Kuminsá Estudio di Beibel na Porta i na Telefòn
1 Awendia hende ta drùk. Tòg, hopi di nan ta interesá den kosnan spiritual. Kon nos por yuda nan satisfasé nan nesesidat spiritual? (Mat. 5:3, NW) Hopi publikadó ta logra studia Beibel ku hende na porta òf na telefòn. Abo lo por ekspandé bo sirbishi den e manera aki?
2 Pa kuminsá estudionan di Beibel, nos mester ta prepará pa ki ora ku un oportunidat presentá nos demostrá kon un estudio di Beibel ta bai. Kon i na unda nos por hasi esaki?
3 Na Porta: Ora bo topa un persona ku ta dispuesto pa papia tokante Beibel, djis habri un publikashon na un paragraf ku bo a prepará di antemano, i kuminsá. Bo por usa por ehèmpel, e promé paragraf di lès 1 den e foyeto Rekerí. Lesa e paragraf, konsiderá e pregunta i trata un òf dos di e tekstonan menshoná. Hopi bes nos por hasi esaki na porta mes den sinku pa dies minüt. Si e persona gusta e konsiderashon, hasi areglo pa konsiderá un òf dos di e siguiente paragrafnan un otro biaha.—Den Nos Ministerio di Reino di yanüari 2002, página 6, nos por haña mas sugerensia tokante kon pa usa e método direkto pa kuminsá estudio.
4 Por usa un método similar pa kuminsá estudio di Beibel ora di hasi rebishita. Por ehèmpel, bo por introdusí e foyeto Rekerí i usa lès 2, paragraf 1 i 2 pa trata e nòmber di Dios. Na e siguiente bishita bo por usa paragraf 3 i 4 pa konsiderá loke Beibel ta revelá tokante Yehova su kualidatnan. Pa e siguiente konsiderashon, bo por konsiderá paragraf 5 i 6 i e plachi na página 5 pa enfatisá kon un estudio di Beibel ta yuda nos siña konosé Yehova. Nos por hasi tur esaki pará na porta.
5 Na Telefòn: Tin hende lo ta mas dispuesto pa studia Beibel na telefòn ku personalmente. Konsiderá e siguiente eksperensia: Durante e predikashon di kas pa kas, un ruman muhé a topa un señora hóben ku ta mama i a la bes un profeshonal hopi drùk. Ora ku e ruman muhé no por a logra haña e persona aki na kas atrobe, el a disidí di yam’é na telefòn. E señora hóben a splik’é ku ègt e no tin tempu pa studia Beibel. E ruman muhé a bis’é: “Den 10 òf 15 minüt, bo por siña algu nobo, maske ta na telefòn. E señora a kontestá: “Bon, si ta na telefòn, e ora ei sí!” Den poko tempu nan a kuminsá ku un estudio regular na telefòn.
6 Algun di e personanan ku bo ta bishitá lo ta dispuesto pa studia na telefòn? Lo bo por purba e presentashon anterior, òf bo por bisa simplemente: “Si bo ta preferá, nos por kòmbersá di Beibel na telefòn. Esei lo ta mihó pa bo?” Dor di adaptá nos programa di estudio di Beibel na sirkunstansianan di otro hende, kisas nos por yuda nan “deskubrí e konosementu di Dios.”—Pro. 2:5; 1 Kor. 9:23.
[Study Questions]
1, 2. Kon nos lo por adaptá nos programa di estudio di Beibel pa yuda hende ku ta drùk?
3. Dikon ta bon pa demostrá un estudio di Beibel na e promé bishita, i kon bo por hasi esaki?
4. Kon nos por kuminsá un estudio di Beibel na porta ora di hasi rebishita?
5, 6. (a) Dikon algun persona lo preferá di studia Beibel na telefòn? (b) Ki método nos por usa ora nos ta ofresé un persona pa studia na telefòn?