Tin un Skuchador di Orashon?

“Ántes, mi tabata duda ku Dios ta eksistí. Pero tòg tabatin biaha ku mi tabata hasi orashon. Aunke mi no tabatin sigur ku tin un persona ta skucha mi, den mi kurason mi tabata deseá esei. Mi tabata infelis i sin ningun propósito den bida. Mi tabatin miedu di kere den Dios pasobra mi tabata pensa ku ta hende débil so ta kere den Dios.”—PATRICIA,a IRLANDA.

ABO ta pensa meskos ku Patricia? Bo ta hasi orashon aunke bo ta duda ku Dios ta eksistí? Si ta asina, bo no ta e úniko.

◼ Un enkuesta ku nan a realisá bou di 2.200 britániko a mustra ku ta 22 porshento di e personanan akí so ta kere ku ta eksistí un Kreador ku ta skucha orashon. Sinembargo, 55 porshento a atmití ku nan sa hasi orashon de bes en kuando.

◼ Un enkuesta ku nan a hasi bou di 10.000 persona prosedente di kuater kontinente a mustra ku kasi 30 porshento di esnan ku ta konsiderá nan mes ateista ta hasi orashon.

Dikon Hende Ta Duda?

Un hòmber di Inglatera ku yama Allan ta splika dikon ántes e tabata bisa ku e no ta kere den Dios: “Mi tabata pensa ku hende a bini ku religion djis pa tene otro bou di kontrol i pa gana plaka. Ademas, mi tabata bisa: ‘Si Dios ta eksistí, lo no tabatin asina tantu inhustisia.’ Asina mes, tabatin biaha ku mi tabata sinta na un lugá trankil i papia ku ‘algu.’ Mi tabata puntra mi mes, ‘Kiko ta e propósito di bida?’”

Naturalmente, tin vários motibu pakiko hende ta duda ku tin un persona ku ta kontestá orashon. Den hopi kaso, hende ta duda debí ku nan no a haña kontesta pa preguntanan, manera:

◼ Tin un Kreador?

◼ Dikon religion ta kousa asina tantu problema?

◼ Dikon Dios ta permití sufrimentu?

Si bo tabata sa kontesta pa e preguntanan akí, lo bo a hasi orashon ku mas konvikshon?

[Nota]