Un Consideracion Progresivo dje Trabou Urgente di Haci Disipel

¹ Promé cu Jesus a bandoná e tera, el a manda su siguidónan “haci disipel di hende di tur nacion.” Pa nan a haci esaki nan mester a cuminsá un campaña intensivo di predicá i siña otronan i extendé nan actividad den henter e tera habitá. (Mat. 28:19, 20; Echo. 1:8) Nan a mira e encargo aki como un peso muchu pisá pa carga? No segun apostel Juan. Despues di 65 aña den e trabou di haci disipel, el a skirbi: “Esaki ta loke e amor di Dios ta nificá, cu nos ta warda su mandamentunan; i tog su mandamentunan no ta un carga pisá.”—1 Juan 5:3.

² E registro bíblico dje actividad dje cristiannan di promé ta duna prueba cu nan a traha cu un sentido di urgencia riba nan encargo di haci disipel di Jesucristo. (2 Tim. 4:1, 2) Nan a haci esaki, no djis como un deber, sino debí na nan deseo, motivá pa amor, pa alabá Dios i pa hiba e speransa di salbacion na otro hende. (Echo. 13:47-49) Debí cu tur cu a bira disipel tambe a bira hacidó di disipel despues, e congregacion cristian a crece rápidamente den e promé siglo.—Echo. 5:14; 6:7; 16:5.

³ E Trabou di Haci Disipel Ta Acelerá: E trabou di haci disipel mas grandi di tur tempu ta tumando lugá den e siglo 20 aki! Te asina leu, miyones di hende a aceptá e bon nobo i a actua di acuerdo cuné. (Luc. 8:15) Como cu tempu ta cabando lihé p’e sistema di cosnan actual, “e esclabo fiel i discreto” a soru pa nos tin hermentnan cu ta haci posibel pa hende di curason onrado siña e berdad rápidamente.—Mat. 24:45.

⁴ Na 1995 nos a ricibí e buki Conocimentu cu Ta Hiba na Bida Eterno, i na 1996 a sigui e foyeto Kico Dios Ta Rekerí di Nos? Relacioná cu e buki Conocimentu, E Toren di Vigilancia di 15 di januari 1996, página 14, a declará: “E buki di 192 página aki por ser studiá den un periodo di tempu relativamente corticu, i esnan ‘corectamente dispuesto pa bida eterno’ mester por siña suficiente mediante un studio di dje pa haci un dedicacion na Jehova i ser bautisá.”—Echo. 13:48.

⁵ E suplemento di Nos Ministerio di Reino di juni 1996, “Con pa Haci Disipel cu e Buki Conocimentu,” a duna nos e meta aki: “Dependiendo dje circunstancia i abilidad dje studiante, lo por ta posibel pa bo cubri mayoria capítulo den un solo sesion di un ora i picu, sin pura e studio. Studiantenan lo haci mihó progreso ora tantu e maestro como e studiante ta tene nan n’e cita pa studia tur siman.” E artículo a sigui bisa: “Ta di spera cu pa ora un persona caba di studia e buki Conocimentu, lo a bira bisto cu e ta sincero i tin un interes profundo pa sirbi Dios.” E Caha di Pregunta den Nos Ministerio di Reino di october 1996 a splica: “Nos ta verwagt cu den un periodo di tempu relativamente corticu, un maestro eficas lo por yuda un studiante comun cu ta sincero pa adkerí suficiente conocimentu pa tuma un decision inteligente pa sirbi Jehova.”

⁶ E Buki Conocimentu Ta Duna Resultado: E dia cu un señora hóben a bautisá, el a conta con el a haña e studio for dje buki Conocimentu. E tabata studiando pa basta tempu for dje buki Biba pa semper. Ora e buki Conocimentu a sali, e ruman cu tabata conducí e studio cuné a cambia p’e buki nobo. Pronto e studiante por a mira cu esaki lo a bai rekerí un decision di su parti, i esei a motiv’é pa haci progreso rápido for dje punto ei padilanti. E señora hóben, awor nos ruman, ta bisa: “E buki Biba pa semper a yudá mi stima Jehova, pero e buki Conocimentu a yudá mi tuma e decision pa sirbié.”

⁷ Considerá con lihé un otro señora a siña e berdad. Despues di dos sesion di studio, el a asistí na un reunion na Salon di Reino durante e bishita dje superintendente di circuito. E siman ei, na su di tres studio, el a bisa e superintendente di circuito cu el a haci su dedicacion na Jehova i kier a bira un publicadó no-bautisá. El a reuní cu e ancianonan, cu a aprob’é como publicadó, i e siguiente siman el a cuminsá sali den sirbishi di veld. El a enbolbé su mes asina tantu den su studio di Bijbel cu el a tuma verlof di trabou pa por a studia dos of tres bes pa siman i dedicá mas tempu den e ministerio. Tin biaha, nan tabata trata dos of tres capítulo den un sesion. El a cuminsá aplicá loke e tabata siña den tur aspecto di su bida, a caba e buki Conocimentu den cuater siman i despues a progresá yega na bautismo!

⁸ E casá di un ruman muher ta describí su mes como “un típico casá incrédulo.” Un dia, un ruman homber a ofrec’é un studio di Bijbel for dje buki Conocimentu cu e condicion cu e homber por stop despues di e promé studio of ki ora cu e kier despues di esei. E esposo a bai di acuerdo pa purba e studio, maske e no a siña masha bon tempu e tabata bai scol, ni no a studia nada di literatura religioso pa mas cu 20 aña. Kico tabata su reaccion n’e studio for dje buki Conocimentu? E di: “Tabata un berdadero placer pa descubrí cu e buki aki pa studia Bijbel a ser skirbí cu asina un simplesa. E informacion den dje tabata asina cla i lógico presentá cu pronto mi tabata anhelá mashá p’e ora di nos siguiente studio yega. Mi maestro a aplicá ábilmente e métodonan di haci disipel cu Sociedad a describí, i cu e yudansa di Jehova su spiritu, mi a bautisá cuater luna despues. Di berdad mi por bisa cu si nos desaroyá un amor pa haci disipel, sigui busca hende di bon curason den e ministerio di veld, haci uso dje buki Conocimentu i otro literatura pa studia Bijbel cu Sociedad ta percurá, i, mas importante ainda, pidi Jehova pa su guia, nos por tin e privilegio masha special di yuda haci disipel.” E experencianan mencioná aki ta realmente excepcional. Mayoria di nos studiantenan no ta bini den berdad dje lihé ei.

⁹ Studiantenan Ta Progresá un Mas Lihé cu Otro: Nos tin cu admití cu e abilidadnan di tantu maestro como studiante dje Palabra di Dios por varia considerablemente. Crecementu spiritual por ta lento of rápido. E progreso cu algun studiante ta haci den un par di luna kisas ta tuma otronan hopi mas tempu pa haci. Con lihé un persona su desaroyo spiritual ta bai, ta dependé di su educacion, su grado di aprecio pa cosnan spiritual i e profundidad di su debocion na Jehova. No ta tur hende cu nos ta studia cuné tin e “mayor prontitud di mente” pa studia e Scritura diariamente, manera e bereanonan di antigwedad cu a bira creyente.—Echo. 17:11, 12.

¹⁰ Ta p’esei e suplemento di Nos Ministerio di Reino di april 1998, “Ta Busca—Mas Studio di Bijbel,” ta duna e instruccion realístico aki: “Di mes, no ta tur studiante di Bijbel ta progresá mésun lihé. No ta tur tin e mésun inclinacion spiritual ni no ta tur ta mes lihé den capta cos cu ta siña nan. Otro studiantenan tin un bida hopi ocupá i tal bes no por dedicá e tempu necesario pa abarcá henter un capítulo pa siman. Pues, den algun caso lo por ta necesario pa tuma mas cu un sesion di studio pa abarcá cierto capítulonan i algun luna adicional pa completá henter e buki.”

¹¹ Hacidónan di Disipel Ta Tene un Punto di Bista Balansá: Ta necesario pa determiná con lihé e studio tin cu bai di acuerdo cu e circunstancia i abilidad dje studiante. Ya cu nos ta ser animá pa cuminsá studionan for dje foyeto Rekerí, lo por tuma dos pa tres luna pa abark’é promé cu bai den e buki Conocimentu. Si nos aplicá tur e sugerencianan describí den e suplemento di Nos Ministerio di Reino di juni 1996, por ta masha bon cu ta tuma un seis pa nuebe luna mas pa caba cu e buki Conocimentu. Algun ruman cu a cuminsá un studio for dje buki Conocimentu, a pasa over p’e foyeto Rekerí pa yuda e studiante siña berdadnan bíblico básico mas lihé. Anto despues nan a reanudá e studio for dje buki Conocimentu. Si a cuminsá un studio for dje buki Conocimentu i e studio ta bai bon, por ta probechoso pa studia e foyeto Rekerí despues di a completá e buki, haciendo asina un repaso breve dje berdadnan básico dje Palabra di Dios. Den tur dos caso, nos no kier stroba e studiante di haña un bon conocimentu, djis pa pasa lihé dor dje buki. Cada studiante tin mester di un base sólido pa su fe nobo den e Palabra di Dios.

¹² Sabiendo unda nos ta pará den tempu, ta mas urgente cu nunca promé pa yuda otronan siña e berdad. Ademas di pidi continuamente den oracion pa cuminsá studionan nobo di Bijbel, laga nos pidi tambe pa esnan cu ya caba ta studiando cu nos. E ora ei nos lo tin e goso di sigui bautisá mas disipel “tur e dianan te n’e conclusion dje sistema di cosnan.”—Mat. 28:20.