Nos Tur Mester Di Konsuelo

Kisas bo ta kòrda ku tempu bo tabata mucha, bo a kai i kòrta bo man òf raspa bo rudia. Bo ta kòrda kon bo mama a konsolá bo? Podisé el a limpia e herida i pone un pleister riba dje. Bo a yora, pero el a brasa bo i konsolá bo ku su bunita palabranan, i esei a laga bo sinti mihó. Durante e tempu ei di bo bida, tabata fásil pa haña konsuelo.

Pero segun ku nos ta bira grandi, bida ta bira mas kompliká. E problemanan ta bira mas grandi i ta bira mas difísil pa haña konsuelo. Lamentablemente, ta masha poko biaha bo por resolvé problema di hende grandi ku un pleister i brasa di un mama. Ban wak algun ehèmpel.

• Bo a yega di pasa den e angustia di pèrdè trabou? Julian a bisa ku ora nan a kit’é for di trabou, el a haña un shòk i a keda hopi preokupá. El a puntra su mes: ‘Kon lo mi perkurá pa mi famia? Despues di asina tantu aña den servisio, dikon e kompania akí ta sinti ku mi no ta sirbi mas?’

• Podisé bo ta sinti bo deprimí despues ku bo matrimonio a kibra. Raquel a splika: “Diesocho luna pasá, diripiente mi kasá a bai laga mi, i mi a sinti un tristesa profundo. Ta komo si fuera mi kurason a parti na dos. E doló tabata tantu físiko komo emoshonal, i esei a duna mi miedu.”

• Kisas bo tin un problema serio ku salú, i ta parse ku bo no ta birando bon. Tin bes bo por sinti bo manera e patriarka Yòb, kende no kier a sigui biba i a lamentá: “Mi ta fadá di biba.” (Yòb 10:1, BPK) Kisas bo ta sinti manera Luis, un hòmber di 80 i piku aña, kende a bisa: “Tin biaha mi ta sinti manera ta sinta mi ta sinta warda riba mi morto.”

• Òf por ta posibel ku bo tin mester di konsuelo debí na morto di un ser kerí. Robert a konta: “Mi no por a kere ora m’a tende ku mi yu a muri den un aksidente di avion. Despues e doló a bini; e sorto di doló ku Beibel ta kompará ku un spada largu ku ta pasa dor di bo.”—Lukas 2:35.

Robert, Luis, Raquel i Julian a haña konsuelo, asta den e situashonnan difísil ei. Nan a haña e mihó Persona ku ta duna konsuelo, esta, nos Dios Todopoderoso. Kon e ta hasi esei? Lo e duna bo e konsuelo ku abo tin mester?