Un Bida Felis den Yehova Su Sirbishi

DOS aña promé ku e suseso ei a tuma lugá, ami i Evelyn Trabert, kende tabata mi kompañera den e trabou di misionero, a asistí na e di kuater klas di e Skol Bíbliko di Galaad di Watchtower. E tempu ei, e skol tabata situá serka di Ithaca, New York. Despues ku nos a gradua, nos a haña asignashon pa bai sirbi na Santa Ana. Pero promé ku mi sigui konta tokante mi sirbishi di misionero di kasi 29 aña, laga mi splika dikon mi a skohe e trabou ei.

MI HERENSIA SPIRITUAL

Mi a nase na aña 1923 i tabata biba huntu ku mi mayornan, John i Eva Olson, na Spokane, Washington, Merka. Mi mayornan tabata luterano, pero nan no tabata kere den e doktrina di fièrnu di kandela ku nan iglesia tabata siña hende. Nan tabatin difikultat pa kere ku un Dios di amor ta kastigá hende di e manera ei. (1 Huan 4:8) Mi tata tabata traha na un panaderia. I un anochi, un kolega di dje a sigur’é ku Beibel no ta siña ku fièrnu ta un lugá di tormento. Poko tempu despues, mi mayornan a kuminsá studia Beibel ku Testigunan di Yehova, i nan a haña sa kiko Beibel ta siña realmente tokante bida despues di morto.

Aunke e tempu ei mi tabatin solamente nuebe aña di edat, te awe mi ta kòrda kon entusiasmá mi mayornan tabata papia tokante e bèrdatnan bíbliko ku nan tabata siña. Nan a bira asta mas entusiasmá ainda ora nan a haña sa ku e nòmber di e Dios berdadero ta Yehova i ku e no ta parti di un Trinidat. I manera spòns, mi a kuminsá apsorbá tur e maravioso siñansanan bíbliko akí segun ku mi tabata siña e bèrdat ‘ku ta hasi hende liber.’ (Huan 8:32) Nunka mi a haña studiamentu di Beibel laf; semper mi tabata gusta analisá e Palabra di Dios. I aunke mi tabata un persona tímido, mi tabata kompañá mi mayornan den e trabou di prediká. Nan a batisá na 1934, i ami a batisá na 1939, tempu ku mi tabatin 16 aña di edat.

Den zomer di aña 1940, mi mayornan a bende nos kas i nos a muda bai Coeur d’Alene, na Idaho, kaminda nos tres a kuminsá den sirbishi di tempu kompleto trahando komo pionero. Nos tabata hür un apartamento ku tabata situá riba un garashi di drecha outo. Nos tabata tene nos reunionnan di kongregashon na e apartamento mes. E tempu ei, no tabatin hopi Salòn di Reino; mayoria di kongregashon tabata reuní na kas di e rumannan òf den salanan di hür.

Na 1941, ami ku mi mayornan a asistí na un asamblea na St. Louis, Missouri. Djadumingu tabata “Dia pa Yunan,” i tur mucha i hóben entre 5 pa 18 aña di edat tabatin ku sinta te dilanti, enfrente di e plataforma. Na final di su diskurso, Ruman Joseph F. Rutherford a dirigí atenshon na nos tur ku tabata mucha i hóben. El a bisa: “Yunan . . . boso tur . . . ku a bai di akuerdo pa obedesé Dios i su Rei: Por fabor, lanta para!” Nos tur a lanta. Despues, Ruman Rutherford a bisa ku bos fuerte: “Wak e mas ku 15.000 proklamadónan nobo di e Reino!” E momento ei, mi a disidí ku mi ke ta un pionero pa e restu di mi bida.

NOS ASIGNASHON KOMO FAMIA

Un par di luna despues di e asamblea ei na St. Louis, ami ku mi mayornan a muda bai sur California. Einan, na e stat Oxnard, nos a haña e asignashon pa lanta un kongregashon. Nos tabata biba den un trailer chikitu ku tabatin ún kama so. Ántes mi tabatin mi mes kamber, pero awor tur anochi mi tabatin ku drecha e mesa di komedor pa mi drumi riba dje; esei sí tabata un kambio grandi!

Dia 7 di desèmber 1941, djis promé ku nos a yega California, Hapon a bombardiá Pearl Harbor na Hawai. E siguiente dia, Merka a drenta Segundo Guera Mundial. Komo ku supmarinonan hapones tabata patruyá na kosta di California, outoridatnan a duna òrdu pa paga tur lus ora nochi sera; pues tabatin un blackout total. Esei tabata pa evitá ku e haponesnan lo a tira riba e pais.

Algun luna despues, na sèptèmber di aña 1942, nos a asistí na e Asamblea Teokrátiko di Mundu Nobo na Cleveland, Ohio. Ei, nos a skucha Ruman Nathan H. Knorr duna e diskurso “Pas Por Dura?” El a analisá Revelashon kapítulo 17, ku ta papia di un “bestia salbahe” ku ‘tabat’ei pero ku awor no t’ei mas i ku pronto lo sali for di abismo.’ (Rev. 17:8, 11) Ruman Knorr a splika ku “e bestia salbahe” tabata e Liga di Nashonnan, ku a stòp di funshoná na 1939. Beibel a profetisá ku e Liga di Nashonnan lo a ser remplasá i ku esei lo a hiba na un periodo di supuesto pas. I asina a sosodé despues ku Segundo Guera Mundial a terminá na aña 1945. E “bestia” a bolbe aparesé, pero e biaha akí komo Nashonnan Uní. Di e tempu ei padilanti, Testigunan di Yehova a ekspandé nan predikashon rònt mundu, i esaki a hiba na un gran oumento.

E profesia ei a yuda mi mira kuantu trabou tabatin pa hasi. P’esei, ora nan a anunsiá ku e Skol di Galaad lo a kuminsá e siguiente aña, mi a haña gana di bira misionero. Na 1943, mi a haña e asignashon pa bai traha komo pionero na Portland, Oregon. E tempu ei, nos tabata usa tokadisko pa prediká na e hendenan. Nos tabata laga nan skucha un sermon i despues nos tabata ofresé nan literatura bíbliko tokante e Reino di Dios. Henter e aña ei, mi no por a stòp di pensa tokante sirbishi di misionero.

P’esei, mi a bira masha kontentu na aña 1944 ora ami ku mi amiga stimá Evelyn Trabert a haña invitashon pa bai Galaad. Sinku luna largu, nos instruktornan a siña nos kon pa disfrutá di nos estudio di Beibel. Nan humildat a impreshoná nos mashá. E mesun rumannan akí tabata sirbi de bes en kuando komo waiter ora nos tabata kome. Nos a gradua dia 22 di yanüari 1945.

MI ASIGNASHON KOMO MISIONERO

Ami i Evelyn, huntu ku Leo i Esther Mahan, a yega El Salvador, kaminda nos a ser asigná, na yüni 1946. Nos a haña e kunukunan “kla pa kosechá.” (Huan 4:35) Un siman promé ku e insidente ku mi a menshoná na komienso, nos tabatin nos promé asamblea di sirkuito na Santa Ana. Nos a invitá tur hende ku nos por a haña pa e diskurso públiko, i nos tabata sumamente kontentu ku kasi 500 hende a asistí na e asamblea. Esaki a hasi e lidernan religioso, ku nos a menshoná na komienso, asina furioso ku nan a bin purba di intimidá nos pa nos bandoná e pueblo. Pero nan no a logra. Al kontrario, esei a hasi nos aun mas determiná pa keda i yuda e hendenan di kurason sinsero. Hopi hende tabatin hamber pa e bèrdat; pastornan tabata spièrta hende pa nan no lesa Beibel i masha tiki hende por a kumpra un Beibel. Pero e hendenan tabata apresiá e esfuerso ku nos tabata hasi pa siña spañó pa por a papia ku nan tokante e Dios berdadero i tokante su promesa di hasi tera un paradeis.

Rosa Ascencio tabata un di mi promé studiantenan na El Salvador. Despues ku el a kuminsá studia Beibel, el a bandoná e hòmber ku e tabata biba kuné. Ku tempu, e hòmber tambe a kuminsá studia Beibel. Nan a kasa, batisá i bira Testigu di Yehova, i nan tabata masha zeloso. Rosa tabata e promé persona na Santa Ana ku a bira pionero.b

Rosa tabata doño di un tienda chikitu. Ora e tabatin ku bai sirbishi, e tabata sera su tienda i konfia ku Yehova lo a perkurá pa su nesesidatnan. Ora e regresá despues di algun ora i habri su tienda, hopi kliente tabata bin kumpra kos. El a eksperensiá personalmente e bèrdat registrá na Mateo 6:33 i a keda fiel te na su morto.

Un biaha, e pastor den nos área a bishitá e mener ku tabata hür kas ku nos seis ku tabata misionero i menas’é ku si e no stòp di hür nos su kas, nan lo a ekspulsá é ku su kasá for di iglesia. E doño di e kas, kende tabata un hòmber di negoshi bon konosí, no a hasi kaso di e pastor pasobra pa hopi tempu kaba e tabata fadá di nan kondukta. El a asta bisa e pastor ku e no ta wòri si nan ekspuls’é for di iglesia. El a sigurá nos ku nos por a keda biba kuantu tempu ku nos ke den e kas.

UN SIUDADANO RESPETÁ TA BIRA TESTIGU

Den e stat kapital, San Salvador, un otro misionero tabata studia Beibel ku esposa di un ingeniero ku yama Baltasar Perla. Baltasar tabata un hòmber di bon kurason, pero e hipokresia di e lidernan religioso a pon’é pèrdè fe den Dios. Ora nos tabata bai traha nos sukursal, Baltasar, aunke e no tabata Testigu e tempu ei, a ofresé pa diseñá i konstruí e fasilidat sin kobra nada pa su trabou.

Despues di a traha ku e pueblo di Yehova riba e proyekto di konstrukshon, Baltasar tabata konvensí ku el a haña e religion berdadero. El a batisá dia 22 di yüli 1955, i un poko tempu despues su kasá, Paulina, tambe a batisá. Nan dos yunan ta sirbiendo Yehova fielmente. E yu hòmber, Baltasar, Jr., tin 49 aña ta sirbi na Bètel na Brooklyn, unda e ta sostené nos predikashon mundial. Aktualmente, e ta miembro di e Komité di Sukursal na Merka.c

Ora nos a kuminsá organisá kongreso na San Salvador, Ruman Perla a yuda nos haña un sala di gimnasia grandi pa nos por a reuní. Na prinsipio, nos tabatin mester di un par di sekshon di stul so, pero kada aña, ku Yehova su bendishon, nos a sigui oumentá te ku e sala di gimnasia a bira chikitu pa nos. Na e okashonnan gososo ei, mi tabata topa ku personanan ku mi a yega di studia Beibel kuné. I algun di mi eks-studiantenan tabata laga mi sera konosí ku, na moda di papia, mi nietunan, esta, personanan ku nan a studia kuné i ku a kaba di batisá. Bo por imaginá bo kon mi tabata sinti mi na momentonan asina?

Na un asamblea, un ruman hòmber a aserká mi i bisa mi ku e kier a konfesá algu. El a hasi mi kurioso, pasobra mi no a rekonos’é. El a bisa mi: “Ami tabata un di e mucha hòmbernan ku a tira boso ku piedra na Santa Ana.” Pero awor e tambe ta un sirbidó di Yehova! Esei a hasi mi mashá kontentu. E kòmbersashon ei a kaba di konvensé mi ku sirbishi di tempu kompleto ta e mihó karera ku un hende por skohe den bida.

MI TA KONTENTU KU E DESISHONNAN KU MI A TUMA

Mi a hasi e trabou di misionero kasi 29 aña na El Salvador. Promé, mi a sirbi na Santa Ana, despues na Sonsonate, despues na Santa Tecla i finalmente na San Salvador. Pero na 1975, despues di hasi hopi orashon, mi a disidí di stòp ku e trabou di misionero i bolbe Spokane. Mi mayornan, kendenan tabata sirbi Yehova fielmente, a bira grandi i tabatin mester di mi yudansa.

Despues ku mi tata a muri na 1979, mi a sigui kuida mi mama, kende dia pa dia tabata bira mas débil. El a muri ku 94 aña di edat, ocho aña despues di mi tata. Durante e periodo difísil ei, mi tabata físikamente i emoshonalmente agotá. Strès a pone ku mi a haña un malesa doloroso ku yama gordelroos. Pero ku orashon i yudansa di Yehova, mi a logra surpasá e prueba ei. Ta komo si fuera Yehova a bisa mi: ‘Te na bo añanan di kabei blanku lo mi karga bo i libra bo.’—Isa. 46:4.

Na 1990, mi a muda bai Omak, Washington, kaminda mi por a prediká atrobe na hende di abla spañó. Esei a laga mi sinti mi útil atrobe, i vários di mi studiantenan di Beibel a batisá. Pero ku tempu, mi no tabatin e forsa pa mantené mi kas na Omak mas. P’esei, na novèmber di aña 2007, mi a muda bai un apartamento den e pueblo serkano Chelan, Washington. Akinan, e kongregashon spañó ta perkurá bon pa mi. Mi ta e úniko Testigu di edat den e kongregashon, p’esei e rumannan a adoptá mi komo nan “wela.” Mi ta masha kontentu ku loke nan ta hasi pa mi.

Pa mi por a sirbi Yehova “sin distraishon,” mi a skohe pa no kasa ni haña yu. (1 Kor. 7:34, 35) Pero mi tin masha hopi yu spiritual. Hende no por tin tur kos den e bida aktual. P’esei, mi ta enfoká riba loke ta mas importante: sirbishi na Yehova di henter mi kurason. Den e mundu nobo lo mi tin tur tempu pa disfrutá di otro aktividat saludabel. Mi teksto preferí ta Salmo 145:16, ku ta sigurá nos ku Yehova lo “satisfasé e deseo di tur ser bibu.”

Aworakí mi tin 91 aña di edat, i ainda mi salú ta basta bon. Pues, mi ta sigui traha pionero. Sirbishi di pionero ta laga mi sinti mi yòn i ta duna mi bida propósito. Tempu ku mi a yega El Salvador pa promé biaha, e trabou di prediká a kaba di kuminsá. Awe, apesar di oposishon fuerte di Satanas, tin mas ku 39.000 publikadó den e pais ei. Esaki sigur a hasi mi fe mas fuerte. No tin duda, Yehova ta sostené su pueblo!