BO TABATA SA?

Kon e hudiunan di promé siglo tabata prepará nan mortonan pa entiero?

E hudiunan tabata dera nan mortonan hopi lihé despues di fayesimentu, por lo general riba e mesun dia. Tabatin dos motibu pakiko nan tabata hasi esei mesora. Di promé, kadaver ta putri lihé den e klima kayente di Medio Oriente. Di dos, hende di e tempu ei tabata pensa ku tabata un falta di rèspèt pa e defuntu i su famia si a laga un kurpa sin dera pa dianan largu.

E evangelionan i e buki di Echonan ta menshoná por lo ménos kuater entiero ku a tuma lugá riba e dia ku e persona a muri. (Mateo 27:57-60; Echonan 5:5-10; 7:60–8:2) Siglonan mas promé, Yakòb su esposa stimá Rakel a muri tempu ku Yakòb i su famia tabata di biahe. En bes di hiba su kurpa bèk na e lugá kaminda nan tabatin nan graf di famia, Yakòb a der’é den un graf “na kaminda pa . . . Bètlehèm.”—Génesis 35:19, 20, 27-29.

E relatonan di Beibel relashoná ku entiero ta revelá ku e hudiunan tabata prepará e kadaver masha bon mes pa entiero. Famia i amigunan tabata laba kurpa di e defuntu, hunt’é ku puiru ku ta hole dushi i zeta di hopi balor i lor’é den paña. (Huan 19:39, 40; Echonan 9:36-41) Anto bisiña i otro hende tabata bini pa ekspresá nan tristesa i konsolá e famia.—Marko 5:38, 39.

Nan a dera Hesus segun e kustumbernan hudiu?

Hopi famia hudiu tabata dera nan defuntunan den kueba i graf ku nan tabata koba den baranka moli. Esakinan tabata komun den vários parti di Israel. Nan tabata sigui e tradishon ku e patriarkanan a establesé. Abraham, Sara, Isak i Yakòb tabata entre e hendenan derá den e kueba di Makpela pegá ku Hebròn.—Génesis 23:19; 25:8, 9; 49:29-31; 50:13.

Nan a dera Hesus den un graf kobá den baranka. (Marko 15:46) Por lo general, e boka di e grafnan ei tabata smal. Den e grafnan akí tabatin vários hòl ku nan tabata koba, den kua nan tabata pone e kurpanan di nan famia ku a muri. Despues ku e karni a putri kaba na nada, nan tabata kohe e wesunan seku i pone nan den un kahita di piedra ku tabata yama osario, segun e kustumbernan den tempu di Hesus. Di e manera akí, e famia por a traha lugá den e graf pa futuro entieronan.

E hudiunan no tabatin mag di hasi preparashon pa entiero riba sabat, ya ku segun e Lei di Moises esei tabata un dia di sosiegu. Komo ku Hesus a muri mas o ménos tres ora promé ku sabat a kuminsá, Hose di Arimatea i algun hende mas a der’é sin ku nan a kaba di prepará su kurpa pa entiero. (Lukas 23:50-56) Pa e motibu ei, algun di Hesus su disipelnan a bai na e graf despues di sabat ku e intenshon di kompletá e proseso.—Marko 16:1; Lukas 24:1.