Sea un Ehempel den Papiamentu i den Conducta
1 Apostel Pablo a exhortá Timoteo pa bira un ehempel den papiamentu i den conducta. (1 Tim. 4:12) Nos tambe mester desplegá conducta i abla ehemplar, specialmente ora nos ta participando den e ministerio, pasobra haciendo esei por determiná si nos ta yega of no, n’e curason di esnan cu nos ta topa.
2 Nos tin cu desplegá tur aspecto di bon manera, incluyendo cortesia, consideracion, amabilidad i tacto. Dor di desplegá e cualidadnan aki, nos ta mustra cu nos ta conciente dje manera cu nos accionnan ta afectá e sintimentunan di otro hende. Bon manera den e ministerio por ser compará cu specerei, locual ta ser usá pa mehorá e sabor di cuminda. Sin specerei, cuminda saludabel por keda sin smak i no ta duná bo gana di com’é. Faltando di desplegá bon manera den nos trato cu otro hende por tin un efecto similar, esta, e por haci nos mensahe saludabel parce inatractivo.—Col. 4:6.
3 Sea un Ehempel den Papiamentu: Un sonrisa amigabel i un saludo caluroso ta elementonan vital di nos presentacion dje bon nobo. Ora nos ta sasoná nos introduccion cu calor di amistad i sinceridad, nos ta laga e doño di cas sa cu nos ta berdaderamente interesá den dje. Ora e ta papia, scucha atentamente i mustra e debido respet pa su opinion. Ora abo ta papia, haci esei cu tacto i gracia.—Compará cu Echonan 6:8.
4 De bes en cuando nos ta topa un persona cu kisas ta antipático, asta cla pa bringa. Con nos mester reaccioná? Pedro a insta nos pa papia den un manera cu ta desplegá “un genio suave i respet profundo.” (1 Ped. 3:15; Rom. 12:17, 18) Jesus a bisa cu si un doño di cas ta rechasá e mensahe di Reino bruscamente, nos simplemente mester ‘sagudí e stof for di nos pia.’ (Mat. 10:14) Si nos desplegá bon manera bou di circunstancianan asina, cu tempu esei por suavisá e curason dje persona cu ta oponé.
5 Sea un Ehempel den Conducta: Predicá e bon nobo riba cayanan druk i den lugánan público ta rekerí pa nos mustra consideracion, nunca papia duru of insistí, i pa nos no stroba e movementu di hendenan cu ta pasando forbij. Ora nos ta den cas di personanan interesá, nos mester mantené etiketa corecto i comportá nos mes manera huéspednan cortes, demostrando aprecio pa nan hospitalidad. Cualkier mucha cu por ta compañá nos mester mustra respet p’e doño di cas i pa su propiedad i mester tin bon manera i mustra atencion ora nos ta combersando. Si muchanan ta inmanehabel, esaki lo laga un mal impresion atras.—Pro. 29:15.
6 Nos aparencia personal mester laga otro hende mira claramente cu nos ta ministernan dje Palabra di Dios. Den nos bistí i peñá, nos no mester ta ni slons i descuidá ni tampoco yamativo i extravagante. Nos aparencia semper mester ta digno dje bon nobo. (Compará cu Filipensenan 1:27.) Dor di presta atencion cuidadoso na nos aparencia i n’e materialnan cu nos ta usa, nos lo no duna otronan motibu pa trompecá of pa haña fayo den nos ministerio. (2 Cor. 6:3, 4) Nos abla i conducta ehemplar ta agregá un cualidad atractivo n’e mensahe di Reino, treciendo onor na Jehova.—1 Ped. 2:12.