Kondusí Estudionan di Beibel Progresivo na Porta i via Telefòn
1 No tin nada mas gososo ku kuminsá un estudio di Beibel ku un persona interesá! Pero esei ta apénas e prinsipio. E propósito di e estudio ta pa yuda e persona bira un berdadero disipel di Kristu. (Mat. 28:19, 20) Kiko por yuda nos alkansá e meta ei?
2 Hende Okupá: Awendia hende ta mas i mas okupá. Den algun teritorio, na prinsipio mayoria hende no ta dispuesto pa apartá henter un ora pa studia Beibel. Pa yuda e hendenan ei, nos a haña e animashon pa kuminsá i kondusí estudionan di Beibel na porta òf via telefòn. Na prinsipio, e seshonnan di estudio aki lo por ta relativamente breve; podisé bo ta haña chèns di konsiderá djis un par di teksto bíbliko ku yudansa di un òf dos paragraf den un publikashon manera e buki Beibel Ta Siña. Tin hopi publikadó ta kondusí estudionan asina na porta òf via telefòn. Nos ta elogiá nan pa esei!
3 Sin embargo, nos mester keda konforme ku un estudio na porta? Nò. Ounke no ta sabí pa nos tuma hopi tempu na prinsipio ora e estudio kuminsá, Nos Ministerio di Reino di mei 1990, página 8, a komentá: “Unabes e estudio keda establesí i e doño di kas su interes a oumentá, nos lo por hasi e seshon di estudio mas largu.” Esaki ta masha importante. Un ehèmpel: Na prinsipio bo por alimentá un mucha ku ta muriendo di hamber ku porshonnan chikitu di kuminda te ora su kurpa kustumbrá. Pero nos no por ferwagt ku e ta rekobrá su forsa i krese normal si nos sigui dun’é e porshonnan chikitu ei pa lunanan largu. Asina tambe, un studiante di Beibel tin mester di un estudio ku ta mas formal i regular pa e por desaroyá i bira un sirbidó madurá di Dios.—Heb. 5:13, 14.
4 Estudio di Beibel den Kas: Ta preferibel pa kondusí un estudio na un lugá privá—den kas òf na un otro sitio apropiá. Esaki lo yuda e studiante siña mas lihé i komprondé e Palabra di Dios mihó. (Mat. 13:23) Di e forma aki e maestro ta den mihó posishon tambe pa adaptá e informashon di estudio na e nesesidatnan di e studiante. Ademas, seshonnan mas largu lo permití e maestro edifiká fe di e studiante i bai mas profundo den e estudio di e Palabra di Dios.—Rom. 10:17.
5 Kon bo por kambia un estudio na porta pa den kas? Despues di vários seshon di estudio kòrtiku, pakiko no djis sugerí e persona pa boso studia pa un kantidat di tempu spesífiko mas largu? Òf kisas bo por usa un método indirekto dor di puntra e persona: “Bo tin tempu awe pa nos sinta i konsiderá e informashon aki huntu?” òf “Kuantu tempu lo bo ke dediká awe pa konsiderá e tópiko aki?” Si bo intentonan no duna fruta, sigui en todo kaso ku e estudionan kòrtiku na porta. Na un otro oportunidat apropiá, purba atrobe pa kambia e estudio pa unu den kas.
6 Segun ku nos ta sigui buska hende meresedor, laga nos no lubidá ku ki meta nos ta kuminsá i kondusí estudionan di Beibel. Nos meta ta pa yuda hende sinsero bira sirbidónan dediká i batisá di Yehova. Nos ta pidi Yehova bendishoná nos esfuersonan segun ku nos ta kumpli ku nos ministerio ku e meta aki na mente.—2 Tim. 4:5.
[Study Questions]
1. Ku ki propósito nos ta kondusí estudio di Beibel?
2. Kiko ta un estudio di Beibel na porta, i kiko ta un estudio via telefòn, i dikon nan ta práktiko?
3. Dikon nos mester hasi esfuerso pa alargá e seshonnan di estudio na porta?
4. Kiko ta e benefisionan di tene un estudio di Beibel den kas?
5. Kon nos por kambia un estudio na porta pa den kas?
6. Ku ki meta nos mester kumpli ku nos ministerio, i kon e sugerensianan den e artíkulo aki por yuda nos alkansá e meta ei?