Ken Ta Kulpabel?

Si Dios no ta kulpabel, ta dikon tin asina tantu hende ta muri di hamber i ta biba den miseria? I dikon tin asina tantu guera, malesa i desaster natural? Beibel ta splika ku tin tres motibu prinsipal pakiko hende ta sufri:

1. Egoismo, Golosidat i Odio. “Hende a ehersé outoridat riba un otro hende pa su daño.” (Eklesiástes 8:9) Hopi biaha, hende ta bira víktima debí na e krueldat i egoismo di otro hende imperfekto.

2. Tempu i Suseso Imprevisto. Hende hopi biaha ta sufri “pasobra tempu i suseso imprevisto” ta afektá tur hende. (Eklesiástes 9:11, NW) Esei ke men ku un hende por ta na e lugá robes na e momento robes, un aksidente por sosodé òf un hende ta hasi fout òf ta hasi algu sin pensa.

3. E Gobernante Malbado di e Mundu Akí. Beibel ta bisa bon kla kiko ta e motibu prinsipal ku hende ta sufri: “Henter mundu ta den poder di e Malbado.” (1 Huan 5:19) E “Malbado” ei ta Satanas e Diabel, un kriatura spiritual poderoso ku na prinsipio tabata un angel di Dios pero ku “no a keda firme den e bèrdat.” (Huan 8:44) Otro angelnan a djòin Satanas i a rebeldiá kontra Dios pa satisfasé nan deseonan egoista, i asina nan a bira demoño. (Génesis 6:1-5) Desde ku nan a rebeldiá kontra Dios, Satanas i su demoñonan tabatin un influensia poderoso i kruel riba e mundu akí, pero den nos tempu nan influensia ta mas bisto ku nunka. Awor, Diabel ta yen di rabia i “ta gaña henter e tera habitá.” P’esei Beibel ta bisa: “Ai di tera.” (Revelashon 12:9, 12) Sí, Satanas ta un diktador kruel i ta gusta mira hende sufri. Pues, no ta Dios ta pone hende sufri sino ta Satanas.

ALGU PA PENSA ARIBA: Ta un persona malbado i sin heful so lo pone hende inosente sufri. En kambio, Beibel ta bisa: “Dios ta amor.” (1 Huan 4:8) P’esei ta imposibel ku Dios ta kometé maldat òf aktua na un manera inhustu.—Yòb 34:10.

Pero kisas ku rason bo ta puntra awor: Pa kuantu tempu mas Dios Todopoderoso lo permití Satanas goberná? Manera nos a mira kaba, Dios ta odia maldat i nos sufrimentu ta kous’é hopi doló. Ademas, Beibel ta animá nos pa “tira tur [nos] inkietut riba dje, pasobra e ta interesá den [nos].” (1 Pedro 5:7) Dios ta stima nos i e tin poder pa kita tur sufrimentu i inhustisia, manera e siguiente artíkulo lo splika.a