Predikashon via Telefòn Por Ta un Método Efektivo
1 Dikon nos lo ke pensa riba e posibilidat di prediká via telefòn? Pasobra esaki ta un método mas ku nos por usa pa yuda hende atkerí konosementu eksakto ku ta hiba na salbashon. (2 Ped. 3:9) Maske e predikashon di kas pa kas ta e método prinsipal pa deklará e bon nobo di e Reino di Dios, nos ke hasi bon uso di otro métodonan pa logra haña esnan ku no ta na kas.—Mat. 24:14; Luk. 10:1-7; Rev. 14:6.
2 Kon pa Organis’é: Meskos ku tin teritorio pa e trabou di kas pa kas, asina tambe tin teritorio pa e predikashon via telefòn. Un publikadó por prediká su so via telefòn òf e por prediká den un grupo chikitu di dos òf tres hende. E lugá ku boso lo usa mester ta ketu i sin distraishon. Hopi publikadó ta haña ku ta útil pa sinta na un mesa i pone nan dilanti tur loke nan ta usa normalmente ora nan ta prediká di kas pa kas.
3 Kon pa Prediká via Telefòn: Ora nos ta prediká via telefòn, nos presentashon mester ta estilo di kòmbersashon. Publikadónan nobo por lesa un presentashon pa e doño di kas pero hasi esaki estilo di kòmbersashon. Introdukshonnan ku tin den e buki Rasonamentu, Nos Ministerio di Reino i e tratado Bo Ke Haña Sa e Bèrdat? por ta útil ora nos ta prediká via telefòn. Ora bo mes ta prepará bo presentashon, skohe un tópiko, formulá un pregunta i buska un par di teksto ku ta kontestá e pregunta. Por lo general lo bo por ofresé e mesun publikashonnan ku bo ta ofresé di kas pa kas. Konsiderá e siguiente rekordatorionan: Rilèks i papia slow. Mustra kortesia i pasenshi i sea amigabel, ya ku via telefòn un hende por nota tur e kosnan ei. Skucha ora e doño di kas ta ekspresá su pensamentunan, despues reakshoná riba loke el a bisa i ekspresá apresio pa su komentario. Tene kuidou pa bo no menshoná e areglo di donashon, ya ku hende por pensa ku bo ta hibando un kampaña pa rekoudá fondo via telefòn.
4 E persona ku bo papia kuné na telefòn kisas no por sali for di kas òf podisé e ta un hende ku bo no ta topa fásil den e trabou di kas pa kas debí na su orario di trabou. Tin otro hende ta biba den komplehonan di residensia será pa públiko i ku tin pòrtir na entrada òf apartamentonan ku bo no por yega na dje fásilmente. P’esei, pa nos por logra kumpli ku nos ministerio plenamente i kabalmente, pensa riba e posibilidat di usa e método efektivo di predikashon via telefòn.
[Study Questions]
1. Dikon nos por mira predikashon via telefòn komo un parti importante di nos ministerio?
2. Kon ta organisá e predikashon via telefòn?
3. Kiko nos mester tene kuenta kuné ora nos ta prediká via telefòn?
4. Kiko nos por logra mediante e predikashon via telefòn?