“Keda ku Boso Mente Fihá Riba e Kosnan Djariba”

1, 2. (a) Kiko ta mustra ku e kongregashon di Kolósas den promé siglo tabata na peliger? (b) Ki konseho Pablo a duna e rumannan na Kolósas?

DEN promé siglo, e kongregashon kristian di Kolósas tabata na peliger. Algun ruman tabata bisa ku tur hende mester a sigui e Lei di Moises. Otronan tabata promové asetismo, e filosofia pagano ku ta bisa ku hende mester priva nan mes di e plasernan di bida. P’esei, pa kontrarestá e siñansanan falsu akí, apòstel Pablo a skirbi un karta animante pa spièrta e kolosensenan. El a bisa nan: “Tene kuidou pa ningun hende no kue boso den nan gara pa medio di filosofia i engaño bano ku ta basá riba tradishon di hende, segun e kosnan básiko di mundu i no segun e siñansanan di Kristu.”—Kol. 2:8.

² Si e kristiannan ungí di e tempu ei tabata fiha nan mente riba “e kosnan básiko di mundu,” nan lo tabata rechasando e provishon ku Yehova a perkurá pa nan por a ser salbá. (Kol. 2:20-23) Pa yuda nan kuida nan amistat presioso ku Dios, Pablo a konsehá nan: “Keda ku boso mente fihá riba e kosnan djariba, no riba e kosnan ku ta riba tera.” (Kol. 3:2) Sí, e rumannan di Kristu mester a keda kòrda riba nan speransa di por biba pa semper den shelu.—Kol. 1:4, 5.

3. (a) Ki speransa kristiannan ungí tin? (b) Ki preguntanan nos lo kontestá den e artíkulo akí?

³ Awe tambe kristiannan ungí ta keda ku nan mente fihá riba Dios su Reino selestial i riba nan speransa pa bira “heredero huntu ku Kristu.” (Rom. 8:14-17) Pero kiko di ‘e otro karnénan,’ esta, e kristiannan ku tin speransa di biba pa semper riba tera? (Huan 10:16) Ki nifikashon Pablo su palabranan tin pa nan? Sí, kon nan por keda ku nan mente fihá riba “e kosnan djariba”? Abraham i Moises tabata dos sirbidó di Dios ku a keda ku nan mente fihá riba e kosnan djariba apesar di nan problemanan. Kiko nos por siña for di nan ehèmpel?

KIKO KE MEN FIHA NOS MENTE RIBA E KOSNAN DJARIBA?

4. Den ki manera e otro karnénan por keda ku nan mente fihá riba e kosnan djariba?

⁴ Aunke e otro karnénan no tin speransa selestial, nan tambe por keda ku nan mente fihá riba e kosnan djariba. Kon asina? Poniendo Yehova Dios i su Reino na promé lugá den nan bida. (Luk. 10:25-27) I pa logra esei, nos tin ku sigui e ehèmpel di Kristu. (1 Ped. 2:21) Meskos ku nos rumannan den promé siglo, nos tambe ta haña nos ku rasonamentu falsu, filosofia mundano i aktitut materialista den e mundu malbado akí di Satanas. (Lesa 2 Korintionan 10:5.) Pero komo imitadónan di Hesus, nos mester keda vigilá i protehá nos mes di tur loke por daña nos relashon ku Yehova.

5. Kon nos por analisá nos mes pa saka afó kon nos ta pensa tokante kosnan material?

⁵ Nos a permití e mundu su punto di bista di kosnan material afektá nos? Por lo general, loke nos ta pensa i hasi ta demostrá kiko nos ta stima. Hesus a bisa: “Kaminda bo tesoro ta, einan bo kurason tambe lo ta.” (Mat. 6:21) P’esei, pa nos por sa unda nos kurason ta hibando nos, ta bon pa tempu tempu nos analisá nos mes. Puntra bo mes: ‘Mi ta pensa hopi riba plaka? Mi ta preokupá demasiado tokante prospektonan di negoshi, invershon òf un estilo di bida mas kómodo? Òf mi ta hasi esfuerso pa mantené un wowo simpel ku ta enfoká riba kosnan spiritual?’ (Mat. 6:22) Hesus a indiká ku si nos interes prinsipal ta pa “montoná tesoro riba tera,” nos ta pone nos spiritualidat, òf nos relashon ku Yehova, na peliger.—Mat. 6:19, 20, 24.

6. Kon nos por evitá ku nos tendensianan imperfekto ta dominá nos?

⁶ Komo ku nos ta imperfekto, ta fásil pa nos hasi loke ta malu. (Lesa Romanonan 7:21-25.) Si nos no tin Yehova su spiritu santu, fásilmente nos por haña nos enbolbí den “obranan ku ta pertenesé na skuridat.” Esakinan por ta, entre otro, “paranda i buracheria, . . . inmoralidat seksual i kondukta sinbèrgwensa.” (Rom. 13:12, 13) Pa nos por gana e lucha kontra “e kosnan ku ta riba tera”—e kosnan ku ta atraé e karni—nos tin ku keda ku nos mente fihá riba e kosnan djariba. Pero esaki ta rekerí esfuerso. P’esei, apòstel Pablo a bisa: “Mi ta gòlpia mi kurpa i ta domin’é manera un esklabo.” (1 Kor. 9:27) Ta klaru anto ku nos mester ta estrikto ku nos mes si nos ke keda riba e kaminda ku ta hiba na bida. Awor, laga nos wak kiko dos hòmber fiel di antigwedat a hasi pa “agradá Dios.”—Heb. 11:6.

ABRAHAM “A PONE FE DEN YEHOVA”

7, 8. (a) Ki desafionan Abraham ku Sara a konfrontá? (b) Riba kiko Abraham a fiha su mente?

⁷ Ora Yehova a manda Abraham muda ku su famia bai Kanan, el a obedesé mesora. Debí na Abraham su fe i obedensia, Yehova a sera un pakto kuné. El a bis’é: “Lo mi hasi bo un nashon grandi, i lo mi bendishoná bo.” (Gén. 12:2) Sinembargo, añanan a pasa sin ku Abraham su kasá, Sara, a sali na estado. Akaso Yehova a lubidá e promesa ku el a hasi na Abraham? Ademas, nan bida na Kanan no tabata fásil. Abraham i su famia a bandoná nan kas i nan otro famianan na Ur, un stat próspero na Mesopotamia. Nan a biaha mas ku 1.600 kilometer pa yega Kanan, kaminda nan tabata biba den tènt, tin biaha sin sufisiente kuminda i koriendo peliger di ser atraká. (Gén. 12:5, 10; 13:18; 14:10-16) Apesar di tur e kosnan ei, nan no a pensa di bai bèk Ur kaminda nan tabatin un bida kómodo.—Lesa Hebreonan 11:8-12, 15.

⁸ Abraham no a enfoká riba “e kosnan ku ta riba tera;” mas bien, el “a pone fe den Yehova.” (Gén. 15:6, NW) Sí, el a fiha su mente riba e kosnan djariba: El a enfoká riba e promesanan di Dios. I Yehova a mira Abraham su fe, p’esei el a bis’é: “‘Wak na e shelunan i konta e streanan, si bo por konta nan.’ I El a bis’é: ‘Asina bo desendientenan lo ta.’” (Gén. 15:5) Esei sigur tabata un konsuelo pa Abraham; Yehova no a lubid’é! Kada biaha ku e tabata wak e streanan na shelu, e tabata kòrda ku Yehova a primintí di hasié un nashon grandi. I na Yehova su debido tempu Abraham a haña un yu hòmber, manera Yehova a primintié.—Gén. 21:1, 2.

9. Kon nos por imitá Abraham?

⁹ Meskos ku Abraham, nos tambe ta spera riba kumplimentu di e promesanan di Dios. (2 Ped. 3:13) Si nos no keda ku nos mente fihá riba e kosnan djariba, nos por kuminsá sinti ku e promesanan akí ta tarda pa kumpli i nos por kuminsá baha man na aktividatnan spiritual. Laga nos duna un ehèmpel. Kisas den pasado bo a yega di hasi sakrifisio pa por traha pionero òf pa hasi mas pa Yehova den un òf otro manera. Si ta asina, nos ta elogiá bo pa esei. Pero kiko di awe? Kòrda ku Abraham a keda ku su mente fihá riba “e stat ku tin berdadero fundeshi.” (Heb. 11:10) El “a pone fe den Yehova, i pa e motibu ei Dios a konsider’é un hòmber hustu.”—Rom. 4:3.

MOISES A MIRA “ESUN KU TA INVISIBEL”

10. Ki kriansa i edukashon Moises a haña?

¹⁰ Moises tabata un otro hòmber ku a keda ku su mente fihá riba e kosnan djariba. Komo hóben, el a ser kriá komo miembro di e famia real di Egipto tempu ku Egipto tabata e nashon di mas poderoso na mundu. Beibel ta bisa ku el ‘a ser eduká den tur e sabiduria di e egipsionan.’ Debí na e edukashon haltu akí, Moises “tabata un hòmber poderoso den echo i palabra.” (Echo. 7:22) Bo por imaginá kuantu posibilidat e tabatin su dilanti? Pero Moises tabata interesá den algu muchu mas elevá: e boluntat di Dios.

11, 12. Ki edukashon Moises a balorá mashá, i kon nos por sa esei?

¹¹ Tempu ku Moises tabata mas chikitu, su mama Jokabed siguramente a siñ’é tokante e Dios di e hebreonan. Pa Moises, e konosementu di Yehova tabata muchu mas balioso ku rikesa material. P’esei, el a legumai e privilegio- i oportunidatnan ku lo e por a disfrutá di dje komo miembro di e famia di Fárao. (Lesa Hebreonan 11:24-27.) No tin duda, e edukashon spiritual ku Moises a haña i su fe a motiv’é pa fiha su mente riba e kosnan djariba.

¹² Sí, aunke Moises a haña e mihó edukashon ku hende por a haña den su tempu, e no a usa esaki pa bira poderoso, famoso ni riku na Egipto. Nos por sa esei pasobra Beibel ta bisa ku el ‘a nenga di ser yamá yu di e yu muhé di Fárao i a skohe pa ser maltratá huntu ku e pueblo di Dios en bes di gosa di e plasernan pasahero di piká.’ Ta klaru anto ku Moises a usa su edukashon spiritual na benefisio di Yehova su propósito.

13, 14. (a) Ki kualidatnan Moises mester a kultivá promé ku e por a libra e pueblo di Yehova? (b) Kiko nos tambe tin ku hasi?

¹³ Moises tabata masha interesá den Yehova i Su pueblo. Tempu ku e tabatin 40 aña di edat, el a pensa ku e tabata kla pa libra e pueblo di Dios for di sklabitut na Egipto. (Echo. 7:23-25) Pero promé ku Yehova por a duna Moises e asignashon ei, Moises mester a kultivá kualidatnan manera humildat, pasenshi, suavedat i dominio propio. (Pro. 15:33) Moises mester a haña entrenamentu pa e por a soportá e prueba- i difikultatnan ku tabata sper’é. I 40 aña komo wardadó di karné lo a dun’é e entrenamentu nesesario pa kultivá e kualidatnan akí.

¹⁴ Awor, e entrenamentu práktiko ku Moises a risibí a yud’é? Sí. Beibel ta bisa ku Moises a bira “masha humilde, mas ku tur hòmber ku tabatin riba superfisie di tera.” (Num. 12:3) Komo ku el a kultivá humildat, e por tabatin pasenshi ku tur sorto di hende ku tabata bini serka dje ku nan problemanan. (Éks. 18:26) Di mes manera, nos tambe tin ku kultivá sierto kualidatnan ku lo yuda nos sobrebibí “e tribulashon grandi” i drenta Dios su hustu mundu nobo. (Rev. 7:14) Nos ta sali bon ku tur hende, asta ku esnan ku ta rabia òf sinti nan ofendí lihé? Ta bon pa nos hasi kaso di e konseho di apòstel Pedro, kende a urgi su kompañeronan den fe: “Onra tur sorto di hende, stima henter e hermandat.”—1 Ped. 2:17.

LAGA NOS KEDA KU NOS MENTE FIHÁ RIBA E KOSNAN DJARIBA

15, 16. (a) Dikon ta masha importante pa nos keda ku nos mente fihá riba e kosnan korekto? (b) Dikon ta importante pa kristiannan tin un bon kondukta?

¹⁵ Nos ta bibando den un ‘tempu krítiko, difísil pa trata kuné.’ (2 Tim. 3:1) Pues, pa nos por keda spiritualmente lantá, nos tin ku keda ku nos mente fihá riba e kosnan korekto. (1 Tes. 5:6-9) Laga nos wak kon nos por hasi esaki den tres aspekto di bida.

¹⁶ Nos kondukta: Pedro a rekonosé e importansia di un bon kondukta. El a bisa: ‘Mantené un kondukta ekselente meimei di hende di e nashonnan, pa ora nan mira boso obranan ekselente ku nan mes wowo, komo resultado di esei, nan glorifiká Dios.’ (1 Ped. 2:12) Sea ku nos ta na kas, na trabou, na skol, ta rekreá òf ta den sirbishi, nos ta hasi nos máksimo esfuerso pa duna gloria na Yehova mediante un bon kondukta. Ta bèrdat ku, komo hende imperfekto, nos tur ta hasi fout. (Rom. 3:23) Pero si nos sigui “lucha e bon lucha di fe,” nos por gana e lucha kontra nos karni imperfekto.—1 Tim. 6:12.

17. Kon nos por imitá e aktitut mental ku Hesus a desplegá? (Wak e promé plachi.)

¹⁷ Nos aktitut: Pa nos por tin un bon kondukta, nos mester tin un aktitut korekto. Apòstel Pablo a bisa: “Mantené den boso e aktitut mental akí ku tabatin tambe den Kristu Hesus.” (Flp. 2:5) Ki aktitut Hesus tabatin? E tabata un persona humilde. I su humildat a motiv’é pa duna lo mihó di dje na Yehova. Su mente tabata konstantemente riba e trabou di prediká e bon notisia di Reino. (Mar. 1:38; 13:10) Pa Hesus, e Palabra di Dios tabatin e outoridat final. (Huan 7:16; 8:28) El a studia e Skritura Santu diligentemente pa e por a sita for di dje, defend’é i splik’é na hende. Si nos ke ta hende ku ta pensa meskos ku Hesus, nos mester studia Beibel i prediká e bon notisia ku entusiasmo i humildat.

18. Kon nos por apoyá e trabou di Yehova?

¹⁸ Nos apoyo: Yehova su propósito ta pa ‘den nòmber di Hesus tur rudia dobla—di esnan den shelu, di esnan riba tera i di esnan bou di tera.’ (Flp. 2:9-11) Aunke Hesus tin un posishon importante den shelu, e ta someté su mes humildemente na Yehova. (1 Kor. 15:28) Nos tambe mester hasi meskos. Kon? Apoyando e trabou di Yehova di henter nos kurason, ‘hasiendo hende di tur nashon disipel.’ (Mat. 28:19) Ademas, nos ta “hasi loke ta bon pa ku tur hende,” tantu pa hende en general komo nos rumannan den fe.—Gal. 6:10.

19. Kiko nos mester ta determiná pa hasi?

¹⁹ Nos ta masha kontentu ku Yehova ta rekordá nos pa keda ku nos bista fihá riba e kosnan djariba. P’esei, nos ta sigui “kore ku perseveransia e kareda ku tin nos dilanti.” (Heb. 12:1) Pues, laga nos ta determiná pa ‘traha ku henter nos alma, komo si fuera pa Yehova,’ sabiendo ku lo e rekompensá nos esfuersonan.—Kol. 3:23, 24.