Parti 1—Kon pa Kondusí Studio di Beibel Progresivo
Kiko Ta un Studio di Beibel?
1 Mundialmente, Dios su pueblo ta kondusí rònt di seis mion studio di Beibel tur luna. Dor di usa bon métodonan di siña hende, nos por yuda e studiantenan di Beibel aki progresá te na e punto di dedikashon i boutismo i bira “kapas pa siña otro hende.” (2 Tim. 2:2) Lo bo ke yuda bo studiante hasi tal progreso? Kuminsando ku e edishon aki, Nos Ministerio di Reino lo presentá un seri di artíkulo ku lo splika e aspektonan básiko pa kondusí studio di Beibel progresivo.
2 Ki Ora Mester Raportá un Studio di Beibel: Bo ta kondusí un studio di Beibel ora ku riba un base regular i na un manera sistemátiko bo ta tene konsiderashonnan bíbliko, maske nan ta breve, usando Beibel huntu ku un di e publikashonnan rekomendá. Esaki ta konta asta si e studio ta tuma lugá pará na porta òf via telefon. Bo por raportá e studio ora ku bo a kondusié dos biaha despues di a demostrá e areglo di studio i si tin indikashon ku e studio lo sigui.
3 E foyeto Rekerí i e buki Conocimentu ta publikashonnan ku ta ser usá pa kondusí hopi studio di Beibel. Despues ku un studiante kaba di studia nan, si ta bisto ku e ta hasiendo progreso—maske ta pokopoko—i e ta hañando apresio pa loke e ta siña, e ora ei por sigui ku e studio usando e buki Adorá Dios. Nos por usa e foyeto Bo Por Ta Amigu di Dios! pa studia ku hende ku no a haña hopi edukashon òf ku no ta lesa bon.
4 E trabou di kondusí studio di Beibel a resultá masha efektivo den yuda miónes di persona bira berdadero disipel di Hesukristu. (Mat. 28:19, 20) Dor di apliká e sugerensianan ku nos lo haña den e siguiente artíkulonan di e seri aki, bo tambe por kondusí un studio di Beibel progresivo.