Cana pa Fe
1 Miyones di hende ta concentrá nan bida rond di posesionnan material, cometiendo e bobedad di confia den e poder engañoso di rikesa. (Mat. 13:22) Nan ta siña un les duru ora nan rikesa bai perdí of ser hortá of resultá di ta di poco beneficio. Nos ta ser instá pa sigui tras di un curso mas sabí, haciendo esfuerso pa alcansá tesoronan spiritual. (Mat. 6:19, 20) Esaki ta enbolbé “cana pa fe.”—2 Cor. 5:7.
2 E palabra “fe” ta ser traducí for di un palabra griego cu ta transmití e idea di confiansa, conviccion firme. Cana pa fe kier men enfrentá situacionnan difícil cu confiansa den Dios, confiando den su abilidad pa guia nos pasonan i den su disponibilidad pa percurá pa nos necesidadnan. Jesus a pone e ehempel perfecto; el a mantené su atencion enfocá riba loke tabata realmente importante. (Heb. 12:2) Di manera similar, nos tin cu mantené nos curason enfocá riba cosnan invisibel i spiritual. (2 Cor. 4:18) Semper nos mester tene na mente cu nos bida actual ta incierto i reconocé cu nos ta dependé totalmente riba Jehova.
3 Tambe nos mester ta firmemente convencí cu Jehova ta dirigiendo nos mediante su organisacion visibel bou di guia di “e esclabo fiel i discreto.” (Mat. 24:45-47) Nos ta demostrá nos fe ora nos ta “obediente na esnan cu ta hibando e delantera” den e congregacion. (Heb. 13:17) Trahando humildemente den cooperacion cu e areglo teocrático ta manifestá nos confiansa den Jehova. (1 Ped. 5:6) Nos mester ser impulsá pa duna apoyo di henter curason n’e trabou cu e organisacion a haña pa haci. Esaki lo hala nos mas cerca di nos rumannan den un laso fuerte di amor i unidad.—1 Cor. 1:10.
4 Con pa Fortalecé Fe: Nos no mester permití nos fe stanca. Nos tin cu lucha duru pa fortalecé nos fe. Regularidad den studio, oracion i asistencia na reunion lo yuda nos fortalecé nos fe di manera cu, cu yudansa di Jehova, e por resistí cualkier prueba. (Efe. 6:16) Bo a establecé un bon rutina pa lesamentu diario di Bijbel i preparacion pa reunionnan? Bo sa meditá frecuentemente riba loke bo ta siña, i bo ta acercá Jehova den oracion? Ta bo custumber pa asistí na tur reunion i participá den nan segun oportunidad ta permití esei?—Heb. 10:23-25.
5 Bon obra ta duna prueba di fe fuerte. (Sant. 2:26) Un dje mihó maneranan pa demostrá nos fe ta dor di declará nos speransa na otronan. Bo ta busca oportunidadnan pa compartí e bon nobo? Bo por ahustá bo circunstancianan pa permití bo haci mas den e ministerio? Bo ta aplicá e sugerencianan cu nos ta ricibí pa mehorá e calidad i eficacia di nos ministerio? Bo ta pone metanan spiritual personal i ta haci esfuerso pa alcansá nan?
6 Jesus a spierta tocante bira demasiado enbolbí den asuntunan diario di bida i asina permití interesnan materialista of egoista baha nos vigilancia spiritual. (Luc. 21:34-36) Nos mester vigilá cuidadosamente con nos ta cana afin di evitá naufragio di nos fe. (Efe. 5:15; 1 Tim. 1:19) Nos tur ta spera cu al final nos lo por declará cu nos ‘a bringa e excelente pelea, a core e careda te na fin, i a warda e fe.’—2 Tim. 4:7.