TÓPIKO PRINSIPAL | KIKO E REINO DI DIOS POR HASI PA BO?

Kiko e Reino di Dios Lo Hasi pa Bo?

Probablemente bo a komprondé for di e artíkulonan anterior ku e Reino di Dios ta sumamente importante pa Testigunan di Yehova. I kisas algun di e bendishonnan ku e Reino akí lo trese kuné den futuro a lanta bo interes. Na mes momento, bo por puntra bo mes si e promesanan akí ta konfiabel.

Ta sabí pa bo ta kouteloso i no kere tur loke hende ta bisa. (Proverbionan 14:15) Den un sentido, bo koutela por ser kompará ku esun di e bereanonan di antigwedat.a Ora ku e bereanonan a tende di e bon notisia di e Reino pa promé biaha, nan a aseptá loke nan a tende pero no djis pasobra nan kier a kere ku e tabata bèrdat. Mas bien, nan a analisá e Skritura kuidadosamente “pa wak si e kosnan ku nan a tende tabata asina.” (Echonan 17:11) Ku otro palabra, e bereanonan a kompará e bon notisia ku nan a tende ku loke Beibel ta bisa. Ku tempu, nan a keda konvensí ku e bon notisia realmente ta basá sólidamente riba e Palabra di Dios.

Testigunan di Yehova ta invitá bo kordialmente pa hasi meskos. Pa medio di un kurso di Beibel grátis, nos ta ofresé bo e oportunidat pa kompará loke Testigunan di Yehova ta kere tokante e Reino di Dios ku loke Beibel ta siña.

Ademas di siña tokante e Reino di Dios, un kurso asina por yuda bo haña kontesta riba algun di e preguntanan di mas importante di bida.

Di unda nos a bini?
Kiko ta e propósito di bida?
Dikon Dios ta permití sufrimentu?
Kiko ta pasa ku nos ora nos muri?
Tera lo ser destruí?
Kiko ta e yabi pa haña un bida di famia felis?

Mas importante ainda, un kurso di Beibel lo yuda bo “hala serka Dios.” (Santiago 4:8) Anto mas bo hala serka Dios, mas lo bo mira kon e Reino di Dios por benefisiá bo; no djis pa aworakí, sino pa semper. Hesus mes a bisa den orashon na su Tata: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.

Testigunan di Yehova ta usa e publikashon akí pa studia Beibel ku bo.

Si bo ta deseá un kurso di Beibel grátis, puntra kualke Testigu di Yehova òf yena e formulario na www.jw.org/pap. (Wak PIDI UN KURSO DI BEIBEL riba e página inisial)

a Berea tabata un stat di Masedonia di antigwedat.

Loke e Reino di Dios Ta Nifiká pa Folake

Resientemente, un mucha muhé di dies aña ku yama Folake mester a traha un verslag pa skol tokante e tema: “E Kos Ku Mas Mi Ta Gusta Hasi.” Folake a skohe pa skirbi tokante pakiko e ta gusta papia ku otro hende tokante e Reino di Dios.

Folake a splika: “E Reino di Dios ta un gobièrnu real. Pero, e ta invisibel; p’esei bo no por wak e, ni ora bo tin brel bistí!”

Folake a sigui skirbi tokante e bendishonnan di e Reino ku mas e ta deseá di mira. Menshonando algun di e problemanan ku e Reino lo kaba kuné, el a skirbi: “Mi ta bira tristu ora mi mira hende sin kas ta biba riba kaya,” tambe “muchanan ku ta muri di hamber debí na falta di kuminda na hopi parti di mundu.” Anto el a agregá: “Ma mi ta bira kontentu atrobe ora mi lesa Isaías 65:21.” Refiriendo na hende ku lo biba bou di e gobernashon di e Reino di Dios, e teksto ei ta bisa ku “nan lo traha kas i biba den nan; tambe nan lo planta kunukunan di wendrùif i kome nan fruta.”

Folake a bisa tambe ku e ta anhelá pa e dia yega pa Dios kaba ku tur malesa pa medio di su Reino. Den su verslag el a sita Revelashon 21:4, kaminda Dios ta bisa ku “lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.” El a konkluí bisando un biaha mas ku loke mas e ta stima di e mundu akí ta di papia tokante Yehova i su Reino. Ta klaru anto ku e Reino di Dios tin un lugá spesial den e kurason di e mucha muhé akí!