Caha Di Pregunta

◼ Awor cu nos tin e buki Conocimentu cu Ta Hiba na Bida Eterno, pa cuantu tempu mester conducí un studio di Bijbel na cas?

Nos Ministerio di Reino pa september 1993 a recomendá pa continuá un studio di Bijbel na cas cu esnan recien interesá te ora cu a studia dos buki. Awor cu nos tin e buki Conocimentu, ta parce consehabel pa haci un ahuste den e procedura aki, manera a ser describí na página 13 i 14 dje edicion di 15 di januari, 1996, di E Toren di Vigilancia.

E buki Conocimentu ta diseñá pa yuda esnan “corectamente dispuesto pa bida eterno” siña loke nan tin cu sa afin di haci un dedicacion na Jehova i ser bautisá. (Echo. 13:48) P’esei, despues di completá e publicacion nobo aki, lo no mester ta necesario pa studia un di dos buki cu e mésun studiante. Segun cu bo studiantenan di Bijbel ta cuminsá aceptá e berdad, bo por animá nan progresivamente pa completá nan conocimentu dor di asistí na reunionnan di Testigonan di Jehova i tambe dor di lesa e Bijbel i vários publicacion cristian.

Si bo ta cabalmente familiarisá cu e preguntanan na página 175 te 218 dje buki Organisá pa Cumpli cu Nos Ministerio, esaki lo por ta útil. Aunke bo no mag haci referencia na e preguntanan aki of repasá nan cu e studiante di Bijbel, lo por ta bon pa enfatisá puntonan den e buki Conocimentu cu lo capacitá e studiante pa expresá un comprendimentu corecto di berdadnan bíblico básico ora e ancianonan repasá e preguntanan cu candidatonan pa bautismo.

No ta necesario pa complementá e informacion den e buki Conocimentu, treciendo material djafó of argumentonan adicional pa apoyá siñansanan bíblico of pa desaprobá doctrinanan falsu. Esaki solamente lo pone cu e studio ta extendé over di un periodo di tempu mas largu. Mas bien, nos ta spera cu por cubri e buki basta lihé, kisas den aproximadamente seis luna. Esaki ta enfatisá e necesidad pa nos studia e material cabalmente di antemano di manera cu nos por present’é di un manera claro, breve i al caso. Tambe mester insta e studiante pa studia di antemano, busca e textonan citá i trata na dicerní claramente kico e buki ta siñando den cada capítulo.

E Toren di Vigilancia a enfatisá e necesidad pa Testigonan di Jehova conducí un mayor cantidad di studio di Bijbel eficas den un periodo di tempu mas corticu. (Mira Isaías 60:22.) Uso eficas dje buki Conocimentu por yuda esnan nobo adkerí e conocimentu cu ta hiba na bida eterno i actua na armonia cuné.—Juan 17:3.