“Mi Ta ku Boso”
“Hopi hende lo kore pariba-pabou, i [“berdadero,” NW] konosementu lo oumentá.”—DAN. 12:4.
1, 2. (a) Kon nos por sa ku Hesus “ta ku” su disipelnan awe i ku lo e “ta ku” nan den futuro? (b) Segun Daniel 12:4, kiko lo ta e resultado ora hende studia e Palabra di Dios diligentemente?
BO POR imaginá bo kon bo bida lo ta den Paradeis? Tur mainta, bo ta lanta fit, yen di smak i sin ningun doló. Bo no tin ningun problema mas ku salú. Tur bo sentidonan ta funshoná perfektamente: Bo no tin niun problema ku bista, oido, olfato, takto ni ku bo sentido di smak. Bo ta yen di energia, bo ta gusta bo trabou, bo tin hopi amigu i bo no tin ningun preokupashon mas. Tur esaki ta bendishonnan ku lo bo por disfrutá di dje bou di e Reino di Dios. Sí, Kristu Hesus, e Rei nombrá, lo bendishoná humanidat i lo sòru pa tur hende siña tokante Yehova.
2 I Yehova, na su turno, lo yuda su fiel sirbidónan segun ku nan ta siña hende rònt mundu tokante dje. De echo, tantu Yehova komo su Yu Hesukristu semper a yuda nos den e trabou di prediká. Promé ku Hesus a regresá shelu, el a bisa su fiel disipelnan: “Mi ta ku boso.” Ku e palabranan akí, Hesus a primintí ku lo e sigui yuda su disipelnan. (Lesa Mateo 28:19, 20.) Awor, pa fortalesé nos fe den e promesa akí, laga nos trata un profesia ku Daniel a skirbi mas ku 2.500 aña pasá, tempu ku e tabata na Babilonia. Daniel a profetisá ku den nos tempu ‘hopi hende lo kore pariba-pabou i ku berdadero konosementu lo oumentá.’ (Dan. 12:4) Nos ta komprondé ku e ekspreshon “kore pariba-pabou” den e versíkulo akí ta nifiká studia diligentemente. Pues, e profesia ta indiká ku hende ku ta studia e Skritura diligentemente lo haña berdadero konosementu, esta, konosementu eksakto di e Palabra di Dios. Ademas, e profesia ta bisa ku ‘berdadero konosementu lo oumentá.’ Pues, personanan ku haña e konosementu akí lo asept’é i kompartí esaki ku otro hende. I ta rònt mundu hende lo siña e bèrdatnan akí. Awor, laga nos analisá kon e profesia akí a kumpli. Esaki lo fortalesé nos fe ku Hesus en bèrdat ta ku su disipelnan awe i ku Yehova lo kumpli ku tur su promesanan pa futuro.
KRISTIANNAN SINSERO TA HAÑA BERDADERO “KONOSEMENTU”
3. Kiko a pasa despues ku e apòstelnan a muri?
3 Di antemano apòstel Pablo a bisa ku “lo lanta hòmbernan ku lo trose e bèrdat.” I e apostasia akí a kuminsá despues di e morto di e apòstelnan i a plama manera kandela. (Echo. 20:28-30; 2 Tes. 2:1-3) Pa sientos di aña, ni hende ku a yama nan mes kristian no tabatin ‘berdadero konosementu’ di e Skritura. Lidernan religioso tabata pretendé ku nan ta kere den e Skritura, pero en realidat nan tabata siña hende “siñansa di demoño,” mentiranan ku ta desonrá Dios. (1 Tim. 4:1) Por ehèmpel, nan tabata siña hende ku Dios ta parti di un Trinidat, ku alma no ta muri i ku tin alma ku lo kima eternamente den fièrnu di kandela. P’esei, hopi hende no tabata sa e bèrdat tokante Dios.
4. Kon un grupo di kristian den dékada 1870 a kuminsá buska e bèrdat?
4 Pero kos a kambia den dékada 1870, esta, un 40 aña promé ku “e último dianan” a kuminsá. Durante e tempu ei, un grupo chikitu di kristian na Pennsylvania, Merka, tabata bini huntu pa analisá Beibel diligentemente pa haña ‘berdadero konosementu.’ (2 Tim. 3:1) Nan a yama nan mes Studiantenan di Beibel. E personanan akí tabata hende humilde, ku sinseramente tabata ke hasi Dios su boluntat. Nan no tabata e ‘hendenan sabí i intelektual’ di kendenan Hesus a bisa ku berdadero konosementu lo a keda skondí pa nan. (Mat. 11:25) E Studiantenan di Beibel tabata hasi orashon pidi Dios su guia, i nan tabata lesa i analisá e Skritura kuidadosamente i meditá profundamente riba loke nan a lesa. Nan tabata kompará diferente pasashinan bíbliko ku otro i analisá loke otro hende a skirbi tokante esakinan. Gradualmente, nan a deskubrí bèrdatnan ku pa hopi siglo tabata skondí.
5. Ku ki propósito a publiká e seri di tratado titulá The Old Theology (Teologia di Antaño)?
5 E Studiantenan di Beibel tabata masha kontentu ku loke nan a siña. Pero nan no a laga e konosementu akí hasi nan orguyoso ni nan no a hasi komo si fuera ta algu nobo nan tabata proklamá. (1 Kor. 8:1) Al kontrario, nan a publiká un seri di tratado titulá The Old Theology (Teologia di Antaño). Nan meta tabata pa yuda lektornan komprondé bèrdatnan bíbliko ku semper tabata registrá den Beibel. E promé tratadonan a yuda hende haña konosementu di Beibel di manera ku nan por a rechasá “tur tradishon falsu” i aseptá e “teologia di antaño,” esta, siñansa berdadero ku Hesus i e apòstelnan a proklamá.—The Old Theology, num. 1, aprel 1889, pág. 32.
6, 7. (a) Ki bèrdatnan Testigunan di Yehova a haña sa desde dékada 1870? (b) Kiko abo ta kontentu di a siña?
6 No tin duda, desde dékada 1870, e Studiantenan di Beibel, awor Testigunan di Yehova, a haña sa hopi bèrdat maravioso.a No ta trata aki di bèrdatnan monótono i di nivel akadémiko ku teólogonan mester debatí riba dje. Nan ta bèrdatnan fasinante ku ta yuda hende mehorá nan kalidat di bida i ku ta duna goso i speransa. Nan ta yuda nos konosé nos Dios amoroso, Yehova, i haña sa kiko ta su boluntat. Nan ta revelá ken Hesus ta, pakiko el a bini na tera i muri i kiko e ta hasiendo awor. Es mas, e bèrdatnan presioso akí ta yuda nos komprondé dikon Dios ta permití maldat, dikon nos ta muri, kon nos mester hasi orashon i kiko nos mester hasi pa nos por ta berdaderamente felis.
7 Awor nos por komprondé profesianan bíbliko ku pa siglonan tabata “skondí” i ku ta kumpliendo den tempu di fin. (Dan. 12:9) Hopi di e profesianan akí ta registrá den e Evangelionan i den e buki di Revelashon. Por ehèmpel, Yehova a yuda nos haña sa di susesonan ku nos no por a mira ku nos propio wowonan, manera por ehèmpel, e koronashon di Hesus, e guera ku tabatin den shelu i ku Satanas a ser bentá abou na tera. (Rev. 12:7-12) Ademas, Yehova ta yuda nos komprondé nifikashon di kosnan ku nos por mira, manera por ehèmpel guera, temblor, malesa, skarsedat di kuminda i e maldat ku ta hasi nos tempu “krítiko, difísil pa trata kuné.”—2 Tim. 3:1-5; Luk. 21:10, 11.
8. Ken nos ta gradisí pa e kosnan ku nos a mira i tende?
8 Hesus a bisa su disipelnan: “Felis ta e wowonan ku ta mira loke boso ta mira. Pasobra mi ta bisa boso: Hopi profeta i rei a deseá di mira loke boso ta mirando, ma nan no a mira nan, i di tende loke boso ta tendiendo, ma nan no a tende nan.” (Luk. 10:23, 24) Sí, di bèrdat nos ta felis pasobra Yehova Dios a laga nos mira i komprondé e kosnan akí. Ademas, nos ta gradisidu ku e ta usa “e ayudante,” esta, su spiritu santu, pa yuda nos “komprondé e bèrdat plenamente.” (Lesa Huan 16:7, 13.) P’esei, laga nos semper balorá e bèrdat presioso akí i kompartié ku otro hende.
“HOPI” HENDE TA ASEPTÁ ‘BERDADERO KONOSEMENTU’
9. Ki anunsio a sali den e Toren di Vigilansia di aprel 1881?
9 Na aprel 1881, un dos aña despues ku e promé edishon di e revista Toren di Vigilansia a ser publiká, e revista akí a presentá un artíkulo ku e tema: “Tin Mester di 1.000 Predikadó.” E artíkulo a animá ‘tur hende ku por a dediká mitar òf mas di nan tempu eksklusivamente na e trabou di Señor pa bira colporteur, òf pionero.’ E personanan akí mester a bai tur kaminda ku nan tabata por pa buska kristiannan sinsero, esta, hende ku tabata stima Dios pero ku no tabatin konosementu eksakto, i siña nan e bèrdat tokante Dios i su Palabra.
10. Kon hende a reakshoná na e yamada pa predikadó di tempu kompleto?
10 E anunsio di e Studiantenan di Beibel a indiká ku nan a komprondé ku e trabou di prediká ta masha importante i ku tur kristian berdadero mester kumpli ku esaki. Pero e echo ku nan tabata buska 1.000 predikadó a demostrá ku nan tabata masha optimista, pasobra, e tempu ei, ta un shen hende so tabata asistí na nan reunionnan. Sinembargo, hopi hende ku a lesa un tratado òf revista a realisá ku nan a haña e bèrdat i tabata kla pa aseptá e invitashon. Por ehèmpel, na aña 1882, un persona na Lònden, Inglatera, kende a lesa un edishon di e Toren di Vigilansia i un foyeto ku e Studiantenan di Beibel a publiká, a skirbi: “Por fabor, siña mi kon i kiko pa prediká pa mi por kumpli ku e trabou bendishoná akí ku ta e boluntat di Dios.”
11, 12. (a) Ki meta e pioneronan tabatin? (b) Kon e pioneronan tabata forma “klas,” òf kongregashon, nobo?
11 Na aña 1885, tabatin mas o ménos 300 Studiante di Beibel sirbiendo komo pionero. E sirbidónan di tempu kompleto akí tabatin e mesun meta ku nos tin awe: hasi hende disipel di Hesukristu. Sinembargo, nan manera di hasi disipel tabata diferente for di esun di nos. Generalmente, nos ta studia Beibel ku ún persona a la bes. I e ora ei, nos ta invitá e studiante di Beibel pa asistí na e reunionnan di kongregashon. Pero ántes, e pioneronan tabata laga buki serka e personanan i despues tabata invitá tur esnan interesá pa bini huntu pa studia Beibel ku nan. Pues, en bes di studia individualmente ku e personanan, nan tabata forma kongregashon, ku e tempu ei nan tabata yama “klas.”
12 Na 1907, por ehèmpel, un grupo di pionero a bai un sierto stat pa buska tur persona ku tabatin algun buki di e kolekshon di Ourora di Milenio (ku tabata yama tambe Estudio di e Skritura). E Toren di Vigilansia a bisa ku nan ‘a reuní e hendenan interesá akí pa un reunion den kas di un di esnan interesá. Henter un djadumingu, un pionero a papia ku nan tokante e Plan Divino di Épokanan. E siguiente djadumingu, el a enkurashá tur esnan presente pa sigui bini reunion tur djadumingu.’ Pero na aña 1911, e rumannan a introdusí un otro método pa hasi disipel. Sinkuent’i ocho superintendente biahero a bishitá diferente lugá na Merka i na Canada pa duna diskurso públiko. E rumannan akí tabata tuma nòmber i adrès di personanan interesá ku a bin skucha e diskursonan akí. Despues, nan tabata parti e personanan akí den “klas,” òf grupo, nobo ku a kuminsá reuní na diferente kas. Na 1914, tabatin 1.200 kongregashon di Studiantenan di Beibel rònt mundu.
13. Dikon bo ta haña e resultadonan di e trabou di prediká asombroso?
13 Awe, tin mas o ménos 895.800 ruman ta sirbi komo pionero regular den 109.400 kongregashon rònt mundu. Aktualmente, tin kasi ocho mion hende ku a aseptá e bèrdat i ku ta biba na armonia ku ‘berdadero konosementu.’ (Lesa Isaías 60:22.)b Esaki ta un logro asombroso, mirando e echo ku Hesus a profetisá ku hopi “hende lo odia” su disipelnan. Ademas, el a bisa ku su siguidónan lo ser persiguí, enkarselá i asta matá. (Luk. 21:12-17) Ta bèrdat ku Satanas i su demoñonan i hopi hende ta purba stòp e trabou di prediká. Pero apesar di esei, Yehova su pueblo ta sigui kosechá bon resultado den e trabou di hasi disipel. Awe, nan ta prediká den “henter e tera habitá:” den selvanan tropikal te na lugánan mas friu, den seru, den desierto, den stat i na lugánan kaminda tin masha poko hende ta biba. (Mat. 24:14) Sin Yehova su yudansa nan lo no por a hasi tur e trabou akí.
‘BERDADERO KONOSEMENTU TA OUMENTÁ’
14. Kon nos literatura a kontribuí na oumento di ‘berdadero konosementu’?
14 ‘Berdadero konosementu’ ta sigui oumentá pasobra tin hopi publikadó di e bon notisia. Nos literatura tambe ta kontribuí na e oumento akí. Na yüli 1879, e Studiantenan di Beibel a publiká e promé edishon di e revista akí, ku e tempu ei tabata yama E Toren di Vigilansia di Sion i Anunsiante dje Presensia di Kristu. Nan a paga un kompania pa imprimí kasi 6.000 ehemplar di e edishon ei na ingles. Charles Taze Russell, kende tabatin 27 aña di edat e tempu ei, a ser skohí komo editor di e revista akí. E i sinku otro Studiante di Beibel eksperensiá tabata skirbi e artíkulonan. Awe, E Toren di Vigilansia ta ser publiká den 195 idioma. I e ta e revista mas distribuí na mundu, ku un sirkulashon di 42.182.000 di kada edishon. Na di dos lugá ta e revista ¡Despertad! ku ta ser publiká den 84 idioma i ku tin un sirkulashon di 41.042.000. Ademas, un 100 mion buki i Beibel ta ser imprimí tur aña.
15. Kon e imprenta di nos literatura ta ser finansiá?
15 E inmenso trabou akí ta ser finansiá pa medio di donashon boluntario. (Lesa Mateo 10:8.) Esaki ta laga ekspertonan den e ramo di imprenta babuká, pasobra nan sa kuantu e mashinnan, papel, enk i otro material di imprenta ta kosta. Un ruman hòmber ku ta kumpra material pa e imprentanan di Bètel a bisa: “Empresarionan ku bishitá nos imprentanan ta keda mashá strañá ku nos por produsí asina tantu literatura ku mashinnan asina moderno pa medio di donashon boluntario. Ademas, nan ta keda asombrá ku tin asina tantu trahadó yòn i felis na Bètel.”
KONOSEMENTU DI DIOS LO YENA TERA
16. Ku ki propósito ‘berdadero konosementu’ ta oumentá?
16 ‘Berdadero konosementu’ ta oumentá pa un bon propósito. Dios su boluntat ta pa “tur sorto di hende ser salbá i yega na un konosementu eksakto di e bèrdat.” (1 Tim. 2:3, 4) Sí, Yehova ke pa hende haña sa e bèrdat pa nan por ador’é na e manera korekto i risibí su bendishon. I pa medio di e trabou di prediká, Yehova a perkurá pa hende haña ‘berdadero konosementu.’ Di e manera ei, el a reuní primeramente e grupo fiel di rumannan ungí. Awor, for di “tur nashon, tribu, pueblo i idioma,” e ta reuniendo “un multitut grandi” ku tin e speransa di biba pa semper riba tera.—Rev. 7:9.
17. Kiko e oumento di adoradó berdadero ta indiká?
17 E oumento di adoradó berdadero durante e último 130 añanan akí ta un prueba palpabel ku Dios i su rei nombrá, Hesukristu, ta ku Yehova su sirbidónan riba tera. Den ki sentido? Wèl, nan ta guia, protehá, organisá i eduká nan. Asina Yehova ta kumpli ku su promesa di yuda hopi hende haña e bèrdat. Pues, nos por tin sigur ku lo e kumpli tambe ku su promesanan pa futuro. Sí, “tera lo ta yen di e konosementu di SEÑOR, manera awa ta tapa laman.” (Isa. 11:9) Bo por imaginá bo tur e bendishonnan ku humanidat lo risibí e tempu ei?
[Nota]
a Nos ta animá bo pa wak e DVD Testigunan di Yehova—Un Historia di Fe Bibu, Parti 1: Nan Ta Sali for di Skuridat i esun Testigunan di Yehova—Un Historia di Fe Bibu, Parti 2: Nan Ta Laga Nan Lus Bria.
b Wak E Profesia di Isaías—Lus pa Henter Humanidat II, página 320.
[Plachi na página 14]
E Studiantenan di Beibel tabata hende humilde ku sinseramente tabata ke hasi Dios su boluntat
[Plachi na página 15]
Yehova ta balorá boso esfuerso pa plama ‘berdadero konosementu’ di Dios