En Busca di Pronósticonan Confiabel
DJIS despues cu e rey macedonio cu a bira conocí como Alexander e Grandi a subi trono na 336 P.E.C., el a bishitá e oráculo di Delfos, un santuario caminda tabata consultá diosnan, den e parti central di Grecia. Su plannan ambicioso pa futuro no tabata nada ménos cu conkistá gran parti dje mundu dje tempu ei. Pero e tabata kier a haña siguransa divino cu su tremendo tarea lo a logra. Segun leyenda, riba e dia cu el a bishitá Delfos, no tabata permisibel pa consultá e sacerdotisa dje oráculo. Dor cu Alexander no kier a bai sin haña un contesta, el a insistí i a obligá e sacerdotisa pa dun’é un pronóstico. Den su frustracion, e sacerdotisa a sclama: “Ai, mucha, bo ta invencibel!” E rey yong a tuma esei como un señal faborabel, esta, unu cu ta primintí un campaña militar victorioso.
Pero, Alexander lo tabata muchu mas mihó informá dje resultado di su campaña si el a investigá e profecianan hañá den e buki bíblico di Daniel. Cu un exactitud remarcabel, nan a papia di su conkistanan rápido. Hende ta bisa cu despues di tempu Alexander a haña un oportunidad pa mira loke Daniel a skirbi tocante dje. Segun e historiadó hudiu Josefo, ora e rey macedonio a drenta Jerusalem, nan a mustr’é e profecia di Daniel—supuestamente capítulo 8 dje buki ei. (Daniel 8:5-8, 20, 21) Tin informe cu ta debí na esaki, Alexander a spar e stad for di su ehército destructivo.
Un Necesidad Humano Inherente
Sea rey of hende comun, di tempu antiguo of actual—semper hende tabatin e necesidad pa pronósticonan confiabel relacioná cu futuro. Como criatura inteligente, como hende nos ta studia pasado, ta conciente di presente i ta specialmente interesá den futuro. Un proverbio chines ta bisa masha asertá: “Esun cu por premirá cosnan tres dia adelantá lo ta ricu pa miles di aña.”
Atrabes di épocanan, miyones di hende a purba wak den futuro dor di consultá cu loke nan a considerá divino. Tuma por ehempel e griegonan di antigwedad. Nan tabatin masha hopi oráculo sagrado, manera esnan di Delfos, Delos i Dodona, caminda nan tabata bai pa busca informacion cerca nan diosnan relacioná cu desaroyonan político of militar, i tambe pa asuntunan personal manera biahe, matrimonio i yu. No ta rey i lidernan militar so, sino tribu i estadonan completo tabata busca guia for dje region di spiritu mediante e pronósticonan dje oráculonan aki.
Segun un profesor, awor aki “organisacionnan dedicá na studia futuro ta plamando rápidamente.” Tog, hopi hende ta preferá di ignorá e único fuente exacto di profecia: Bijbel. Nan ta descartá categóricamente cualkier posibilidad di cu profecia di Bijbel ta contené net e informacion cu nan ta busca. Algun erudito ta bai asina leu di pone profecia di Bijbel riba e mésun liña cu e prediccionnan cu e sacerdotisanan dje oráculonan di antigwedad tabata duna. I, por lo general, hopi sképtico moderno tin un prehuicio contra profecia di Bijbel.
Nos ta invitá bo pa bo mes analisá e registro. Kico un comparacion cuidadoso di prediccionnan di Bijbel i oráculonan, of pronósticonan, humano ta revelá? Bo por confia profecia di Bijbel mas cu e pronósticonan antiguo ei? I bo por edificá bo bida cu confiansa rond di profecia di Bijbel?
[Plachi na página 3]
Bijbel a papia adelantá di Alexander su conkistanan rápido
[Rekonosementu]
Cortesía del Museo del Prado, Madrid, Spaña
[Plachi na página 4]
Alexander e Grandi
[Rekonosementu]
Musei Capitolini, Roma
[Rekonosementu pa Potrèt na página 2]
COVER: General Titus and Alexander the Great: Musei Capitolini, Roma