Hende Por Hasi Dios Tristu​—Kon Nos Por Hasié Kontentu?

Bo a yega di sinti un doló asina fuerte ku el a pone bo yora?—a Esei a yega di sosodé ku kasi tur hende. Ma tin biaha no ta nos kurpa ta hasi doló. Kisas un hende ta papia malu di nos i ta bisa kosnan ku no ta bèrdat. Esei por hasi doló, no ta bèrdat?— Dios tambe por sinti doló ora nan ta gaña riba dje. Laga nos papia tokante esaki i mira kon nos por hasi Dios kontentu en bes di kous’é doló.

Beibel ta bisa ku algun hende ku a pretendé ku nan ta stima Dios a “hasié tristu.” Sí, nan a kousa Dios doló! Klaru, ningun hende no por pone Yehova Dios su kurpa sinti doló. E ta todopoderoso. Laga nos mira anto dikon Yehova ta sinti doló òf ta bira tristu ora nos no ta hasi loke e ta manda nos hasi.

E promé dos hendenan ku Yehova a krea riba tera a hasié masha tristu. El a pone nan den e Paradeis riba tera ku tabata yama e “Hòfi di Edén.” Ken e dos hendenan akí tabata?— Sí, tabata Adam ku Eva. Laga nos wak kiko nan a hasi ku a pone Yehova bira tristu.

Despues ku Yehova a pone nan den e hòfi ei, el a bisa nan pa kuid’é. Tambe el a bisa nan ku nan por a haña yu i biba den e hòfi pa semper. Pero promé ku Adam ku Eva a haña yu, algu teribel a pasa. Bo sa kiko a pasa?— Un angel a pone Eva desobedesé Dios, i despues Adam tambe a desobedes’é. Laga nos wak kon esei a sosodé.

E angel a laga un kolebra hasi manera kos ku e por papia. Eva a gusta loke el a tende—e kolebra a bis’é ku lo e bira “manera Dios.” P’esei el a hasi loke e kolebra a bis’é hasi. Bo sa kiko e kolebra a bis’é?—

Eva a kome for di e palu ku Yehova a taha Adam di kome for di dje. Promé ku Dios a krea Eva, el a bisa Adam: “Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.”

Eva tabata sa di e lei ei. Ma el a keda mira e palu i a ripará ku e “tabata bon pa kuminda, i ku e tabata un delisia pa bista . . . El a kohe di su fruta i a kome.” Despues el a duna Adam e fruta, i Adam tambe “a kome.” Dikon bo ta kere Adam a hasi esei?— Esei ta pasobra Adam tabata stima Eva mas ku Yehova. El a preferá di agradá Eva en bes di agradá Dios. Pero ta mas importante pa obedesé Yehova ku kualke otro persona!

Bo ta kòrda e kolebra ku a papia ku Eva? Meskos ku un hende por laga parse ku ta un pòpchi ta papia, un persona a hasi manera kos ku ta e kolebra tabata papia. Ta bos di ken tabata bini for di e kolebra?— Tabata bos di e “kolebra original, esun ku yama Diabel i Satanas.”

Bo sa kon bo por hasi Yehova kontentu?— Bo por hasi Yehova kontentu si bo ta hasi bo bèst pa obedes’é semper. Satanas ta bisa ku e por pone tur hende hasi loke e ke pa nan hasi. P’esei Yehova ta animá nos: “Sea sabí, mi yu, i hasi mi kurason kontentu, pa mi por kontestá esun ku reprochá mi.” Satanas ta reprochá òf hasi chèrchi di Yehova. E ta bisa ku e por kita tur hende di sirbi Yehova. Pues, si abo obedesé Yehova i sirbié, esei lo hasi Yehova masha kontentu. Lo bo hasi bo bèst pa logra esei?—