Bo Ta Mustra Cortesia Papiando na Telefon?

“Despues di cariño di famia, salú, i stimacion di trabou, tin algu cu ta contribuí tantu n’e goso di bida, restoracion i edificacion di dignidad propio, como combersacion bondadoso?”

ORA el a haci e pregunta ei, e defuntu autora i educadora mericano Lucy Elliot Keeler tabata duna un balor haltu n’e placer personal i realisacion cu hende por ricibí for di un intercambio di comunicacion oral, un don duná amorosamente na hende n’e tempu di nan creacion.—Éxodo 4:11, 12.

Haciendo un contribucion grandi n’e aumento di combersacion durante e último 120 aña ta e telefon, e invento di Alexander Graham Bell. Awe, pa miles di miyones di habitante dje tera, sea cu nan ta usa e telefon pa negoshi of pa placer, ta percurá un enlace vital entre hende.

E Telefon i Abo

Te na ki grado uso di telefon ta mehorá e calidad di bo bida? Bo no ta kere cu bo contesta p’e pregunta ei ta dependé mas riba e hendenan cu locual bo ta combersá en bes di riba e telefon mes? Realmente, ta oportuno pa nos haci e pregunta, Bo ta mustra cortesia papiando na telefon?

Cortesia papiando na telefon ta toca calidad personal tal como actitud mental, cualidad di papiamentu, i bo capacidad di scucha. Pertinente, tambe, ta e asuntu dje manera cu bo ta usa telefon i bo manera di trata cu yamada fastioso.

Consideracion Apreciativo di Otro Hende

Manera cu ta cierto den tur combersacion humano, cortesia den papiamentu na telefon ta nace di compasion humano. Apostel Pablo a skirbi: “Sea atento na interes di otro i no simplemente na bo mes interes.”—Filipensenan 2:4, The New English Bible.

Ora operadora central di telefon cu hopi experencia a ser puntrá, “Den bo experencia, cua ta e ehempel di mas comun di falta di cortesia na telefon,” el a contestá cu haltu riba su lista tabata “e persona cu ta bisa, ‘Aki ta Maria’ (Cuanto Maria bo conocé?) of, pió ainda, e persona ta bisa ‘T’ami,’ of ‘Bo sa ta ken?’” Contestanan sin consideracion asina, aunke cu bon intencion, por causa bergwensa i perdementu di pacenshi. E operadora a sigui: “Pakico no duna e yamada un bon comienso identificando bo mes claramente i ademas, mustra consideracion p’e persona cu bo ta yama, puntrando si ta un ora cumbiniente pa combersá awor?”

No lubidá, aunke e persona no por mira expresion di bo cara, bo actitud ta claro. Di ki manera? Mediante e tono di bo bos. E ta revelá bo falta di pacenshi, bo fastiosidad, rabia, indiferencia, sinceridad, alegria, bo gana di yuda, i bo cariño. Ta cierto cu iritacion por ta un reaccion natural ora cu un yamada di telefon ta interumpí bo. Como cortesia, den e situacion aki purba un pausa i dal un “sonrisa” of tono agradabel na bo bos promé cu bo ta contestá e yamada. Ta posibel pa keda na desacuerdo sin usa un tono desagradabel.

Un combinacion di consideracion apreciativo i un tono agradabel di bos por resultá den papiamentu cu ta “bon pa edificacion conforme cu e necesidad, pa duna loke ta faborabel na oyentenan.”—Efesionan 4:29.

Cualidad di Papiamentu

Sí, e clase di papiamentu cu nos ta usa ta importante. Bo ta di acuerdo cu e siguiente reglanan i ta observá nan? Papia na moda natural, cla i duidelijk. No papia den djente. No grita—ni sikiera na yamada di largu distancia. No guli palabra. Evitá di papia slordig cortando palabranan of guliendo sílabanan; tambe evitá muchu “aann,” locual por trece confusion i causa iritacion. Evitá di papia di un manera monótono i laf. Uso di énfasis pa expresá e sentido i variacion di tono ta duna nificacion na papiamentu, ta hacié bibu i refrescante. Corda, tambe, cu comementu durante combersacion na telefon no ta mehorá e calidad di bo papiamentu ni no ta mustra cortesia.

Scogementu di palabra tambe ta merecé consideracion. Dicernimentu ta necesario. Usa palabra gewoon i senciyo cu ta fácil pa comprendé. Palabra tin vários nificacion. Nan por ta bondadoso of cruel, calmante of severo, animador of desanimador. Ademas, hende por ta pret sin ta iritante, franco sin ser bòt of sin manera, i cu tacto sin gaña. Expresion di cortesia tal como “por fabor” i “danki” semper ta agradabel. Palabranan cu ta bondadoso, cu ta mustra consideracion, i ta di gustu ta loke apostel Pablo tabatin na mente ora el a skirbi: “Laga boso expresion semper sea cu gracia, sasoná cu salu, afin di sa con boso mester duna contesta un na otro.”—Colosensenan 4:6.

Sea un Bon Scuchador

Tin e cuenta di un hóben cu a pidi su tata bisé e secreto di ser un bon combersacionalista. E tata a contestá: “Scucha, mi yu.” E hóben a bisa, “Mi ta scucha, papa. Bisá mi mas.” E tata a contestá, “No tin mas pa bisa, esei ta e secreto.” En berdad, sea un scuchador interesá i simpático, anto bo tin un ingrediente vital den e receta di cortesia na telefon.

Si bo ta keda sin observá un regla senciyo, bo por resultá di ser yamá un hende fastioso na telefon. Cua regla? No dominá e combersacion. Por ehempel, no bira absorbá den contamentu di un cuenta sin fin, ripitiendo un combersacion fastioso cu bo tabatin, palabra pa palabra, ni no conta historia personal largu di dolor i enfermedad menor. Un biaha mas, nos tin un regla aplicabel, un regla bíblico breve, e biaha aki di disipel Santiago. Sea “lihé pa scucha pero lento pa papia.”—Santiago 1:19, Jerusalem Bijbel.

Consideracion di Conclusion

Awor, laga nos trata cu dos cuestion final cu ta presentá den contexto di cortesia na telefon. Kico nos por bisa tocante uso dje aparato mes? Tin algun sugerencia pa guia nos pa trata cu yamada no bon biní?

Ora bo ta papia na telefon, bo a ripará cu avéces e bos dje otro hende ta bai-bin? Esei mester hací bo corda pa papia den e bosina dje telefon, cu e aparato 2 centimeter for di bo boca. Ademas, cortesia ta exigí pa bo controlá boroto den fondo. Ora bo haci un yamada, marca number cu cuidou, evitá di marca un number robes; i ora bo concluí e yamada, cera e telefon suavemente.

Bo a yega di bira víctima di yamadanan indecente? Lamentablemente, ta parce cu nan ta aumentá. Idioma indecente, di dobel sentido, of obseno ta merecé un solo contesta—ceramentu di telefon. (Compará cu Efesionan 5:3, 4.) Mescos ta cierto ora un persona ta nenga di identificá su mes. Si bo tin motibu pa ser sospechoso di un yamada, e publicacion How to Write and Speak Better ta recomendá pa “no contestá ora un bos straño ta puntra, ‘Ken ta papia?’” i pa bo no revelá bo plannan na un hende straño.

Ta bon pa sa cu al fin i al cabo, ehercicio di cortesia na telefon no ta exigí un lista largu di regla of reglamentu! Mescos cu den tur trato cu hende, relacion agradabel i recompensador ta resultá di aplicacion di loke hende sa yama e Regla di Oro. Jesucristo a bisa: “Tur loke boso kier pa hende haci na boso, boso tambe di igual manera tin cu haci na nan.” (Mateo 7:12) Ademas, hende cristian tin e deseo di agradá Esun cu a duna hende e don di abla. E salmista a pidi den oracion: “Laga e palabranan di mi boca i meditacion di mi curason bira agradabel dilanti bo, O Jehova mi Baranca i mi Redentor.”—Salmo 19:14.