1 Kor. 14:33, BPK) E sistema ku Yehova a instituí pa su sirbidónan ador’é tambe ta impreshonante. Sí, Yehova a establesé un organisashon universal ku ta konsistí di míles di miónes di angel den shelu i hende riba tera. I tur e kriaturanan akí, dotá ku inteligensia i boluntat liber, ta sirbié unidamente. Esaki no ta algu impreshonante?

Den Israel di antigwedat, Yerusalèm a representá e parti terenal di Yehova su organisashon. Tantu e tèmpel di Yehova komo e lugá di biba di su rei ungí tabata situá einan. I e stat santu ei tabata masha stimá. Un israelita ku tabata den koutiverio na Babilonia a ekspresá su amor pa e stat santu ei ku e siguiente palabranan: “Laga mi lenga pega na mi shel’i boka, si mi no kòrda riba bo, si mi no konsiderá Yerusalèm komo mi goso di mas grandi.”​—Sal. 137:6.

Abo tambe ta stima e organisashon di Dios? Bo ta kontentu ku bo ta parti di e organisashon ei? Bo yunan sa e historia di Dios su organisashon? Nan sa tambe kon e ta funshoná riba tera? Nan ta komprondé ku nan ta parti di e hermandat mundial di Testigunan di Yehova? Nan ta balorá esaki? (1 Ped. 2:17) Pakiko no implementá e siguiente sugerensianan durante boso Adorashon Komo Famia? Esei lo oumentá boso konosementu i apresio pa Yehova su organisashon.

Konta Bo Yunan Loke A Pasa “e Dianan di Promé Aya”

Tur aña, famianan israelita tabata reuní pa selebrá Pasku Hudiu. Ora e fiesta ei a ser instituí, Moisés a instruí e pueblo: “Ora bo yu hòmber puntra bo, bisando: ‘Kiko esaki ta?’ E ora ei bo mester bis’é: ‘Ku un man poderoso SEÑOR a saka nos for di Egipto, for di e kas di sklabitut.’” (Eks. 13:14) Sí, mayornan israelita mester a sòru pa nan yunan a haña sa loke Yehova a hasi pa su pueblo. I nos por ta sigur ku hopi tata israelita a hasi loke Moisés a manda, pasobra siglonan despues, un israelita a bisa den orashon: “O Dios, ku nos orea nos a tende, nos tatanan a konta nos e obra ku bo a hasi den nan dianan, den e dianan di promé aya.”​—Sal. 44:1.

Pa un hóben awe, kisas e historia di e último 100 añanan di Testigunan di Yehova por parse historia di “dianan di promé aya,” algu ku a sosodé hopi tempu pasá. Awor, kon abo por yuda bo yunan mira e susesonan akí komo historia real? Wèl, algun mayor ta usa e buki Testigunan di Yehova​—Proklamadónan dje Reino di Dios, e Anuario, biografia di rumannan fiel publiká den nos revistanan òf otro informenan tokante nos organisashon, manera por ehèmpel nos DVD nobo tokante Dios su pueblo den tempu moderno. Ademas, e vidionan enkuanto persekushon ku nos rumannan den eks-Union Soviétiko i den Alemania nazi a konfrontá ta animá famianan pa dependé riba Yehova durante prueba. Pues, pakiko no hasi uso di tur e provishonnan akí durante boso Adorashon Komo Famia? Esaki lo fortalesé fe di boso yunan i prepará nan pa enfrentá prueba i mantené nan integridat.

Pero tene kuenta sí ku hóbennan por kansa masha lihé si nan tin ku djis sinta skucha un diskurso tokante historia. P’esei, bo tin ku laga nan tambe partisipá. Kon asina? Lo bo por laga bo yu skohe un pais ku ta interes’é, studia e historia di Testigunan den e pais ei i duna un presentashon di loke el a siña. Tin biaha bo por asta invitá rumannan di bo kongregashon ku tin un trayektoria largu di sirbishi fiel na Yehova pa partisipá na boso Adorashon Komo Famia. Na okashonnan asina, boso por enkurashá boso yunan pa hasi e rumannan akí algun pregunta pa asina nan por kompartí nan eksperensia ku boso famia. Un otro kos ku boso por laga boso yunan hasi ta pinta logronan importante di historia teokrátiko, manera konstrukshon di un sukursal, un kongreso internashonal òf predikashon di kas pa kas den kua e rumannan a usa tokadisko.

Investigá Kon ‘Kada Parti Ta Funshoná’

Apòstel Pablo a kompará e kongregashon kristian ku “kurpa” humano, ku ta “bon hinká den otro i uní pa medio di e kabuyanan di múskulo.” Anto el a bisa: “Si tur e partinan ta funshoná bon, e kurpa ta krese i keda edifiká den amor.” (Efe. 4:16, BPK) I ora nos studia kurpa humano i ta komprondé kon e ta funshoná, nos ta haña mas apresio i rèspèt pa nos Kreador. Di mes manera, ora nos analisá kon Yehova su kongregashon mundial ta funshoná, “e sabiduria multiforme di Dios” lo hasi un gran impreshon riba nos.​—Efe. 3:10.

Yehova a duna nos hopi detaye di e manera ku su organisashon ta funshoná, tantu riba tera komo den shelu. Un ehèmpel di e funshonamentu di su organisashon invisibel ta e manera ku Juan a risibí un revelashon. Beibel ta mustra ku promé, Yehova a transmití su mensahe na Hesukristu, kende “a manda esaki i a komunik’é pa medio di su angel na su sirbidó Juan.” I Juan, na su turno, “a duna testimonio” di loke el a mira. (Rev. 1:​1, 2) Awor si Yehova ta revelá kon su organisashon selestial ta funshoná, no ta lógiko ku e ke pa nos komprondé tambe kon ‘kada parti’ di su organisashon terenal “ta funshoná”?

Por ehèmpel, si boso ta bai haña bishita di e superintendente di sirkuito, pakiko no repasá e siguiente preguntanan ku bo famia? Kiko ta e tareanan di un superintendente biahero? Kon e ta yuda kada un di nos? I ki privilegionan e ta disfrutá di dje? Na un otro okashon, boso por analisá preguntanan manera: Dikon ta importante pa raportá nos sirbishi di vèlt? Kon e organisashon di Dios ta ser finansiá? Kon e Kuerpo Gobernante ta funshoná i kon e ta perkurá kuminda spiritual?

Awor kiko ta e benefisionan ku nos lo disfrutá di dje ora nos ta komprondé kon Yehova su organisashon terenal ta hinká den otro? Tin por lo ménos tres: Nos lo haña mas apresio pa esnan ku ta traha na nos benefisio. (1 Tes. 5:​12, 13) Nos lo ta mas motivá pa sigui guia ku nos ta risibí di ruman hòmbernan ku tin responsabilidat den e organisashon. (Echo. 16:​4, 5) Ademas, nos lo tin mas konfiansa den esnan ku ta dirigí e organisashon di Yehova, pasobra nos ta komprondé ku nan desishon- i instrukshonnan tin base bíbliko.​—Heb. 13:7.

“Pasa dor di Su Palasionan”

“Kana rònt di Sion, i pasa rònt di dje. Konta su torennan; konsiderá su murayanan di defensa; pasa dor di su palasionan; pa bo por konta esaki na e próksimo generashon.” (Sal. 48:​12, 13) Ku e palabranan akí, e salmista a animá e israelitanan pa wak e stat santu mas di aserka. Bo por imaginá bo e bunita rekuerdonan ku famianan israelita tabatin di nan biahenan pa Yerusalèm, di e fiestanan anual ku nan tabata selebrá einan i tambe di e tèmpel impreshonante di e stat? Siguramente nan tabata ansioso pa “konta esaki[nan] na e próksimo generashon.”

Tuma por ehèmpel e reina di Saba, kende na promé instante a reakshoná na un manera sképtiko ora nan a inform’é di Salomon su ekselente gobernashon i gran sabiduria. Kiko a konvens’é ku loke el a tende tabata bèrdat? E mes a bisa: “Mi no a kere nan palabranan te ora mi a bini i a mira ku mi mes wowo.” (2 Kró. 9:6) Sí, loke nos “mes wowo” mira ta hasi un efekto profundo riba nos.

Awor kon bo por yuda bo yunan mira e maravianan di Yehova su organisashon ku nan “mes wowo”? Si tin un sukursal di Testigunan di Yehova kaminda bo ta biba, hasi esfuerso pa bishit’é. Mandy i Bethany a lanta den un bario ku tabata keda un 1500 kilometer for di e Bètel den nan pais. Tòg, nan mayornan tabata hasi esfuerso pa regularmente nan bishitá Bètel komo famia. Mandy i Bethany ta konta: “Promé ku nos a yega di bai Bètel, nos tabata pensa ku ta un lugá laf, kaminda bo ta haña hende grandi so. Pero nos a topa ku personanan yòn, kendenan tabata traha duru pa Yehova i tabata disfrutá di nan trabou! Nos a bin komprondé ku Yehova su organisashon ta kubri mas teritorio ku djis e área chikitu unda nos tabata biba. I kada bishita na Bètel a hala nos mas serka Yehova i a motivá nos mas pa sirbi Yehova.” E echo ku Mandy i Bethany por a kontemplá Dios su organisashon mas di aserka a motivá nan pa bira pionero. I ku tempu, nan a asta haña invitashon pa sirbi temporalmente na Bètel komo boluntario.

Awe tin un medio mas ku nos por hasi uso di dje pa kontemplá Yehova su organisashon; e medio akí no tabata eksistí den Israel di antigwedat. Sí, den añanan resien, vários aspekto di e organisashon di Dios a ser presentá i publiká via vidio i DVD, manera por ehèmpel: Testigunan di Yehova​—Organisá pa Kompartí e Bon Nobo, Henter Nos Asosiashon di Ruman, Te na e Finnan di Tera, i Uní pa Medio di Siñansa Divino. Ora abo i bo famia mira e trabou duru ku bètelitanan, trahadónan boluntario, misioneronan i rumannan ku ta organisá kongresonan ta realisá, boso lo haña mas apresio pa e hermandat mundial.

Ta bèrdat ku e kongregashon ku nos kada un ta pertenesé na dje ta di gran yudansa pa nos den e predikashon di e bon notisia di Reino i ta sostené nos. Sinembargo, ta bon pa abo i bo famia tuma un tiki tempu pa kòrda riba tur “boso rumannan den henter mundu.” Esaki lo yuda boso i boso yunan permanesé ‘firme den fe’ i rekonosé ku nos tur tin bon motibu pa ta kontentu.​—1 Ped. 5:9.

[Kuadro/​Plachi na página 23]

E Organisashon di Dios​—Un Bon Tema pa Studia

Nos tin un abundansia di provishon na nos disposishon ku por yuda nos konosé e historia di Yehova su organisashon i komprondé kon esaki ta funshoná. E siguiente preguntanan por yuda nos den nos estudio:

☞ Kon e trabou di superintendentenan biahero a kuminsá den nos tempu?​—Testigunan di Yehova​—Proklamadónan dje Reino di Dios, página 222-228 (na spañó).

☞ Dikon e “Dia di Yunan,” na e asamblea di 1941, tabata asina spesial?—Testigunan di Yehova—Proklamadónan dje Reino di Dios, página 85-86, 88 (na spañó).

☞ Kon Kuerpo Gobernante ta tuma desishon?​—“Testimonio Kabal” di e Reino di Dios, página 108-114 (na spañó).