Ki Benefisio Lo Bo Haña si Bo Siña Konosé Dios?

Te awor, nos a trata algun detaye ku a kontestá e pregunta: Ken Dios ta? Nos a mira den Beibel ku e nòmber di Dios ta Yehova i ku su kualidat di mas importante ta amor. Nos a papia tambe di loke el a hasi den pasado i di loke lo e hasi den futuro pa benefisiá henter humanidat. Aunke ku tin hopi mas pa siña tokante Dios, kisas bo ta puntra bo mes ki benefisio lo mi haña si mi siña konosé Dios.

Yehova ta primintí ku “si bo busk’é, e lo laga bo hañ’é.” (1 Krónikanan 28:9) Imaginá e regalo maravioso ku lo bo haña ora bo buska Dios i siña konos’é: “Un amistat [será] kuné.” (Salmo 25:14, NW) Kiko un amistat asina por nifiká pa bo?

Berdadero felisidat. Beibel ta bisa ku Yehova ta “e Dios felis.” (1 Timoteo 1:11) Si bo hala serka Dios i imit’é, esei lo duna bo berdadero felisidat ku lo benefisiá bo emoshonalmente, mentalmente i físikamente. (Salmo 33:12) Ademas, lo bo por tin un bida felis ya ku bo ta evitá un estilo di bida ku por kousa daño, ta kultivá bon kustumber i ta mantené un bon relashon ku otro hende. Sigur lo bo ta di akuerdo ku loke e salmista a bisa: “Ta bon pa mi keda serka di Dios.”​—Salmo 73:28.

Dios lo mustra interes personal den bo. Yehova a primintí su sirbidónan: “Lo mi konsehá bo; mi wowo ta riba bo.” (Salmo 32:8) Esei ke men ku Yehova ta mustra interes personal den su sirbidónan i ta duna kada un di su sirbidónan loke nan tin mester. (Salmo 139:1, 2) Ora bo kultivá un bon relashon ku Yehova, lo bo ripará ku semper e t’ei pa bo.

Un futuro maravioso. Yehova no solamente lo yuda bo haña berdadero felisidat awor, sino lo e hasi posibel tambe pa bo haña un futuro maravioso. (Isaías 48:17, 18) Beibel ta bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Den e tempunan difísil akí, e speransa ku Yehova ta duna nos ta manera un anker ku ta “sigur i tambe firme.”​—Hebreonan 6:19.

Esakinan ta djis algun di e motibunan importante pa siña konosé Dios mihó i pa kultivá un bon amistat kuné. Si bo ta deseá esei, bo por tuma kontakto ku un Testigu di Yehova òf bishitá nos website jw.org/pap pa haña mas informashon.