Caha Di Pregunta

◼ Pa cuantu tempu mester conducí un studio di Bijbel formal cu un persona for dje buki Conocimentu?

Jehova ta bendicionando su organisacion awe. Nos ta mira evidencia di esaki tur aña ora cu miles di hende nobo tuma un posicion na banda dje berdad. E buki Conocimentu ta resultando di ta un instrumento eficas den logra esaki. E edicion di 15 di januari, 1996, di E Toren di Vigilancia a indicá cu e buki aki ta diseñá pa yuda un studiante di Bijbel haci progreso spiritual bastante lihé, tal bes te n’e punto di bautisá den un par di luna.

P’e motibu aki, e mésun Toren di Vigilancia, na página 17, a consehá: “Despues cu un individuo a completá su studio di Bijbel for dje buki Conocimentu i a ser bautisá, kisas no ta necesario pa tene un studio formal cuné for di un di dos buki.”

Kico di un persona cu no a bautisá despues di a completá e buki Conocimentu? Nos Ministerio di Reino di juni 1996, página 6, §23, ta recordá nos dje punto cu E Toren di Vigilancia a enfatisá tocante no studia mas buki cu e mésun studiante despues di completá e buki Conocimentu. Esei kier men cu nos no ta interesá pa yuda un studiante di Bijbel despues di e punto aki? No. Nos kier pa hende ricibí un conocimentu básico dje berdad. Sin embargo, nos ta verwagt cu den un periodo di tempu relativamente corticu, un maestro eficas lo por yuda un studiante comun cu ta sincero pa adkerí suficiente conocimentu pa tuma un decision inteligente pa sirbi Jehova. Ta posibel cu debí na nan circunstancianan personal, algun studiante di Bijbel lo asta deseá di studia mas cu un biaha pa siman.

Ta cierto cu algun studiante lo progresá mas poco-poco cu otronan. Pero si despues di a studia e buki Conocimentu, tal bes tardando mas di loke normalmente ta e caso, e persona no a dicidí cu e kier asociá cu e congregacion, e publicador lo haci bon di considerá e situacion cu un dje ancianonan den e Comité di Sirbishi di Congregacion. Si tin circunstancianan atenuante of inusual enbolbí, yudansa adicional por ta na su lugá. Esaki ta na armonia cu e principio di loke ta ser declará den §11 i 12 na página 17 di E Toren di Vigilancia di 15 di januari, 1996.

Aprecio pa adkerí asta un conocimentu básico dje berdad mester motivá e studiante pa asistí na reunionnan cristian. Esaki lo por hiba e studiante na duna algun evidencia claro di su deseo pa sirbi Jehova. Si tal aprecio spiritual no ta evidente despues di a conducí un studio for dje buki Conocimentu pa un periodo prolongá, lo por ta consehabel pa descontinuá e studio.