E Buki Beibel Ta Siña—Nos Buki Prinsipal di Estudio di Beibel
1 Nos a keda masha emoshoná na e Kongreso di Distrito “Obedensia na Dios,” ora nos a risibí e buki Kiko Beibel Ta Siña Realmente? Tur presente a keda kontentu ku nan por a risibí un ehemplar personal na final di e programa di djasabra. Kon nos lo usa e buki nobo aki? El a ser prepará komo nos hèrmènt prinsipal di estudio di Beibel. Ounke ta te na luna di mart nos lo ofresé e buki nobo aki komo oferta di literatura pa promé bes, ta animá publikadónan pa kuminsá us’é mesora pa kuminsá i kondusí estudio di Beibel.
2 Estudionan di Beibel Aktual: Publikadónan ku ta kondusiendo estudionan di Beibel den e buki Conocimentu òf e foyeto Rekerí mester usa sano huisio pa disidí kon i ki ora pa kuminsá studia den e publikashon nobo aki. Si ta resientemente bo a kuminsá un estudio, bo por simplemente kuminsá for di prinsipio di e buki nobo. Si bo ta mas leu den e buki Conocimentu lo bo por sigui e estudio den e kapítulo korespondiente den e buki Beibel Ta Siña. Si bo ta serka di kaba e buki Conocimentu, kisas bo ta haña ta mihó pa sigui studi’é te na final.
3 Sin duda nos tur konosé hopi hende ku lo benefisiá di un estudio for di e buki Beibel Ta Siña. Pakiko no ofresé kada un di e personanan aki un estudio di Beibel for di e buki aki? E ta splika bèrdatnan bíbliko na un manera sistemátiko. Tin personanan ku a studia e foyeto Rekerí òf e buki Conocimentu sin ku nan a progresá te na dedikashon i boutismo, pero ku awor kisas ta deseá di reanudá nan estudio den e buki nobo. Podisé mayornan por disidí di usa e buki aki pa yuda nan yunan gana konosementu eksakto di Dios su boluntat.—Kol. 1:9, 10.
4 Estudio di un di Dos Buki: Tin un areglo pa un studiante di Beibel studia un di dos buki despues ku el a kompletá Kiko Beibel Ta Siña Realmente? Sí. Ora ta bisto ku un studiante ta progresá, ounke ta pokopoko, i e ta desaroyando apresio pa loke e ta siñando, bo por sigui e estudio den e buki Adorá e Úniko Dios Berdadero. Nos ta konvensí ku e buki Beibel Ta Siña lo ta un hèrmènt efektivo segun ku nos ta kumpli ku nos tarea di hasi disipel.—Mat. 28:19, 20.