Su Profesianan Semper A Kumpli

DIKON BEIBEL TA DISTINTO? Loke hende a yega di pronostiká den pasado sin yudansa di Dios tabata ambiguo i inkonfiabel, i e horoskopnan di awendia no ta mihó. Ademas, personanan ku ta pronostiká futuro a base di desaroyonan aktual apénas ta purba di profetisá susesonan spesífiko siglonan adelantá. Na kontraste ku esei, Beibel su profesianan ta detayá i semper ta kumpli maske nan a ser profetisá “for di tempunan antiguo.”—Isaías 46:10.

UN EHÈMPEL: Den siglo seis promé ku nos era, profeta Daniel a haña un vishon ku a mustra ku Gresia lo a derotá Medo-Persia den un lapso di tempu masha kòrtiku. Ademas, e vishon a mustra ku e reinado di e rei viktorioso di Gresia lo a “kibra,” òf yega na su fin, asina ku e rei “bira poderoso.” Anto ken lo a remplasá e rei akí? Daniel a skirbi: ‘Kuater reino lo lanta for di su nashon, ma no ku su poder.’—Daniel 8:5-8, 20-22.

LOKE HISTORIA TA MUSTRA: Mas ku 200 aña despues di e tempu di Daniel, Alexander e Grandi a bira rei di Gresia. I den solamente dies aña, el a derotá e Imperio Medo-Persia i a ekstendé e imperio griego te na Riu Indo (ku tabata situá den e pais ku awe ta Pakistan). Pero diripiente, Alexander a muri na edat di 32 aña. Despues, su generalnan a bringa ku otro na Ipso na Asia Menor pa teritorio, i e kuaternan ku a gana e bataya a parti e Imperio griego entre nan. Pero, ningun di nan no a bira poderoso manera Alexander.

KIKO ABO TA PENSA? Tin un otro buki di kua nos por bisa ku su profesianan semper a kumpli? Òf Beibel ta e úniko?