Adorá Yehova, e Rei di Eternidat

1, 2. (a) Ken ta “e Rei di eternidat,” i dikon e título ei ta na su lugá? (Wak e promé plachi.) (b) Kiko ta atraé nos na e manera ku Yehova ta goberná nos?

REI SOBHUZA II di Swazilandia a goberná pa kasi 61 aña. Esei ta un rèkòrt impreshonante pa un monarka den nos tempu. Pero pa impreshonante ku e durashon di Rei Sobhuza su gobernashon por tabata, tin un rei kende su reinado no tin límite, ya ku su bida no ta kòrtiku manera di hende. De echo, Beibel ta referí na dje komo “e Rei di eternidat.” (1 Tim. 1:17) E úniko Rei ku meresé e título akí ta Yehova Dios. Beibel ta bisa ku e “ta Rei pa semper i semper.”—Sal. 10:16.

² E tempu largu ku Dios tin komo Rei ta hasi su gobernashon kompletamente distinto for di esun di kualke hende. Pero loke mas ta atraé nos na Yehova ta su manera di goberná. Un rei ku a goberná 40 aña riba Israel di antigwedat a alabá Yehova ku e palabranan akí: “SEÑOR ta yen di kompashon i grasia, kende no ta rabia lihé, i ta abundá den miserikòrdia. SEÑOR a establesé su trono den e shelunan; i su reino ta goberná riba tur kos.” (Sal. 103:8, 19) Yehova ta mas ku nos Rei. E ta nos Tata tambe; nos amoroso Tata selestial. Esaki ta lanta dos pregunta: Den ki sentido Yehova ta manera un Tata? I desde e rebelion den Edén, kon Yehova a demostrá ku ketu bai e ta Rei di universo? E kontestanan riba e preguntanan akí lo motivá nos pa hala mas serka Yehova i sirbié di henter nos kurason.

E REI DI ETERNIDAT TA KREA UN FAMIA UNIVERSAL

3. Ken tabata e promé miembro di Yehova su famia universal, i ken mas a ser kreá komo “yu” di Dios?

³ Yehova lo mester tabata hopi kontentu ora el a krea su promé Yu! E no a trat’é manera un siudadano inferior. Al kontrario, el a stim’é manera un Yu i a invit’é pa partisipá den e obra gososo di krea otro siudadanonan perfekto. (Kol. 1:15-17) Nan a inkluí miónes di angel. Beibel ta bisa ku e angelnan akí ta sirbi Yehova ku alegria i “ta hasi su boluntat.” I Yehova ta onra nan yamando nan su “yu hòmbernan.” Nan ta parti di Su famia universal.—Sal. 103:20-22; Yòb 38:7.

4. Kon hende a bira parti di Yehova su famia universal?

⁴ Despues ku Yehova a krea e tera, el a hasi su famia universal mas grandi. Kon? Wèl, despues ku Yehova a prepará e tera manera un kas bunita ku por sostené su mes, el a yega na e kulminashon di su obranan terenal: e promé hòmber, Adam, ku el a krea den Su imágen. Esei tabata e chèri riba e bolo. (Gén. 1:26-28) Komo e Kreador, Yehova a ferwagt ku Adam lo a obedes’é. Manera un Tata, Yehova a dun’é tur instrukshon ku amor i bondat. I e instrukshonnan ei sigur no a limitá hende su libertat innesesariamente.—Lesa Génesis 2:15-17.

5. Kiko Yehova a hasi pa yena e tera ku su yunan humano?

⁵ Distinto for di hopi rei humano, Yehova ta trata su siudadanonan manera miembronan di su famia. E tin asina tantu konfiansa den nan ku gustosamente e ta enkargá nan ku responsabilidat. Por ehèmpel, el a duna Adam outoridat riba otro kriaturanan i asta a enkarg’é ku e tarea di duna e bestianan nòmber, un tarea agradabel pero ku no tabata fásil. (Gén. 1:26; 2:19, 20) Ademas, Dios no a krea miónes di hende perfekto pa biba riba tera. Mas bien, el a disidí di krea un muhé perfekto pa Adam, esta, Eva. (Gén. 2:21, 22) Anto el a duna e pareha akí e oportunidat di yena e tera ku nan yunan. Bou di kondishonnan ideal, hende gradualmente lo a ekstendé e fronteranan di Paradeis te ora henter e planeta lo a bira un hardin bunita. Huntu ku e angelnan den shelu, hende e ora ei lo por a adorá Yehova pa semper komo parti di su famia universal. Yehova di bèrdat a demostrá su amor di Tata ora el a duna Adam ku Eva e speransa maravioso ei pa futuro!

YUNAN REBELDE TA RECHASÁ DIOS KOMO NAN REI

6. (a) Kon e rebelion den e famia di Dios a kuminsá? (b) Dikon nos sa ku e rebelion ei no a nifiká ku Yehova a pèrdè su outoridat komo Soberano?

⁶ Lamentablemente, Adam ku Eva no tabata satisfecho ku Yehova komo nan Gobernante Soberano. Nan a preferá di sigui Satanas, un angel ku a rebeldiá kontra Dios. (Gén. 3:1-6) Nan bida alehá for di e gobernashon di Dios a resultá den doló, sufrimentu i morto pa nan i pa nan yunan. (Gén. 3:16-19; Rom. 5:12) Awor Dios no tabatin niun siudadano mas riba tera ku tabata obedes’é. Akaso esaki a nifiká ku Dios no tabatin kontrol mas riba tera i ku el a stòp di ehersé su poder komo Soberano di tera i su habitantenan? Esei sigur ku nò! El a ehersé su outoridat ora el a saka Adam ku Eva for di e Hòfi di Edén i a pone dos kerubin warda e entrada pa nan no drenta bèk. (Gén. 3:23, 24) Na e mesun tempu, Dios a demostrá su amor di Tata ora el a duna e siguransa ku lo e kumpli ku su propósito di tin un famia universal ku a konsistí di tantu angel komo hende fiel. El a primintí ku un “simia,” òf desendiente, di Adam lo destruí Satanas i eliminá e daño ku e piká di Adam a kousa.—Lesa Génesis 3:15.

7, 8. (a) Kon malu e situashon a bira den tempu di Noe? (b) Kiko Yehova a hasi pa limpia e tera i pa protehá e famia humano?

⁷ Den e siglonan ku a sigui tabatin hende, manera Abel ku Enok, ku a skohe pa ta leal na Yehova. Pero mayoria di hende a rechasá Yehova komo nan Tata i Rei. Ya pa e tempu di Noe, “tera tabata yen di violensia.” (Gén. 6:11) Akaso esaki a nifiká ku Yehova no tabatin kontrol mas riba asuntunan di tera? Kiko Beibel ta bisa?

⁸ Beibel ta bisa ku Yehova a duna Noe instrukshon detayá pa traha un arka inmenso ku lo a salba Noe ku su famia. Tambe Dios a demostrá su gran amor pa henter e famia humano ora el a enkargá Noe pa sirbi komo “un predikadó di hustisia.” (2 Ped. 2:5) Sin duda, Noe a hasi un yamada riba e hendenan pa nan arepentí i el a spièrta nan pa e binidero destrukshon, ma nan no a hasi kaso. Pa hopi aña, Noe ku su famia a biba den un mundu violento i sumamente inmoral. Yehova, manera un Tata amoroso, a protehá i bendishoná e ocho almanan fiel ei. Ora Yehova a trese e Diluvio, el a eliminá e hendenan rebelde i e angelnan malbado. Asina el a demostrá ku definitivamente e tabatin kontrol riba asuntunan di tera.—Gén. 7:17-24.

YEHOVA SU GOBERNASHON DESPUES DI DILUVIO

9. Ki oportunidat Yehova a duna humanidat despues di Diluvio?

⁹ Ora Noe ku su famia a sali for di e arka, dal nan promé pasonan riba e tera limpi i hole e aire fresku, nan lo mester tabata masha gradisidu na Yehova ku el a kuida nan i protehá nan. Mesora Noe a traha un altar i a ofresé sakrifisio pa rindi adorashon na Yehova. Dios a bendishoná Noe ku su famia i a duna nan e instrukshon pa ‘ta fruktífero i pa multipliká i yena tera.’ (Gén. 8:20–9:1) Un biaha mas, humanidat tabatin e oportunidat di uni den adorashon na Yehova i yena e tera.

10. (a) Na unda i kon hende a bolbe rebeldiá kontra Yehova despues di Diluvio? (b) Ki akshon Yehova a tuma pa hasi sigur ku su boluntat ta sosodé?

¹⁰ Pero e Diluvio no a eliminá imperfekshon, i ainda hende tabatin ku lucha kontra e influensia invisibel di Satanas i di e angelnan rebelde. No a tarda hopi ku hende a bolbe rebeldiá kontra e bon gobernashon di Yehova. Un di esnan ku a oponé Yehova tabata Nimròd, un bisañetu di Noe. Beibel ta bisa ku Nimròd tabata “un yagdó poderoso dilanti di SEÑOR [“ku a oponé Yehova,” NW].” El a traha statnan grandi, manera por ehèmpel Babel, i a hasi su mes un rei “na tera di Sinar.” (Gén. 10:8-12) Ki akshon e Rei di eternidat lo a tuma kontra e rei rebelde akí ku a oponé Su propósito di “yena tera”? Wèl, Dios a bruha e hendenan su idioma pa nan no komprondé otro. Esei a laga e siudadanonan di Nimròd keda tur frustrá, i nan a plama “for di einan riba superfisie di henter tera.” Ora nan a bai, nan a hiba nan religion falsu i nan sistema di gobernashon humano huntu ku nan.—Gén. 11:1-9.

11. Kon Yehova a demostrá lealtat na su amigu Abraham?

¹¹ Hopi hende a kuminsá adorá dios falsu despues di Diluvio. Pero asina mes tabatin algun hòmber fiel ku a sigui adorá Yehova. Un di nan tabata Abraham. E tabatin un bida kómodo den e stat Ur. Ma tòg el a obedesé Yehova, bandoná e stat i bai biba den tènt pa hopi aña. (Gén. 11:31; Heb. 11:8, 9) Durante e tempu ku Abraham tabata muda di un lugá pa otro, el a hañ’é hopi biaha rondoná pa reinan humano. Hopi di nan tabata biba den statnan protehá pa muraya. Pero Yehova tabata Esun ku a protehá Abraham ku su famia. Un eskritor di salmo a deklará lo siguiente tokante e protekshon ei ku Yehova a rindi manera un Tata: “[Dios] no a permití ningun hende oprimí nan; el a reprendé reinan pa nan motibu.” (Sal. 105:13, 14) Yehova tabata leal na su amigu Abraham i p’esei a primintié: “Reinan lo sali for di bo.”—Gén. 17:6; Sant. 2:23.

12. Kon Yehova a demostrá su poder soberano riba Egipto, i kon esaki a yuda su pueblo?

¹² Dios a primintí tantu Abraham su yu, Isak, komo su nietu, Yakòb, ku lo e bendishoná nan i ku nan desendientenan lo bira rei. (Gén. 26:3-5; 35:11) Pero promé ku e desendientenan di Yakòb a produsí rei, nan a bira katibu na Egipto. Akaso esei a nifiká ku Yehova lo no a kumpli ku su promesa òf ku el a stòp di ehersé su poder komo Soberano di tera? Nò! Na su debido tempu, Yehova a demostrá su poder soberano i a mustra ku e tabatin hopi mas outoridat ku e Fárao kabesura ei. E israelitanan a pone nan fe den Yehova, i el a libra nan na un manera maravioso ora el a laga nan pasa dor di Laman Kòrá. Tabata bisto ku Yehova ketu bai tabata e Gobernante di universo, i manera un Tata ku ta stima su yunan, el a usa su gran poder pa protehá su pueblo.—Lesa Éksodo 14:13, 14.

YEHOVA TA BIRA REI DI ISRAEL

13, 14. (a) Kiko e israelitanan a deklará den kantika tokante Yehova su reinado? (b) Kiko Dios a primintí David?

¹³ Asina ku Yehova a libra e israelitanan milagrosamente for di Egipto, nan a kanta un kantika di viktoria i alabansa na Yehova. Nos ta haña e kantika ei na Éksodo kapítulo 15. Na versíkulo 18, e ta bisa: “SEÑOR lo reina pa semper i semper.” Yehova en bèrdat a bira Rei riba e nashon nobo ei. Pero e israelitanan no a keda satisfecho ku Yehova komo nan Gobernante invisibel. Un 400 aña despues ku nan a sali for di Egipto, nan a pidi Dios duna nan un rei humano, manera e nashonnan pagano rònt di nan tabatin. (1 Sam. 8:5) Apesar ku esaki a sosodé, Yehova tabata Rei ketu bai, i esei a bira bisto durante e reinado di David, e di dos rei humano di Israel.

¹⁴ David a trese e arka di pakto sagrado Herúsalèm. Riba e dia di alegria ei, e levitanan a kanta un kantika di alabansa ku tabatin un deklarashon remarkabel ku ta pará skirbí na 1 Krónikanan 16:31 [NW]: “Laga nan bisa entre e nashonnan: ‘Yehova mes a bira rei!’” Kisas un hende ta puntra: ‘Mirando ku Yehova ta e Rei di eternidat, den ki sentido el a bira Rei na e tempu ei?’ Yehova ta bira Rei ora e demostrá su outoridat komo Soberano—òf asigná un órgano pa represent’é—pa un sierto tempu òf pa trata ku un situashon spesífiko. Ta masha importante pa nos komprondé ku ta den e sentido akí Yehova ta bira Rei. E aspekto akí di su reinado ta trese benefisio di largu alkanse. Promé ku David a muri, Yehova a primintié ku su reinado lo sigui pa tempu indefiní: “Lo mi lanta bo desendiente despues di bo, ku lo sali for di bo, i lo mi establesé su reino.” (2 Sam. 7:12, 13) E promesa akí a kumpli ora ku e “desendiente,” òf yu, di David ei a aparesé mas ku 1.000 aña despues. Ken e tabata, i ki ora el a bira Rei?

YEHOVA TA SKOHE UN REI NOBO

15, 16. Ki ora Yehova a ungi Hesus komo futuro Rei, i kiko Hesus a hasi pa prepará su Reino miéntras ku e tabata riba tera?

¹⁵ Na aña 29 di promé siglo, Huan Boutista a kuminsá prediká ku “e Reino di shelu a yega serka.” (Mat. 3:2) Ora Huan a batisá Hesus, Yehova a ungi Hesus komo e Mesías primintí i e futuro Rei di e Reino di Dios. Yehova a ekspresá su amor di Tata pa Hesus ku e palabranan: “Esaki ta mi Yu stimá, esun ku tin mi aprobashon.”—Mat. 3:17.

¹⁶ Hesus a duna gloria na su Tata durante henter su sirbishi riba tera. (Huan 17:4) El a hasi esaki ora el a prediká tokante e Reino di Dios. (Luk. 4:43) El a asta siña su siguidónan pidi pa e Reino ei bini. (Mat. 6:10) Komo e futuro Rei, Hesus por a bisa su opositornan: “E Reino di Dios ta meimei di boso.” (Luk. 17:21) Mas despues, riba e anochi promé ku su morto, el a sera ku su apòstelnan ‘un pakto pa un reino.’ Esaki a nifiká ku algun di su fiel siguidónan lo a bira rei huntu kuné den e Reino di Dios.—Lesa Lukas 22:28-30.

17. Den ki manera limitá Hesus a kuminsá goberná na aña 33, pero riba kiko e mester a warda?

¹⁷ Na ki tempu Hesus lo a kuminsá goberná komo Rei di e Reino di Dios? E no por a hasi esei mesora. E siguiente mèrdia mes nan a ehekutá Hesus i su siguidónan a plama for di otro. (Huan 16:32) Pero, meskos ku tempunan promé, Yehova ketu bai tabatin pleno kontrol di e situashon. Riba e di tres dia, el a resusitá su Yu, i dia di Pentekòste di aña 33, Hesus a kuminsá goberná riba e kongregashon kristian di rumannan ungí. (Kol. 1:13) Pero, komo e “desendiente” primintí di David, tòg Hesus mester a warda pa risibí pleno poder komo rei riba tera. Yehova a bisa su Yu: “Sinta na mi man drechi, te ora mi hasi bo enemigunan un banki pa bo pianan.”—Sal. 110:1.

ADORÁ E REI DI ETERNIDAT

18, 19. Kiko nos ta sinti nos motivá pa hasi, i kiko nos lo siña den e siguiente artíkulo?

¹⁸ Pa míles di aña, angel i hende a rebeldiá kontra e gobernashon di Yehova. Ma nunka Yehova no a keda sin ehersé su poder komo Soberano; semper el a mantené pleno kontrol. Komo un Tata amoroso, el a protehá i kuida su siudadanonan leal manera Noe, Abraham i David. Akaso esaki no ta motivá bo pa obedes’é komo nos Rei i hala mas serka dje?

¹⁹ Pero kisas nos ta puntra nos mes: Kon Yehova a bira Rei den nos tempu? Kon nos por demostrá ku nos ta siudadanonan leal di e Reino di Yehova i bira yunan perfekto di su famia universal? Kiko nos ke men ora nos ta pidi pa e Reino di Dios bini? Nos ta haña kontesta riba e preguntanan akí den e siguiente artíkulo.