Bon Manera—Un Característica di Hende Deboto na Dios
1 Awendia bon manera ta scars. Di con? Pasobra hende tin asina un purá, cu masha poco bes nan ta pensa pa bisa cosnan básico di cortesia manera: “Por fabor,” “Danki” of “Despensa.” E Palabra di Dios a profetisá cu bon manera lo a bai atras den e último dianan ora el a bisa cu hende lo ta ‘stimadó di nan mes, presumido, halsá, malagradecidu, sin cariño natural, sin dominio propio, sin amor pa bondad i cabesura.’ (2 Tim. 3:1-4) Tur e característicanan ei ta producí mal manera. Como hende deboto na Dios, cristiannan tin cu vigilá pa nan no adoptá e mundu aki su falta di respet pa otro hende.
2 Kico Ta Bon Manera? Por describí bon manera como ser sumamente conciente di sintimentu di otro hende, e abilidad di biba cu otro hende na pas. Aspectonan di bon manera ta: tene consideracion, cortesia, amabilidad i tacto. E característicanan aki ta sali for di un hende su amor pa Dios i pa próhimo. (Luc. 10:27) Nan no ta costa nada, pero sí nan ta masha balioso pa mehorá nos contacto cu otro hende.
3 Jesucristo a pone e ehempel perfecto. Semper el a practicá e Regla di Oro: “Manera boso kier pa hende haci cu boso, boso haci mescos cu nan.” (Luc. 6:31) E manera amoroso i cu consideracion cu Jesus a trata cu su disipelnan no ta asombrá nos? (Mat. 11:28-30) Su bon manera no a bini di reglanan cu tin den buki di etiket. Ma a sali for di un curason sincero i generoso. Nos mester purba imitá su excelente ehempel.
4 Ki ora cristiannan mester tin bon manera? Na ocasionnan special so, ora nan kier haci un bon impresion? Nos mester tin bon manera solamente ora nos ta purba influenciá otro hende? No! Nos mester desplegá bon manera tur ora. Cua ta e maneranan en particular cu nos mester ta interesá pa reflehá esaki den nos asociacion cu otro den congregacion?
5 Na Salon di Reino: Salon di Reino ta nos lugá di adoracion. Nos ta einan riba invitacion di Jehova Dios. Den e sentido ei nos ta su huésped. (Sal. 15:1) Nos ta huéspednan ehemplar ora nos bini Salon di Reino? Nos ta presta e debido atencion na nos paña i areglo personal? Un cos ta sigur, nos lo kier evitá paña informal of extremo. Sea cu nos ta asistiendo na congreso of na nos reunionnan semanal di congregacion, Jehova su pueblo ta conocí pa nan aparencia cortes cu ta pas cu hende cu ta profesá di tin respet profundo pa Dios. (1 Tim. 2:9, 10) Asina nos ta demostrá e debido consideracion i respet tantu pa nos Anfitrion celestial como pa e otro huéspednan cu a ser invitá.
6 Un otro manera cu nos ta demostrá bon manera en coneccion cu e reunionnan ta dor di yega na tempu. Nos tin cu admití sí cu esaki no ta semper fácil. Tin ruman kisas ta biba leu of nan tin un famia grandi cu nan mester prepará pa sali. Sin embargo, den algun congregacion a ripará cu casi 25 porciento dje publicadónan tin custumber di yega despues dje cantica i oracion di apertura. Esaki ta un asuntu serio. Ta bon pa corda cu bon manera tin di haber cu e echo cu nos ta conciente dje sintimentunan di otro hende. Jehova, nos bondadoso Anfitrion, a regla e banketenan spiritual aki pa nos probecho. Nos ta demostrá nos aprecio i interes pa su sintimentunan dor di ta puntual. Ademas, yega reunion lat ta distraí esnan cu t’ei caba i ta demostrá falta di respet pa nan.
7 Ora nos reuní huntu, nos ta ripará esnan nobo cu t’ei presente? Yama nan bon biní ta parti di mustra bon manera. (Mat. 5:47; Rom. 15:7) Un saludo bondadoso, duna hende man den un forma caluroso, un sonrisa amabel, tur ta cosnan chikitu, pero nan ta contribuí na loke ta identificá nos como cristiannan berdadero. (Juan 13:35) Despues di a bai un Salon di Reino pa promé bes, un homber a bisa: “Den un solo dia mi a topa mas hende sinceramente amoroso, hende completamente desconocí, cu hamas mi a topa na e misa den cua mi a lanta. Tabata bisto cu mi a haña e berdad.” Como resultado, el a cambia su curso di bida, i shete luna despues el a bautisá. Sí, bon manera por tin efecto di largu alcanse!
8 Si nos ta desplegá bon manera na hende straño cu nos topa, nos no mester haci esei “specialmente pa cu esnan relacioná cu nos den e fe”? (Gal. 6:10) E principio aki ta aplicá: “Bo tin cu mustra consideracion pa e persona di un homber [of muher] bieu.” (Lev. 19:32) Nunca nos no mag pasa e rumannan ei por haltu na nos reunionnan.
9 Presta Bon Atencion: Durante reunionnan di congregacion, ministernan cristian di Dios ta duna discurso afin di duna nos algun don spiritual pa edificá nos. (Rom. 1:11) Un muestra di hopi mal manera di nos parti sigur lo ta, si durante reunion nos mester pega soño, kou bals duru, fluister cada bes cu un hende sintá banda di nos, bai baño innecesariamente, lesa informacion cu no tin di haber cu e reunion of atendé otro asuntunan. Ancianonan mester ta ehemplar den esaki. Bon manera cristian lo impulsá nos pa desplegá e debido respet pa e orador i pa su mensahe basá riba Bijbel dor di presta sumo atencion.
10 Ademas, como muestra di consideracion tantu pa e orador como pa e auditorio, nos mester soru pa pager i telefonnan celular no perturbá nos reunionnan.
11 Bon Manera i Muchanan: Mayornan mester ta semper alerto pa e comportacion di nan yunan. Si un chikitin cuminsá yora of bira intrankil durante reunion i esaki ta molestiá otro hende, ta bon pa sali cu e mucha for di den auditorio mas pronto posibel pa trankilis’é. Tin biaha esaki por ta difícil, pero corda, dje manera ei bo ta mustra cu bo ta alerto pa sintimentu di otro hende. Mayornan cu tin yu chikitu cu probablemente lo bira intrankil, hopi bes ta scoge pa sinta patras den sala di auditorio pa asina nan molestiá mas tiki hende posibel si bira necesario pa nan lanta sali durante reunion. Claro cu e resto dje rumannan por mustra e debido consideracion pa famianan dor di laga e filanan patras disponibel pa nan por usa si nan ta deseá esei.
12 Mayornan mester ta conciente tambe dje comportacion di nan yunan promé i despues di reunion. Muchanan no mag core den salon, ya cu esaki por causa accidente. Core pafó di Salon di Reino tambe por ta peligroso, foral anochi ora cu no tin bon bista. Papia duru pafó por molestiá bisiña i ta duna un mal impresion di nos adoracion. Mester encomendá mayornan cu ta haci un esfuerso conciencial pa supervisá nan yunan tantu paden como pafó di Salon di Reino, ya cu esaki ta haci nos bibamentu huntu den unidad mas agradabel.—Sal. 133:1.
13 Na Studio di Buki: Nos ta apreciá e hospitalidad di nos rumannan cu ta habri nan cas pa reunionnan di congregacion. Ora nos asistí na studio di buki, nos tin cu mustra respet i consideracion pa nan propiedad. Promé cu drenta paden, nos mester limpia nos pia bon pa asina evitá di susha flur of tapijt. Mayornan mester supervisá nan yunan, haciendo sigur cu nan ta keda den e área designá pa studio di buki. Aunke e grupo por ta chikitu i e ambiente ta un poco informal, nos no mester comportá nos mes demasiado familiar na cas di otro hende. Mayornan mester compañá un mucha chikitu ora e tin cu bai baño. Ademas, ya cu studio di buki ta un reunion di congregacion, nos mester bisti manera ora nos ta bai Salon di Reino.
14 Bon Manera Ta Vital: Practicá bon manera cristian no solamente ta reflehá bon riba nos ministerio, sino tambe ta promové bon relacion cu otro hende. (2 Cor. 6:3, 4, 6) Como adoradó dje Dios felis, mester ta fácil pa nos duna un sonrisa pa ser agradabel, i asta haci e cosnan chikitu i bondadoso cu ta haci otro hende contentu. E característicanan aki lo embeyecé nos bida como hende deboto na Dios.